Read Hadiyya Qooccanchi Kitaaba 28 Bible Online

Qooccanchi Kitaaba 28 - Hadiyya bible

Qooccanchi Kitaaba 28

¹Yisaaqim Yaaqooba weeshisaa maasse'aa lasage «At Kana'aa'n uulli landa eebbitte.

²Ki'llaa Masphexoome'enne hee'oo kiyyummi anni Baatu'eel mi'n beyyo mare; ee beyyiinsi ki eeshimmi Laaba'i landika mato eebe.

³Hundam xanoo Waa'i keese maasse'ona; odim mishaam issonaa fikkaannisonaa. Keese dut minaadabina anni issona.

⁴Waa'i Abrihaama maasse'ukkisam keesee ki shumo'oo maasse'ona; ka at koyyinanonne hee'llitti uulla Waa'i Abrihaamina uwwukkoka at lagaallo'isa issona» yaa ijaajukko.

⁵Ee'isa yaa Yisaaq Yaaqooba asse'ukko; ixxim Yaaqoobinaa Eesa'anaa ama Irbiqana abbaayyi ihu Sooriy uulli manchi Baatu'eel beet Laaba'a hee'oo beyyo lam daajji lambe'e marukko.

⁶Eesa'a Yisaaq Yaaqooba maasse'ukkisa, Masphexoome'iinsi meento eebeena marona asse'ukkisaa odim «Kana'aa'n landiinsi meento eebbitte» yaa ijaajukkisaa macceesukko.

⁷Odim Yaaqoobim ixxi anninaa amanaa ijaajamaa Masphexoome'e marukkisa Eesa'a macceesukko.

⁸Kana'aa'n meenti ixxi anni Yisaaqina liiransubee'isa Eesa'a la'ukko.

⁹Ee bikkina Abrihaam beet hee'u Isma'eel beyyo maraa ixxi landichchotte hee'llo'i Maahileeta illageen hee'u meentinne maqirem aretti ikkona eebukko. Isem Nabaayoot aayyatte hee'llo'o.

¹⁰Yaaqoobim Beersaabe'e uraa Kaaraana marukko.

¹¹Ixxim marukkuuyyi mat beyyo afu ammanenne eelliinchi aagaa hiimukko. Ee bikkina ee hiimo ee beyyonne gareena kina bakke'aa iinise'ukko.

¹²Ixxim haqaawwonne uullanne kaaxxaa lud iimane afaakkoo masalaala moo'ukko; ixxonnem Waa'i asse'amaan iimii aadii daba'llantam hee'llo'o.

¹³Ixxim Waa'i ixxi bakkonne uullukkisa moo'ukko; Moollannim ixxena «Kiyyanni Abrihaaminaa Yisaaqinaa Waa'i anette; ka at iinse'llitti uulla kiinaa ki shumo'inaa an uwwoommo.

¹⁴Odim ki shumo'o uulli shashsha'llisa fikkaannisoommo; atim eelliinchi aagoo kollonnee firoo kollonnee woroo'n qarannee hanaa'n qarannee afeebe'e binnitaa haraattoottoo kiinninnee ki shumo'innee uulli minaadaba hundam maasse'oommo.

¹⁵Kiinninne maqire ihoommo; odim at mattoo beyyi hundannem keese egeroommo; ka uullam keese dabaraa woroommo; an kiina kurummoka hundam isseembe'e keese uroommoyyo» yukko.

¹⁶Ee lasage Yaaqoob diriiriinsi baqaa «Hanqinam Waa'i ka beyyonnette; ixxi ka beyyonnetti ihukkisa an la'ummoyyi hee'ukko» yukko.

¹⁷Ixxim lobakata baddaa hee'u bikkina «Ku beyyi hinkaa'nna baddisoolla; ku beyyi Keesammi Mine bagaan mullaneyyo; kuk iima'n gooc fooqaakkoo beyyo» yukko.

¹⁸Yaaqoob soodaraarom ki'aa bakke'aa hee'u kina ki'isaa utuphphisa uullisukko; ixxi ludonnem wee'l zayta dunukko.

¹⁹Ixxim ee beyyi summa «Beeteela» yaa weeshukko. Illageen ee beyyi summi «Looza» yakkaman hee'ukko.

²⁰Yaaqoobim Waa'ina «Waa'i iinninne maqir ihulas, ka an maroommi googonne egerulas, itoommi hurbaataa ede'oommi eddechchaa uwwulasii

²¹iyyanni minem xumminne daba'llumlasii Moollanni iina Waa'i ihookko.

²²Odim ku utuphphisa uullisummi kin Waa'i min ihookko; at iina uwwitti luwwi hundiinsim tommiinsi mato kiina uwwoommo» yaa hide'ukko.