Read Hadiyya Qooccanchi Kitaaba 19 Bible Online

Qooccanchi Kitaaba 19 - Hadiyya bible

Qooccanchi Kitaaba 19

¹Waa'ik lamem asse'amaanim ee hiimom Soddoma affo'i ammanenne Loox beero'i goocanne afuuraa hee'ukko. Looxim ixxuwwa moo'ukkisam ixxuwwinne edameena ki'aa marukko; ixxuwwi illagennem uullanne heeshaa otossukko.

²Looxim «I moollanno'o ki'nnuwwina awwaadaanchi ihummi i mine aaggehe; ki'nnuwwi lokkom aanshaqqitakka'a i minenne gallehe; soodo daram ki'llakka'a ki'nnuwwi googo mattakkamo» yukko. Ihukkaarem ixxuwwi dabatta'a ka nafaranne galloommo bagaan ihooyyo» yito'o.

³Ihukkaarem Loox ixxuwwa qoxxisaa uunxu bikkina maqirem ixxi mine aaggo'o. Looxim ixxi baxaano koyyina qorosho'o danaamisa gudissona ijaajukko; qorosho'im afaa lasage massaa uwwukkaare itto'o.

⁴Ihukkaarem ixxuwwi iinse'lleena illageen Soddo'm beero'onne yo'i goon hundim woraadiinsi ki'isaa lommannanne afeebe'e waatta'a Loox mine kibbito'o.

⁵Looxam weeshsha'a «Kabaxxaare ki mine gatteena waatto'i manni hannonnette? Ixxuwwa ni beyyo biira fisse; goon meentinne edamoo'isa neese ixxuwwinne edammeena hansoommo» yito'o.

⁶Ihukkaarem Loox ixxuwwa atoorasseena biira firaa mi'nneka gooca afa'llaachcha xufukko.

⁷Looxim «Iyyabbaayyuwwa! Kido'i jor luwwa baxxakkotte.

⁸Iina lam baajaam landi yo'o; ixxuwwa ki'nnuwwina fissaa uwwoommaare hassakko'isa issehe; ihukkaarem ku koyyi eese kutta'a waatto'oo manni ikko'i bikkina ixxuwwanne mat lichchom issitakkambee'isa» yaa uunxukko.

⁹Ihukkaarem ixxuwwi dabatta'a «Ki gagoomim waaraanchi ikkaa hee'llittuuyyi daanni ikkeena hassoolla; ka beyyiinsi laa'ihe! Laa'itbeelas ixxuwwanne issinoommi jolliinsi lonsinaa keesenne issinoommo» yito'o. Looxam afa'llaachcha gafe'lla'a u'llummi xufa iiqqeena issito'o.

¹⁰Ihukkaarem oo minenne hee'llo'i lamem koyyi mannim anga asse'lla'a Looxa hixixaa'lla'a mine aagissa'a u'llummi xufa xuffo'o.

¹¹Ee lasage u'llummi goocanne hee'llo'i mannika hoffaanniinsi ki'isaa lobaannonne afeebe'e moo'lleena xantambee'isa hundikam ille qooqisso'o.

¹²Lamem manchim Looxina «Ka beero'onne hee'llam ki goo'n oosoo landaa ki oos balluwwaa mulli qarmannaa hundam qaqqissa'a ka beero'iinsi fittamisa isse.

¹³Ka beero'o neese bi'inseenatte; mashka'oomim ka minaadaphphek baaxiil lobakata lophphukkisa Waa'i moo'aakko; ee bikkina Soddoma bi'insona neese asse'aakko» yito'o.

¹⁴Ee lasage Loox ixxi miniinsi firaa ixxi landa xeehu manni mine maraa «Waa'i ka beero'o bi'iseenatte ihu bikkina qaqqissakka'a ka beyyiinsi fillehe» yukko. Ihukkaarem ixxuwwi naacamookkoka labissa'a innaannito'o.

¹⁵Uulli soodukkuuyyim Waa'i asse'amaan Looxina «Ka beero'inne maqire bi'llakkambee'isa ki meentichchoo kiikka lamem landaa amaddaa qaqqissaa ka beyyiinsi fire» yita'a gaaggaabisso'o.

¹⁶Ihukkaarem Loox dasukkaare Waa'i ixxuwwina qishixxu bikkina oo manni ixxeka, ixxi meentichchokaa ixxi lamem landikaa anga amadda'a beero'iinsi tochchonne fissito'o.

