Read Hadiyya Qooccanchi Kitaaba 2 Bible Online

Qooccanchi Kitaaba 2 - Hadiyya bible

Qooccanchi Kitaaba 2

¹Iimanii uullii woronne yoo luwwii hundim ee'isinne qooccamukko.

² Waa'im baxo hundam guullaa lama'l ballanne usheexxukko.

³Waa'i lama'l balla maasse'ukko; keesukkome. Mashka'oomim ixxeka qooccimmi baxo hundam ee ballanne guullaa usheexxu balli ihu bikkinatte.

⁴Ee'isinne iimanii uullii ixxuwwanne yoo luwwii hundim qooccamukko. Moollanni Waa'i iimanee uullaa qooccu ammane

⁵xeen ga'nnubee'i bikkinaa uulla baxoo mannim hee'ubee'i bikkinaa uullanne matem kaashshim hee'ukkoyyo; mutoo luwwim mutoo'n hee'ukko.

⁶Ihukkaarem wo'i uulliinsi firaa uulla aashisam hee'ukko.

⁷Ee lasage Moollanni Waa'i uulli buchchiinsi mancho baxukko; manchi sanennem foore uwwoo fooshsha ufukko; ee bikkina manchi hee'oo foor yoohan ihukko.

⁸Odim Moollanni Waa'i Eedena yakkam beyyonne eelliinchi firinne liiransoo gannatta gudisukko; baxu manchom ee liiransoo Eede'n gannattanne dissukko.

⁹Ee beyyonnem moo'akkeena liiransoo luwwaa itimmina er misha mishoo haqquwwaa mutoo'isa issukko; odim ee gannatti lambe'enne heechcha uwwoo haqqichchi hee'ukko; ee'isam eroka joriinsi annanni issakka'a la'immina lachcha uwwoo mulli haqqichchim hee'ukko.

¹⁰Ee duubbi kaashshi beyyina wo'o agisoo mat daajji Eedeniinsi daadam hee'ukko; oo daajjim Eedeniinsi firaa lasonne soor daajji ihaa baxxamamookko.

¹¹Luxxi daajjik summi Fiisoonatte; ixxim worqi hee'oo Hawiila yakkam uulli hundannem daadam hee'ukko.

¹²Ee uullannem muccur worqii odim bito xee'aalli shitto'ii bito xee'aalli kinii hee'ukko.

¹³La'm daajji summi Giiyoonatte; ixxim Tophphe'i uullanne daadam hee'ukko.

¹⁴Saxxi daajji summim Xeegiroosatte; ixxim Aasoo'l uullanne eelliinchi firoo kollonne daadam hee'ukko; soo'l daajjim Efiraaxiisatte.

¹⁵Ee lasage Moollanni Waa'i qooccu mancho Eede'n gannattanne massaa dissukko; eekkam issukkok manchi ee beyyo egeroo'isinattee axisoo'isinattee.

¹⁶Moollanni Waa'i ee manchina «Ka gannatti woronne yoo haqqi mish hundiinsim ite.

¹⁷Ihukkaarem ixxeensi ittoo balla hanqo'isam letoo bikkina erokaa joraa la'isoo haqqichchiinsi misha ittitte» yukko.

¹⁸Ee lasage Moollanni Waa'i «Manchi mullam hee'immi danaamoyyo; ee bikkina ixxo labbam dara'mmancho ixxena hara'mmitona qooccoommo» yukko.

¹⁹Moollanni Waa'im uulli buchchiinsi ki'isaa uulli moochchaa iima'n cii'aa hundam qooccukko; eehanniinsi lasage mayyaa weeshooda'e moo'eena fooraam luwwi hundam manchi beyyo eebukko; fooraam luwwi hundinam manchi summa fissukko; ixxuwwi summim ixxi fissu summam ihukko.

²⁰Manchim fooraam diinaxxeka, iima'n cii'ikaa moochchikaa hundikam summa fissukko; ihukkaarem ee kee'nnek matim manchina ixxo laboo hara'mmaanchi ihaa siidamukkoyyi hee'ukko.

²¹Ee lasage Moollanni Waa'i Addaamenne kee'mmaalli diriiro eebaa diriiru ammanenne Addaamiinsi midaaxxi miqqeewwika mato aa'aa beyyooma maarinne ifiisukko.

²²Moollanni Waa'im Addaamiinsi aa'u miqichcho meentichchotti issaa baxukko; isem Addaam beyyo eebukko.

²³Addaamim «Eese labbamote tannette ku miqichchim i miqiinsette; isek maarim siidamukkok i maariinsette; goonchiinsi siidanto'i bikkina ‹Meentichchotte› yamantona» yukko.

²⁴Ee bikkina manchi annaa amaa urookko; ixxi meentichchonnem mat ihookko; lamim mat orachchi ikkamo.

²⁵Ee ammane Addaamii ixxi meentichchoo lamim kallemaram hee'llo'o; ihukkaarem tuuttam hee'llo'oyyo.