Read Hadiyya Qooccanchi Kitaaba 3 Bible Online

Qooccanchi Kitaaba 3 - Hadiyya bible

Qooccanchi Kitaaba 3

¹Moollanni Waa'i qooccu moochchi hundiinsim hamashshichchi lobakata hantaaraanchi hee'ukko; ee bikkina hamashshichchi meentichchona «Ka gannattanne yoo haqqi hundiinsim misha ittakkambee'isa Waa'i hanqinam ijaajaatennihe?» yaa xa'mmukko.

²Meentichchom hamashshichchina dabatta'a «Ka gannattanne yoo haqqi mishiinsi intoommo.

³Ihukkaarem Waa'i ‹Ka gannatti lambe'enne yoo haqqichchiinsi misha intoombee'isaa nakkinoombee'isaa niina kuraakko; ixxeensi ittakko'aa'lleensim letakkamo› yaakko» yito'o.

⁴Hamashshichchim «Ki'nnuwwi hore'em letakkamoyyo.

⁵Waa'i ee'isa yu mashka'i ee mishiinsi ittakkam ammane Waa'isam ki'nnuwwi joraa erokaa annanni issitakka'a laqqakamisa Waa'i la'oo bikkinatte» yaa meentichchona dabarukko.

⁶Meentichchom haqqichchoom mishisoohane mishoomim itimmina heele'isoohanee qooroomam siidisoohanee ihukkisa moo'llo'i ammanenne ee mishiinsi aa'lla'a itto'o; is aro'inam uwwito'o; ixxim itukko.

⁷Lamikim illi fooqukkaare kallemar ikko'isa laqqo'i bikkina oda'i buyya mat issita'a gobba'a edde'llo'o.

⁸Maaro'i ballanne Moollanni Waa'i gannatti Woronne taakke'ukkuuyyi Waa'ika sagara macceesso'o; Addaamii ixxi aree Moollanni Waa'i ixxuwwa moo'oobee'isa haqqi woronne maaxamto'o.

⁹Ihukkaarem Moollanni Waa'i Addaame weeshaa «Hannonnette yoontok?» yaa xa'mmukko.

¹⁰Addaamim «An ki sagara gannatti woronne macceesummo; kallemar ihummi bikkinam keese baddaa maaxamaammo» yukko.

¹¹Waa'im «Kallemar ikkittisa kiina ayyi kurukko? Hanqinam an ixxeensi ittoobee'isa yaa kurummi haqqichchi mishiinsi aa'llaa ittaatennihe?» yaa xa'mmukko.

¹²Addaamim «At iinninne maqire hee'llona uwwitti meentichcho mishiinsi uwwito'aare itaammo» yukko.

¹³Moollanni Waa'im ee meentichcho «At kaka mahina issitto?» yaa xa'mmukko. Oo meentichchom «Hamashshichchi eese qawwisukkaare an ixxeensi itaammo» yito'o.

¹⁴Ee lasage Moollanni Waa'i hamashshichchina «Kaka issitti bikkina diinatiinsii moochchiinsii hundiinsim annanni ikkaa xale'i at duumantaattoohan ihe; kaballiinsi ki'issaa biqinne shurittuuyyi mare; hee'lloo heechchi doollenne hundannem buchcha ite.

¹⁵Ki lambe'ennee ki meentichchi lambe'ennee ki shumo'i lambe'ennee is shumo'i lambe'ennee diina'ooma qooccoommo; is shumo'i ki horoore iiqookko; atim is shumo'ika sinxichcho qassootto» yukko.

¹⁶Meentichchonam «Ki godabonne qachchi afuuroo ammane xissoo qattoo ammanem xuuchchaa lobakata lonsoommo; ee'isa ihaa odim doo'l hundim ki aro'an ihookko; ixxim keese gassookko» yukko.

¹⁷Addaaminam «Ki meentichchoka sagara macceessaa an ‹Ittitte› yaa kurummi haqqichchi mishiinsi ittitti bikkina at baxxitti jor bax mashka'inne uulli ki bikkina duumamaakkoohan ihookko. Hee'llootti doolli hundannem kiina ihoo hurbaata uulliinsi siiddeena malaayyaam baxo biince'llittuuyyi baxxootto.

¹⁸Uullim uttaa halluttaa mutisookko; atim uulli mutisu luwwa ittootto.

¹⁹Buchchiinsi siidantitti bikkina buchchanne daba'lliteebe'i afeebe'e ittoo hurbaata biince'llaa baxxaa ittootto. At buchchi ikkitti bikkina buchchannem daba'llitootto» yukko.

²⁰Addaamim ixxi meentichchoka summa hee'oo manni hundinam amatti ikko'i bikkina «Heewaane» yaa weeshukko.

²¹Moollanni Waa'im Addaaminaa Heewaanenaa diinaxxi omachchiinsi eddechcha axisaa eddeesukko.

²²Moollanni Waa'im «Manchi beet niinniinsi matisa ihaa erokaa joraa la'aakko; kabadem ixxi anga iimaa'aa heechcha uwwoo haqqichchiinsi misha aa'aa itaa doolli hundam foorinne hee'immi hasisooyyo» yukko.

²³Ee bikkina Moollanni Waa'i ixxo Eede'n gannattiinsi fissukko; ixxi qooccamu uullam abuulloo'isa issukko.

²⁴Ixxuwwam Eedeniinsi fissaa lasage Eedi'n gannattiinsi eelliinchi firinne kiruubeela yakkam asse'amaano kolli hundinnem muquqqe'ukkuuyyi gii'llisa belecce'oo bisa'a dissukko; eekkam issukkok ayyi manchim foore uwwoo haqqichchi gadannonne hincoobee'isa egessiisimminatte.