Read Hadiyya Qooccanchi Kitaaba 26 Bible Online

Qooccanchi Kitaaba 26 - Hadiyya bible

Qooccanchi Kitaaba 26

¹Gaassi Abrihaam doollenne ihukkisam odim mat ammane qoxxaalli qaanne'i ee uullannem ihukko. Ee bikkina Yisaaq Filisxee'm adil Abemeeleek beyyo Geeraara marukko.

²Ee doollenne qaanne'i uullanne aagukkuuyyi Yisaaqina Waa'i moo'amaa «An afuure yaa kurummi uullanne afuure bagaan Gibxi uulla mattitte.

³Ka uullanne afuure; an kiinninne maqir ihoommo; keesem maasse'oommo; ka uulla hundam kiinaa ki shumo'inaa uwwoommo; an kiyyanni Abrihaamina hide'ummi hidiro kiina wonshoommo.

⁴Ki shumo'om iima'n boollaankisa dutisoommo; uulli hundam ki shumo'ina uwwoommo; ka uulli minaadab hundim ki shumo'inne maasse'amookko. Abrihaam iina ijaajamu bikkinaa i seeram mat luwwam gindoo'n egeru bikkinaa an keese maasse'oommo» yukko.

⁶Ee bikkina Yisaaq geeraaranne afuurukko.

⁷Mat ayyaamo Geeraa'l manni ixxi meentichchi bikkina xa'mmito'o. Ixxim «I meentichchotte» yaa kurimma baddu bikkina «Ise iyyaayyatte» yukko. Mashka'oomim Irbiqa lobakata danaam meentichchotte hee'llo'i bikkina ee beyyi manni ise massaqqeena «Eese shookko» yaa sawwu bikkinatte hee'ukko.

⁸Lobakat balliinsi lasage mat ayyaamo Filisxee'm adil Abemeeleek Yisaaq ixxi arenne Irbiqanne gurubukkuuyyi maskootinne moo'ukko.

⁹Ee bikkina Abemeeleek Yisaaq beyyo manna asse'aa «Ise ki arette; mahina ise ‹Iyyaayyatte› yitto?» yaa xa'mmukko. Yisaaqim «Ise i arette yaa kurummaare eese shakkamo yaa baddummi bikkinatte» yaa dabarukko.

¹⁰Abemeeleekim «Kido'i jor luwwa neesenne mahina baxxitto? Ki arenne ni mannik mat iinse'aakkoohan ihuta'n Waa'i illagenne baaxiilo neesenne eebbaa hee'llitto» yukko.

¹¹Ee mashka'inne Abemeeleek ixxi manni hundinam «Ka mancho te'im ka manchi meentichcho nakkukkok lehookko» yaa ijaajukko.

¹²Ee maarage Yisaaq ee uullanne wixaa xibbi qinxit atoota aagisukko. Moollannim ixxo lobakata maasse'aa hee'ukko.

¹³Ixxim lobakata goddaanchi manchi iheebe'i afeebe'e goddukkuuyyi marukko.

¹⁴Ixxenam dut gereebbii la'l allaachchii odim dut agidim hee'ukko. Filisxee'm uulli manni eekka moo'lla'a to'achchito'o.

¹⁵Ee bikkina ixxi anni Abrihaam foorinne hee'ukkuuyyi ixxi agidinne hinsiisaa hee'u wo'i bare Filisxee'm manni buchcha dabatta'a ifiisso'o.

¹⁶Ee ammane Abemeeleek Yisaaqina «Kaba at niinniinsi malaayyaam ikkaatto; ni uulliinsi fittaa mare» yukko.

¹⁷Ee bikkina Yisaaq ua maraa Geeraa'l lete'i cebbanne ammanina afuurukko.

¹⁸Abrihaam foorinne hee'ukkuuyyi hinsiisaa hee'u wo'i balleewwa Filisxee'm uulli manni Abrihaam lehaa lasage ifiissa'a hee'llo'i bikkina Yisaaq odim hinsiisaa fooqaa'isukko; ixxi anni Abrihaam weesham hee'u summannem weeshukko.

