Read Hadiyya Qooccanchi Kitaaba 27 Bible Online

Qooccanchi Kitaaba 27 - Hadiyya bible

Qooccanchi Kitaaba 27

¹Yisaaq lomma'nnu bikkina illi jaamaa hee'ukko; ixxi won beeto Eesa'a «I beeto» yaa weeshukko. Ixxim «Yee!» yukko.

²Ixxim «Oono'o, an lomma'nnaammo; hinki balla lehoomda'e la'oommoyyo.

³Ee bikkina kaba ki hochchi mu'uta bagadoo xiyyaa amaddaa hochcha mattaa iina maara eebe.

⁴Ixxom massitaa an iitoomisa xee'aalli hurbaata sattaa eebe; anim ixxo ittaa lasage lehoo'n kiina lasaanchi maasso uwwoommoo» yukko.

⁵Yisaaq ixxi beet Eesa'ana wocam hee'u ammane Irbiqa macceessam hee'llo'o; Eesa'am hochchaa maara ebeena haqqoro marukko.

⁶Irbiqam matta'a Yaaqoobina «Oono's kiyyanni kiyyabbaayyi Eesa'ana Hochcha mattaa maara eebbaa an lehoo'n itaa Waa'i illagenne keese maasse'oommisina xee'aalli hurbaata gudise» yukkuuyyi macceesaammo.

⁸Ee bikkina i beeto kaba an keese ijaajoommi ijaajo macceessaa ijaajame.

⁹Allaachcha mattaa lam xaboot danaam fella'i geexxuwwa iina eebe; ixxuwwam an kiyyanni iittoo'isa issaa xee'isaa saroommo.

¹⁰Kiyyanni lehoo'n gaassaa ee hurbaata itaa keese maasse'ona kiyyanni beyyo amaddaa aaggootto yito'o.

¹¹Ihukkaarem Yaaqoob eekka macceesaa lasage ixxi amana «Iyyabbaayyi Eesa'a oddaam mancho; ihukkaarem i orachchi muruga.

¹²Ayyi la'ukko iyyanni eese amadaa an ixxo qawwiisummisa la'ulas maassi ihoo'n duuncha i gaganne eebaqqoommo» yukko.

¹³Ixxi amam ixxena «I beeto macceese; oo at duumantoo duunchi i gaganne ihona; xale'i i sagara macceessaa mattaa ixxuwwa iina eebe» yito'o.

¹⁴Ee bikkina maraa ee geexxuwwa eebukko. Ixxi amam ee keeno aa'lla'a ixxi anni iittoo'isa issita'a xee'aalli hurbaata gudisso'o.

¹⁵Odim Irbiqa is won beetika Eesa'aka minenne hee'u danaam eddechcha aa'lla'a is hoffi beetina Yaaqoobina eddeesso'o.

¹⁶Odim ee geexxuwwi omaddam ixxi murug angannee gaanjennee katto'o.

¹⁷Eehid issita'a lasage annina gudisso'i xee'aalli hooshechchaa daabbo'oo massita'a Yaaqoob anganne uwwito'o.

¹⁸Ee lasage ixxim ee hurbaata amadaa ixxi anni beyyo aagaa «Abba!» yukko. Ixxim «Yee! An keyye yoommo; at ayyette?» yukko.

¹⁹Yaaqoobim ixxi annina dabaraa «An ki won beet Eesa'atte; at eese ijaajjittisa issaammo; kaba iimitaa afuure an kiina hochchaa shaa eebummi maara eese maasse'lleena ite» yukko.

²⁰Ihukkaarem Yisaaq ixxi beetina «I beeto hinkid qaqqisom siidditto?» yukko. Ixxim «Ki Moollanni Waa'i iina hara'mmu bikkina siidummo» yukko.

²¹Ee lasage Yisaaq Yaaqoobina «I Beeto; at hanqinam i beet Eesa'atda'e te'im mullanda'e ikkittisa an keese amadaa la'oommo huno'o eesenne hincihe» yukko.

²²Ee ammanenne Yaaqoob ixxi anni Yisaaq gadanonne hincukko; ixxi annim ixxi orachcho amadukkisam «Sagaroom Yaaqoob sagara laboolla; ihukkaarem anguwwi Eesa'ane» yukko.

²³Yaaqoob angi Eesa'aannisam oddaam ihu bikkina ixxotti ihukkisa la'ukkoyyo. Ee bikkina Yaaqooba maasse'ukko.

²⁴Maasse'ukkuuyyim Yaaqoobina «At hanqinam i beet Eesa'attennihe?» yukko. Ixxim «Anetteme» yukko.

²⁵Ee lasage ixxim «Hochchitaa eebbaa gudissitti hurbaata iina eebe anim itaa lasage maasse'oommo» yukko. Yaaqoobim gudisu hurbaata annina itona uwwukko; ixxim itukko. Odim ixxena agoo woyi'n diqaasa uwwukko ixxim agukko.

