Read Hadiyya Qooccanchi Kitaaba 21 Bible Online

Qooccanchi Kitaaba 21 - Hadiyya bible

Qooccanchi Kitaaba 21

¹Waa'i Abrihaamina wocu neeyyaxxi saga'llisam Saara'a maasse'ukko.

²Saara'a Abrihaam lomma'nnaakkoohaannonne ixxena lamfoorette ikka'a goonchi beeto qatto'o; oo beetim Waa'i qaramookko yaa kuru ammanenne qaramukko.

³Abrihaam ixxena Saara'a qatto'i beet summa Yisaaqa[11] yaa weeshukko.

⁴Abrihaam Waa'i ijaajukkisam Yisaaqa qaramu sadeenti ballanne ballachchukko.

⁵Saara'a Yisaaqa qatto'i ammane Abrihaamik umur xibbi hiincho ihaa hee'ukko.

⁶Saara'a «Waa'i eese liiramoommisaa osaroommisaa issaakko; kaka macceesu hundim iinninne maqirem osarookko» yito'o.

⁷Odim edda'a « ‹Saara'a Abrihaamina ooso qatta'a iicissamo› yaa kuroo manchi ayyi hee'ukko? Ihukkaarem kaba oono'o ixxi lomma'nnaakkoohaannonne an ixxena goonchi beeto qaraammo» yito'o.

⁸Ciilichchim li'aa anuuna urukko; Abrihaamim ciilichchi anuuna uru balla lobakat maadda gudisukko.

⁹Mat ayyaamo Gibxi uulliinsi Waatto'i Aggaare Abrihaamina qatto'i beet Isma'eel Saara'i beet Yisaaqinne lellukkuuyyi Saara'a moo'llo'o.

¹⁰Saara'a eekka moo'llo'i ammanenne Abrihaamina «Ku agishshi beet Yisaaqinne maqire ki luwwika ma'lluchchom lago aa'oobee'isa amaa beetoo miniinsi qeesse yito'o.

¹¹Isma'eelim Abrihaamina qachchi hee'u bikkina oo woshshi ixxo lobakata kichche'isukko.

¹²Ihukkaarem Waa'i Abrihaamina «Ki beet bikkinaa ki agishshi bikkinaa hawwititte; Saara'a kiina yito'i luwwi hundam isse; mashka'oomim an kiina hide'ummi shumo'o siiddoottok Yisaaqiinsette.

¹³Ki agishshi beetim ki qachchi ihu bikkina dut ooso uwwoommo; ixxuwwim minaadab ikkamo» yukko.

¹⁴Ee lasage Abrihaam la'm balla soodaraar daram ki'aa hurbaataa cananne wo'o wonshaatii uwwukko; ixxim is afarenne ciila iyyiisaa geegeesukko; isem annanni ikka'a matta'a Bersaabe'i udma'anne jaljallitam hee'llo'o.

¹⁵Odim cananne amaddo'i wo'i beeddu ammanenne is ciilichcho mat shifanne ubbuusso'o.

¹⁶Isem «I ciil lehukkuuyyi moo'oommoyyo» yita'a ciilichchiinsi annanni ikka'a mat xibbi meetira qee'llita'a ixxi xabbeenanne matta'a afuutto'o; isem sagara iimaa'lla'a wi'llitto'o.

¹⁷Waa'im ee ciilichchi laachcha macceesukko; ee ammanem Waa'i asse'amaanchi Aggaarena «Aggaare, maha ikkaate? Waa'i ciilichchika laachcha macceesaakkoo bikkina baddititte.

¹⁸Ki'llaa mattaa ciilichcho ki'issaa amade; ixxi shumo'o an lobakat minaadab issoommo» yukko.

¹⁹Ee lasage Waa'i Aggaareka ille fooqaa'ukko; isem wo'i bare moo'lla'a matta'a wo'o cananne wonshita'a inkiitta'a ciilina agisso'o.

²⁰Beetim li'ukkuuyyi Waa'i ixxenne maqire hee'ukko; Ixxim Faaraa'n udma'i uullanne hee'ukkuuyyi qoxar hochchaanchi ihukko.

²¹Ixxim amam Gibxi uulliinsi mat landichcho ixxena xeekka'a eebbo'o.

²²Ee ammane Abemeeleek ixxi gaadaano ijaajoo Filkoolinne maqirem Abrihaam beyyo Waaraa «At issitti luwwi hundannem Waa'i kiinninnette.

²³Ee bikkina kaba Waa'i illaggenne iinaa i oosinaa te'im i shumo'inaa hundinam ‹Jora issoommoyyo› yitaa hide'e. Ihukkaarem an kiina eroomma issummisam atim iinaa waaraanchoominne hee'lloo ka uullinaa eroomma issiteena hide'e» yukko.

²⁴Abrihaamim «Ihona, hide'oommo» yaa dabarukko.

²⁵Abrihaamim Abemeeleek awwaadaan hootto'i ba'l wo'i mashka'inne Abemeeleeka gadisukko.

²⁶Abemeeleekim dabaraa «At kaballi afeebe'e ka woshsha iina kuttitbee'i bikkina ka woshsha macceesimmina iina luxxi ballame; kaka ayyi issuda'e an la'ummoyyo» yukko.

²⁷Abrihaamim Abemeeleekina gereebbikaa la'llekaa uwwukko; ee lasage lamem mannim hide'anto'o.

²⁸Abrihaamim ixxi gereebbi allaachchiinsi lamar geexxuwwi gereebba doo'llaa annanni issukko.

²⁹Abemeeleekim «Ku annanni issitaa uullissitti lamarem gereebbi geexxuwwim maruwwa?» yukko.

³⁰Abrihaamim «An ka wo'i bare hinummisina naqaash ihoo'isina ka lamarem gereebbi geexxuwwam i angiinsi aa'llootto» yukko.

³¹Lamem manchim ee beyyonne hidiro aaggo'i bikkina oo beyyi Bersaabe'e yamamukko.

³²Ixxuwwi lamim Bersaabe'enne hide'anta'a lasage Abemeeleekii ixxi gogoxxi awwonsaanchi Fiikoolii Filisxee'm uulla daba'llito'o.

³³Abrihaam Bersaabe'enne [12]tamaariska yakkam haqqichcho kaasukko; ee beyyonnem heer heerina hee'oo Moollanni Waa'ina otossukko.

³⁴Abrihaamim lobakat balla Filisxee'm uullanne hee'ukko.