¹⁷Tochchonne fissita'a lasage Waa'i asse'amaa'nnek mat «Ki'nnuwwi foore gatixxitakkeena qaqqissakka'a gibbehe; laso daba'llitakka'atim moo'llakkotte; ka cebbi beyyonnem ihuta'n uullitakkambee'isa duu'n kollonne gibbehe; oobeelas bi'llakkamo» yukko.

¹⁸Ihukkaarem Loox «I moollanno'o, neese ee'isa issitakkotte.

¹⁹An ki'nnuwwina awwaadaanchi ki'nnuwwi illagenne nuura siidummi bikkina ki'nnuwwi eese gatissakkeena lobakat hara'mmato issitakko'ookko; ihukkaarem ku bichchi eesenne afoohaare lehoommo yaa baddummi bikkina ee duu'n kolli gibaa xoreena xanoommoyyo.

²⁰An qaqqisaa gibaa xoreena xanoommi mat hoffi beero'i abbisonne yookko; ee bikkina gibaa ee beero'o maroommisa issehe; ki'nnuwwi moo'llakkamisam oo beero'i hoffane; eekke'e marumta'n i foor bichchiinsi gatookko» yukko.

²¹Waa'i asse'amaanchim «Erane, at yittisam ihona; ee at yitoo beero'o an bi'isoommoyyo.

²²Qaqissaa gibbaa xore; ee beero'o afeebe'e an maham issoommoyyo» yukko. Loox ee beero'o hoffane yaa hee'u bikkina ee beero'ik summi «Xoo'aara» yamamukko.

²³Loox Xoo'aara afukkisam eelliinchi firukko.

²⁴Waa'im Soddo'm beero'onnee Gamo'l beero'onnee giiraa aphphoo kinaa iimaniinsi ixxi beyyiinsi ga'nnisukko.

²⁵Ee'isinne ee beero'uwwa, ee beero'i hegeegonne yoo cebbi beyyuwwa, ee beyyonne hee'llam minaadabaa uullanne mutu luwwaa hundam bi'isukko.

²⁶Ihukkaarem Loox meentichcho, laso moo'llo'i bikkina sooqixxi utub ikka'a gatto'o.

²⁷Abrihaam la'm balla soodaraar daram ki'aa illageen Waa'i illagenne uullaa hee'u beyyo marukko.

²⁸Ixxim Soddomma, Gamoraa cebbi uullaa hundam aad moo'u ammanenne lob midachchiinsi firoo wirii'llisa kee'mmaalli wiriir ee beyyiinsi firukkuuyyi moo'ukko.

²⁹Loox hee'am hee'u lete'i uulli beero'uwwa Waa'i bi'isu ammane Abrihaama sawwaa Looxa bichchiinsi gatisukko.

³⁰Loox Xoo'aaranne afuureena baddu bikkina ixxi lamem landam amadaa duunanne firaa daawwa'i woronne afuurukko.

³¹Mat balla lob landichcho is aayyana «Niyyanni lomma'nnaakko; ooso qalloommisina neese massoo goon ni kululleetanne bee'e.

³²Ee bikkina waare; niyyannina woyi'n diqaasa aginsaa dimboohaare ixxenne maqire iinse'nnona; ixxeensim ooso qallona» yito'o.

³³Ee hiimom annina woyi'n diqaasa agissa'a dimbisso'o; lob landichchom waatta'a anninne maqire iinse'llo'o; ihukkaarem ixxi ise waatta'a iinse'llo'isaa ki'llo'isaa la'ukkoyyo.

³⁴La'm balla odim oo lob landichcho hoffi is aayyana «Hii'mmo'o an iyyanninne maqirem iinse'aammo; atim ixxenne maqire iinse'lleena xantoo'isina odim kaballi maaro'o niyyannina woyi'n diqaasa aginsona; ee lasage lamim niyyanniinsi ooso qalleena xannoommoo» yito'o.

³⁵Ee bikkina ee hiimo odim annina woyi'n diqaasa agissa'a dimbissa'a hoffotem matta'a anninne maqire iinse'llo'o. Looxim ise iinse'llo'isaa ki'llo'isaa la'ukkoyyi hee'ukko.

³⁶Looxik lamem landim ee'isa ihimminne ixxuwwi annina lamfoolluwwi ikko'o.

³⁷Lobotem goonchi beeto qatto'o; summam Moo'aaba[9] yita'a weeshsho'o; ixxim kaballi afeebe'e Moo'aaphphi minaadabina lobanna.

³⁸Ee'isam hoffotem goonchi beeto qatto'o; summam Beeni'amii[10] yita'a weeshsho'o; ixxim kaballi afeebe'em Amoo'n minaadabina lobanna.