²⁶Ee lasage ixxi anni Yisaaq ixxena «I beeto, eesenne hincitaa suunqe» yukko.

²⁷Yaaqoobim ixxi anna hincaa suunqukko. Ixxi annim ixxi eddechchi enja enjeesaa «Moo'llehe, i beet enji Waa'i maasse'u mishaam abuulli enjisa;

²⁸Waa'i kiina iimaniinsi xeena er uullika lobakat wix hurbaa xxi atootaa odim woyi'n diqaas atootaa uwwona.

²⁹Minaadab kiina ijaajamonaa heeshihonaa; kiyyabbaayyuwwina gassaanchi ihe; kiyyummi oosim kiina heeshihona; keese duumookkok duumamaakkoohan ihona. Odim keese maasse'ookkok maasse'amaakkoohan ihona» yaa maasse'ukko.

³⁰Yisaaq Yaaqooba maasse'aa guullaa lasage Yaaqoob ixxi anni beyyiinsi firaa marukkisam ixxi abbaayyi Eesa'a hochchiinsi waarukko.

³¹Ixxim odim xee'aalli hurbaata gudisaa ixxi annina eebukko. Ixxim ixxi annina «Iyyanna, huno'o ki'e; ki beet an kiina eebummi maa'lleka ittaa eese maasse'e» yukko.

³²Yisaaqim «At ayyette?» yaa xa'mmukko. Ixxim «An ki won beet Eesa'atte» yaa dabarukko.

³³Ee ammanenne Yisaaq lobakata muggaa huxe'ukkuuyyi «At waatteena illakkichcho iina hochchi maara eebukkaare an itaa maasse'ummok ayyette? Ixxi maasse'amaakkoohan ihaa hee'ookko» yukko.

³⁴Ee ammanenne Eesa'a ixxi anni sagara macceesaa lasage sagara fissaa qaraaraallisa wi'llukkuuyyi ixxi annina «Iyyanna, odim iinam ki maassika uwwe» yukko.

³⁵Ihukkaarem Yisaaq «Kiyyabbaayyi waaraa eese qawwiisaa ki maasso massaqqaakko» yukko.

³⁶Eesa'am «Hanqinam ixxi summi Yaaqooba[14] yamamaakko. Ixxi eese qawwiisimmina kuk la'mmane. Ixxi i wonooma massukko; kabadem odim i maasso massaqqukko; iina od maasso gatissittoyyonnihe?» yukko.

³⁷Yisaaq Eesa'ana «Oono'o, ixxo ki moollanni issaammo. Ixxi abbaayyuwwi hundim ixxena ijaajantamisa issaammo; ixxena hurbaatii woyi'n diqaasii atootoo'isa maasse'aammo; eehaare i beeto an kiina maha isseena xanoommo?» yukko.

³⁸Eesa'am ixxi annina «Iyyanna, kiina yookkok xale'i matem maassonnihe? Eesem odim maasse'e» yaa sagara fissaa wi'llukko.

³⁹Ee ammanenne ixxi anni Yisaaq ixxena «Er uulliinsi qee'llitaa udma'anne hee'llootto; odim kiina iima'n xeen hee'ooyyo.

⁴⁰At bagadinne hee'llootto; kiyyabbaayyinam ijaajantootto; ihukkaarem ijaajancha sabboo ammane ki gaanjenne hee'u ixxi gaanjaqqa iiqqootto» yukko.

⁴¹Ee ammaniinsi ki'isaa Eesa'a ixxi anni Yaaqooba maasse'u bikkina Yaaqoobanne baado amadukko. Eesa'a ixxi wodanonne «Iyyanni lehoohaare wi'lloommi amman hincaakko; ee lasage iyyabbaayyi Yaaqooba shoommo» yukko.

⁴²Ihukkaarem Irbiqa is won beet sawwukkoka laqqa'a is hoffi beeto Yaaqooba weeshissa'a «Macceese! Kiyyabbaayyi Eesa'a keese sheena hasoolla.

⁴³Ee bikkina i beeto, kabadem an keese sogoommoka macceese; ki'llaa iyyabbaayyi Laaba'i beyyo Kaaraana gibe.

⁴⁴Hofqax ammanem kiyyabbaayyi quunqi billeebe'e ixxi beyyonne afuure.

⁴⁵Kiyyabbaayyi quunqi billaa ixxim at issitti luwwa xadoo ammane keese dabaraa worookkoka asse'oommo; matem ballannem lamem oosom mahina hoogoommo?» yito'o.

⁴⁶Irbiqa Yisaaqina «Ku Eesa'a Hiite'i manniinsi eebu meenti eese hawwisu bikkina an lobakata jabbaammo; odim Yaaqoob ka Hiite'i manniinsi landa eeboohaanniinsi lehumta'n erane» yito'o.