¹⁹Yisaaq awwaadaanim cebbi beyyo hinta'a bu'o siiddo'o.

²⁰Ee ammane Geeraa'l uulli manni diinate allaaraan Yisaaq diinate allaaraanina «Ku wo'i niihane» yita'a wocanto'o. Ee bikkina Yisaaq ee ba'l wo'o «O'l bu'o» yaa weeshukko.

²¹Ee lasage Yisaaq awwaadaan mulli wo'i bare hinto'o. Ihukkaarem ee uulli manni odim wocanto'o fissito'o. Ee bikkina Yisaaq ixxi summam «Maso'ooma» yaa weeshukko.

²²Ee lasage Yisaaq ee beyyiinsi ki'aa mulli bare hinukko. Ihukkaarem ixxonne ee beyyi manni woca fissubee'i bikkina ee wo'i ba'l summa «Kabada'i Moollanni ka beyyonne neese hee'nnoommisina gada'a uwwaakko; odim ka beyyonnem neese biddiqinaa er heechcha hee'nnoommo» yaa «Haraar beyyo» yaa weeshukko.

²³Ee lasage Yisaaq ee beyyiinsi ki'aa Beersaabe'e marukko.

²⁴Ee hiimonnem Moollanni Yisaaq beyyo waaraa «An kiyyanni Abrihaam Waa'a! At baddititte; an kiinninne maqirette; an keese maasse'oommo; eese awwonam hee'u Abrihaam bikkina ki shumo'om fikkaansoommo» yukko.

²⁵Ee bikkina Yisaaq kitimohineaa'oo beyyo axisaa Moollanni Waa'ina otossukko. Ee beyyonnem dukkaana kaasaa ixxi gatti beyyo axisukko. Odim Yisaaq awwaadaan mulli wo'i barem hinto'o.

²⁶Mat ayyaamo Abemeeleek ixxi suu'mmanchi Ahuzaatinnee gaadaano ijaajaanchi Filkoolinnee Geeraariinsi ki'aa Beersaabe'e waaraa Yisaaqinne edamukko.

²⁷Yisaaqim ixxuwwa moo'u ammane «I beyyo waattakko'ok mahinatte? Kinnuwwi woddallam eese allagoonsittakka'a ki'nnuwwi uullanne hee'oombee'isa hollitakko'oyyonnihe?» yaa xa'mmukko.

²⁸Ixxuwwim «Hanqinam Moollanni kiinninne maqire yoo'isa moo'nnummi bikkina neese ki lambe'ennee ni lambe'ennee hidir hee'ona hansaa waallaammo; at niinninne hidiro aaggona hansoommo; neese keesenne matem jollem issinoo'nnim xumminnem geegeensummisam atim neesenne matem jollem issitoobee'isina hide'e; hanqinam Moollanni keese maasse'ukkisa neese qoossinaa lanqaammo» neese kiina hundi ammanem eroomma issinummo bagaan jora issinummoyyo» yito'o.

³⁰Ee lasage Yisaaq ixxuwwina maadda gudisukkaare itta'a aggo'o.

³¹Ixxuwwim la'm balla soodaraar daram ki'lla'a ixxuwwina'i ixxuwwim hide'anto'o; ee lasage Yisaaq fissaa geegeesukkaare xummam elle'llo'o.

³²Ee ayyaamom Yisaaq baxaan ixxi beyyo waatta'a hinto'i barenne wo'o siiddo'isa kutto'o.

³³Ee bikkina Yisaaq ee wo'i bare «Hidiro» yaa weeshukko. Ee beero'i summim kaballi afeebe'e Beersaabe'e yamamookko.

³⁴Eesa'ak umur sor hiincho ihaakkoohaannonne Heetekkichchi Bi'eer landichcho Yoodiitee odim Iloon landichcho Beesmaatee eebukko.

³⁵Ixxuwwim Yisaaqikaa Irbiqakaa heechcha qaraassito'o.