Read Hadiyya Qooccanchi Kitaaba 22 Bible Online

Qooccanchi Kitaaba 22 - Hadiyya bible

Qooccanchi Kitaaba 22

¹Mat qax balliinsi lasage Waa'i Abrihaama keenukko; ixxim «Abrihaama» yaa weeshukko; Abrihaamim «Yee!» yukko.

²Waa'im Abrihaamina «Lobakata iittitoo ki matem beeto Yisaaqa amaddaa Moore'i uulla mare; eekke'enne an moo'isoommi duunanne iina kitim issitaa hincaa'e» yukko.

³Abrihaamim la'm balla soodaraar daram ki'aa kitima hincaa'oo haqqa anaa hallichchonne iyyiisukko; ixxi beet Yisaaqaa ixxi awwaadaa'nneka lamoo amadaa Waa'i mare yu beyyo marukko.

⁴Saxxi ayyaamonne Abrihaam Waa'i yu beyyo qee'llonne asi'mmaa moo'ukko.

⁵Ee lasage ixxi awwaadaanina «Ki'nnuwwi hallichchinnem keyye egellehe; anii i beetii ekke'e mallaa Waa'ina otossinaa daba'llinaa waalloommo» yukko.

⁶Abrihaam kitima shokkiisoo haqqa ki'isaa ixxi beet Yisaaqanne iyyiisukko; ixxim maqulantaa giiraa amadaa ixxi awwaadaaniinsi annanni ikka'a lamim maqirem matto'o.

⁷Mattu'uuyyim Yisaaq annina «Abba!» yukko. Abrihaamim «Yee!» yukko. Yisaaqim «Kitima shokkiinsoommi haqqaa giiraa amandaammo; ihukkaarem kiti'm gereechchi hannonnette?» yaa xa'mmukko.

⁸Abrihaamim i beeto, «Kiti'm gereechcho Waa'i gudisookko» yukko. Ee lasage lamim maqirem matto'o.

⁹Ixxuwwim Waa'i Abrihaamina kuru beyyo affa'a lasage Abrihaam Waa'ina kitimoo beyyo axisukko; eehanni hanennem gii'l haqqa gudisaa edukko. Ee lasage ixxi beeto Yisaaqa karaa kiti'm beyyonne gudisu haqqi hanenne ubbuusukko.

¹⁰Ee lasage ixxi beeto dureena maqulanta ki'isukko.

¹¹Ihukkaarem Waa'i asse'amaanchi iimaniinsi «Abrihaama, Abrihaama» yaa weeshukko; Abrihaamim «Yee!» yukko.

¹²Ixxim «Beeto nakkititte; ixxonnem matem luwwam issititte; kiikka matem beeto iina uwwiteena qishixxitbee'i bikkina at hanqinam Waa'a badditoo'isa an kaba la'aammo» yukko.

¹³Abrihaamim qerephaa moo'u ammanenne mat gereechchi ambul shifanne buud xudinne xaxamaa karamaakkoo moo'ukko; ixxim maraa ee ambula eebaa ixxi beet Yisaaq bikkenne kitim issaa hincaa'ukko.

¹⁴Ee bikkina Abrihaam ee beyyo «Waa'i gudisookko» yaa weeshukko; oo beyyim kaballi afeebe'em «Waa'i duunanne gudisookko» yamamaakko.

¹⁵Waa'i asse'amaanchi la'mmaaggem iimaniinsi Abrihaama weeshaa

¹⁶Waa'i ‹Iina kaka issitti bikkinaa kiikka matem beetom iina hootbee'i bikkinaa lobakat maasso kiina uwweena i gaganne hide'aammo› yoolla.

¹⁷Hanqoomam an keese maasse'oommo; ki shumo'om iima'n boollaankisaa wo'i woro'l shashsha'llisaa dutisoommo; ki shumo'im ixxuwwi diina'ika beero'uwwa lago aa'llamo.

¹⁸At iina ijaajantitti bikkina uulli minaadab hundim ki shumo'inne masse'amookko» yukko.

¹⁹Ee lasage Abrihaam ixxi awwaadaan beyyo daba'llaa ixxuwwinne maqirem Bersaabe'e marukko; ixxim ee beyyonne afuurukko.

²⁰Ee lasage Miilka'a ixxi abbaayyi Naakoorina sadeenti ooso qatto'isa Abrihaamina kurakko'o.

²¹Ee oosikim summi wonik Uuxatte; ixxi abbaayyikim Buuzattee Araama qaru Qamu'eelattee.

²²Keesadatte, Hazo'otte, Fiildaashatte, Yidlaafattee Batu'eelattee hee'llkko.

²³Batu'eelim Irbiqa qarukko; ka sadeentem goo'n oosom Miilka'a Abrihaam abbaayyina Naakoorina qatto'o.

²⁴Naakoorina Ira'uuma yakkam bakki meentichcho hee'llo'o; isem Naakoorina Xeebaha, Gahama, Tahashaa Ma'ikkaa soorem oosom qatto'o.