Read Hadiyya Qooccanchi Kitaaba 20 Bible Online

Qooccanchi Kitaaba 20 - Hadiyya bible

Qooccanchi Kitaaba 20

¹Abrihaam Mammire yakkam beyyo uraa Qaadees lambe'nnee Suur lambe'ennee hee'eena Kana'aaniinsi woroo'n qaranne maraa hoffi ammaninam Geeraaranne afuurukko.

²Ee beyyonnem Abrihaam ixxi meentichcho Saara'a «Iyyaayyatte» yaa hee'u bikkina Abemeeleeka yakkam Geeraa'l uulli adil saara'i beyyo manna asse'aa weeshisaa eebukko.

³Ihukkaarem Waa'i Abemeeleekina hii'm haqaawwonne moo'amaa «Manni meentichcho eebbitti bikkina at letootto» yukko.

⁴Ihukkaarem Abemeeleek Saara'anne maqire iinse'oo'n hee'u bikkina «I moollanna an matem jollam baxummoyyo; eehannah eesee i minaadabaa bi'issoohonnihe?

⁵‹Ise, iyyaayyatte› yukkok Abrihaam ixxi gagoomame. Odim is gagam ‹Ixxi iyyabbaayyo› yito'ookko. Ise ixxi meentichchotte ikko'isa an la'ummoyyo. An kaka issummok i woda'n muccuroominnette» yukko.

⁶Waa'im ixxena haqaawwonne «At kaka ki woda'n muccuroominne issittisa an la'oommo; ee bikkina at i illagenne baaxiilo baxxoobee'isaa ise nakkitoobee'isaa hoorummo.

⁷Ihukkaarem kaba; ka meentichcho massitaa is aro'ina uwwe; mashka'oomim ixxi hiraagaancho ki bikkina Waa'a uunxukkaare at letooyyo; ihukkaarem at Saara'a ixxena dabatbeelas atii ki minaadabii hundim letakkamo» yukko.

⁸Ee bikkina adil Abemeeleek soodaraar daram ki'aa ixxi gassaano weeshaa ka woshshi hundam kurukko; oo mannim lobakata baddito'o.

⁹Ee lasage Abemeeleek Abrihaama weeshaa «Ku neesenne issitti luwwi maruchcho? Eesennee i adillanonnee ku malaayyaam hawwi afoo'isa issittok an mah jolla baxummaarette? Hore'em issimmina laboobee'i jor luwwa eesenne issitaatto» yukko.

¹⁰Odim Abemeeleek Abrihaamina «Kaka baxxittok maha sawwitaatette?» yaa xa'mmukko.

¹¹Abrihaamim «Kaka baxummi mashka'i ka beyyonne Waa'a baddookkok matim bee'eka labisaa i meentichcho massaqqeena hasoo manchi hee'ukkaare eese shookko yaa sawwummi bikkinatte.

¹²Hanqinam ise iina aayyatte; ise iyyummataneyyo bagaan iyyanni landichchotte; ihukkaarem iyyummi landichchotte ikkobee'i bikkina an ise eebummo.

¹³Ee bikkina an iyyanni miniinsi firaa mulli uulla maroommisina eese ijaaju ammane an isena ‹Neese malloommi beyyi hundannem an ixxena aayyatte yittaa'lleensi iina lobakkat luwwa issittaannisa xigoommo› yaa hee'ummo» yukko.

¹⁴Ee lasage Abemeeleek Abrihaamina Saara'a dabaraa uwwukkuuyyi gereebbaa laroo goon agidoo meenti agidoo edaa uwwukko.

¹⁵Abemeeleekim Abrihaamina «Oono'o i uulli hundim ki illaggennette; at iittitti beyyonne afuure» yukko.

¹⁶Ixxim Saara'ana «At matem jollem baxxitbee'i muccuratte ikkittisa kiinninne yoo manni hundim la'ona mare'oomina kiyyabbaayyina mat kum kin bira uwwaammo» yukko.

¹⁷Abrihaam meentichcho Saara'i mashka'inne Waa'i Abemeeleek meentichcho, ixxi agidoo oosoo qaroobee'isa alceennisaa hee'u bikkina Abrihaam ixxuwwi bikkina Waa'a uunxukko; Waa'im ixxuwwa fayyiisukko.