Read Hadiyya Qooccanchi Kitaaba 29 Bible Online

Qooccanchi Kitaaba 29 - Hadiyya bible

Qooccanchi Kitaaba 29

¹Ee lasage Yaaqoob ki'aa eelliinchi firoo kolli manni uulla marukko.

²Ixxim dangonnem biir beyyonne mat wo'i bare moo'ukko; ee beyyonnem sas murat gereebbi ba'l gadanonne hee'ukko; ee wo'i bariinsim wo'o agam hee'ukko; wo'i ba'l suumennem geejji kin hee'ukko.

³Gereebbi allaachchi hundim ee beyyonne wixxoo ammane allaaraan wo'i ba'l suumiinsi kina hootta'a gereebbina agissa'a wo'i bare dabatta'a ifiissam hee'llo'o.

⁴Yaaqoobim ixxuwwina «Iyyabbaayyuwwa, ki'nnuwwi hanniinsette?» yaa allaaraano xa'mmukko; ixxuwwim «Neese Kaaraaniinsette» yita'a dabatto'o.

⁵Ixxim «Naakoor beet Laaba'a laqqakkamonnihe?» yaa xa'mmukko. «Eeyya, neese lanqoommo» yito'o.

⁶Ixxim «Ixxi xummannihe?» yaa xa'mmukko; ixxuwwim «Eeyya, ixxi xumma» yita'a lasage «Oono'o, ixxi landichcho Raaheelem ixxi gereebba amadda'a keyye waattamuulla moo'e» yito'o.

⁷Yaaqoobim «Kuk diinate wixxaa'akkam ammaneyyo; uulli ballame; kabadem gereebba wo'o agissakka'a itoo beyyo massehe» yukko.

⁸Ihukkaarem ixxuwwi «Diinat hundim wixxoo'nnii wo'i ba'l suumenne ifiisamu kin fooqoo'nnii gereebbina wo'o aginseena xannoommoyyo» yito'o.

⁹Yaaqoob ixxuwwinne wocukkuuyyim Raaheele is anni gereebba ushe'llu'uuyyi ee beyyo affo'o; isem gereebba allaaraanchotte hee'llo'o.

¹⁰Yaaqoobim ixxi eeshimmi Laaba'i landichchoo ixxi gereebbaa moo'u ammanenne wo'i ba'l beyyo maraa kina onkoroollisaa Laaba'i gereebbina wo'o agisukko.

¹¹Ixxim ee lasage Raaheele suunqukko; lobakata liiramu bikkinam wi'llukko.

¹²Yaaqoobim isena «An kiyyannina aayyatte ikko'i Irbiq beeto» yaa kurukko; isem is anni beyyo geetta'a matta'a ka woshsha kutto'o.

¹³Laaba'am ixxi aayyi beet Yaaqoob waarukkisa macceesu ammanenne ixxenne edameena geerukko; ixxim qaaphphaa suunqaa lasage ixxi mine massukko; ee lasage Yaaqoob Laaba'ana ihu woshshi hundam kurukko.

¹⁴Ee ammanenne Laaba'a «Hanqinam at i maaraa xiigaa» yukko. Yaaqoobim ixxenne maqire mat agan hundam afuurukko.

¹⁵Mat ayyaamo Laaba'a Yaaqoobina «At i qarmanchi ikkitti bikkina iina kora'am baximmi hasisooyyo; ki bax bikkina miqoommi luwwi maruchcho? Iina kure» yukko.

¹⁶Laaba'anam lam landi hee'llo'o; lobaanti summi Liya'atte hoffaantekim Raaheelatte hee'ukko.

¹⁷Liya'ak illi jaam[15] hee'ukko. Ihukkaarem Raaheele haataamotte ikka'a lobakata danaamotte hee'llo'o.

¹⁸Yaaqoobim Raaheele iittukko; ee bikkina Laaba'ana «At ki hoffi landichcho Raaheele iina ladiissita'n an kiina lamar hiincho awwaadam hee'ummo» yukko.

¹⁹Laaba'am «Mulli mannina uwwoommaanniinsi kiina uwwimma iittoommo at iinninne maqire afuure» yukko.

²⁰Ee bikkina Yaaqoob Raaheele eebaqqeena lamar hiincho Laaba'ana awwaadukkuuyyi afuurukko; ise iittam hee'u bikkinam ixxena hofqax balli ihaa moo'amukko.

²¹Ee lasage Yaaqoob Laaba'ana «Amman beeddaakkoo bikkina ki landichcho iina ladiise» yukko.

²²Laaba'am bollochcho'o issaa ee beyyi manni hundam weeshaa wixxaa'ukko.

²³Ihukkaarem Laaba'a ee hiimo Raaheel bikkenne Liya'a massaa Yaaqoobina uwwukko. Yaaqoobim Liya'a eebukko.

²⁴Laaba'am ixxi landichchi Liya'ana ixxi agishsho Zalafa ashalaloomina uwwukko.

²⁵Yaaqoobim daranne ki'aa Liya'atte ikko'isa la'u ammanenne «Laaba'ana mahinatte eese ka'isa issittok? An kiina baxummok Raaheel bikkinatti hee'ukkoyyonnihe? Mahinatte eese qawwiissittok?» yukko.

²⁶Laaba'am ixxena «Ni uullanne lob landichcho hee'llu'uuyyi hoffi landichcho ladiisakkamoyyo.

²⁷Ka mat idaayya'n saanta higise mulli lamar hiincho eddaa iina awwaaddoohan ihulas Raaheelem kiina uwwoommo» yukko.

²⁸Yaaqoobim ee'isa isseena iittukko; Liya'anne maqirem mat saanta idaayye'aa lasage Laaba'a ixxi landichchi Raaheele Yaaqoobina ladiisukko.

²⁹Laaba'am ixxi landichchona Raaheelena ixxi agishshi Baalaana ashalaloomina uwwukko.

³⁰Yaaqoobim Raaheelenne iinse'eena aagukko; ixxim Liya'aansi lonsaa Raaheele iittukko; ixxim mulli lamar hiincho Laaba'ana awwaadukko.

³¹Yaaqoob Liya'a iittubee'isa Waa'i moo'u ammanenne ise qattamisina iseka goosa fooqaa'ukko. Ihukkaarem Raaheele alceennatte ikko'o.

³²Liya'am lamfoorette ikka'a goonchi beeto qatto'o; isem «Waa'i i hawwo moo'aakko; i aro'im hanqinam eese iittookko» yitta'a ixxi summa Roobeela[16] yita'a weeshsho'o.

³³Odim lamfoorette ikka'a goonchi beeto qatto'o. «An sabamummisa Waa'i moo'u bikkina ka beetom edaa uwwukko» yita'a ixxi summa Simi'oona[17] yita'a weeshsho'o.

³⁴Odim lamfoorette ikka'a goonchi beeto edda'a qatto'o; isem kabada'i «I aro'i eesenne lophphaa hincookko; mashka'oomim an ixxena sas goo'n ooso qaraammo» yita'a ixxeka summa Leew[18] yita'a weeshsho'o.

³⁵Odim lamfoorette ikka'a goonchi beeto qatto'o; isem «Kabada'i Waa'a galaxxoommo» yita'a ixxi summa Yihuda[19] yita'a weeshsho'o; ee lasage qarimma uullisso'o.