Read Hadiyya Qooccanchi Kitaaba 23 Bible Online

Qooccanchi Kitaaba 23 - Hadiyya bible

Qooccanchi Kitaaba 23

¹Saara'a mat xibbee lamiyyee lamar hiinchoo hee'lla'a lasage

²Kana'aa'n uullanne yoo Qiiriyaat Arba'anne Keebiroo'n beero'onne leto'o; Abrihaamim ise leto'i bikkina lobakata kichche'aa wi'llukko.

³Ee lasage Abrihaam ixxi meentichchi leesh gadanonne afuuru beyyiinsi ki'aa Hiite'i manni beyyo maraa

⁴«An ki'nnuwwi lambe'enne ammanina koyyinano afuuraammoo waaraancho; ki'nnuwwi uulliinsi i meentichcho waammoommi beyyo iina biteessehe» yukko.

⁵Hiite'i mannim Abrihaamina dabatta'a

⁶«Ni moollanna macceese; at ni lambe'enne lob malaayyaam gassaanchisa; neese waamminoommi beyyuwwiinsi doo'llitti er beyyonne ki meentichcho waamme; neese hundim ki meentichchoka leesha waammitoo beyyo uwwineena liirammoommo» yito'o.

⁷Ee lasage Abrihaam ee uullanne hee'llam hee'llo'i Hiite'i manni illagenne iimaa heeshukko.

⁸Ixxuwwinam «An i meentichcho keyye waammona uwwitakko'aa'lleensi Xoo'aar beeto Efiroona xa'mmitakkona uunxoommo.

⁹Ixxi wix uulli tochchonne yoo Maakfeela yakkam daawwa'a biteesona xa'mmehe. Oo beyyi iina waammi beyyi ihona ki'nnuwwi illagenne wo'm bito miqaa bitaa'oommisa issehe» yukko.

¹⁰Efroonim beero'o aagakkam gooc gadanonne yoo dummakkam nafaranne mulli Hiite'i manninne maqirem afuuraa hee'ukko; ixxim ee beyyonne yo'i manni hundim macceessukkuuyyi

¹¹«I moollanna macceese; abuulli uullaa abuulli uulli gadanonne yoo daawwa'aa ka i moolli illagenne kiina an uwwaammo; ee bikkina leesha waamme» yukko.

¹²Ihukkaarem Abrihaam Hiite'i manni illagenne odim heeshaa xummaatisaa

¹³manni hundim macceesukkuuyyim Efroonina «An keese mat luwwa xa'mmoommo macceese; an abuulli uulli hundam bitaa'oommo; an kiina miqoommoka aa'e; anim i meentichchi leesha ee beyyonne waammoommo» yukko.

¹⁴Efroonim dabaraa

¹⁵«I moollanna macceese; uulli fissoo bit xale'i soor xibbi bira; oohim i lambe'ennee ki lambe'ennee mahayyome; leeshooma waamme» yukko.

¹⁶Ee ammanenne Abrihaam Efroonii Hiite'i mannii macceessonam kuru qax bito iittaa soorem xibbi kin biram daddaraan keenoo keennaanchonne keenaa uwwukko.

¹⁷Ee'isinne Maammire yakkam beyyiinsi eelliinchi firoo kollinne yoo Maakfeelanne Efroonina hee'u abuulli uulla, ee beyyonne hee'u daawwa'aa ixxi kululleetannem yoo haqqaa hundam edaa Abrihaam bitaa'ukko.

¹⁸Oo beyyi Abrihaaman ihukkisina ee dummichchanne hee'llo'i Hiite'i mannii ee beero'i goocinne higgam keenii hundim naqaashshuwwi hee'llo'o.

¹⁹Ee lasage Abrihaam Keebiroonanne Maammire'i gadanonne Kana'aa'n uullanne Maakfee'l daawwa'anne ixxi meentichcho Saara'a waammukko.

²⁰Ee'isinne Abrihaam Hiite'i manni abuullanne yoo daawwa'a ixxi gaqqi waammi beyyi issukko.