Read Hadiyya Qooccanchi Kitaaba 30 Bible Online

Qooccanchi Kitaaba 30 - Hadiyya bible

Qooccanchi Kitaaba 30

¹Raaheele Yaaqoobina ooso qattobee'isa moo'lla'a lasage is aayyanne to'achchito'o; Yaaqoobinam «At iina ooso uwwe; eebee'las an lehoommo» yito'o.

²Yaaqoobim Raaheelnne quuqaa «An ooso at qattoobee'isa isseena Waa'i ihummonnihe?» yukko.

³Ee lasage isem ixxena «I agishsho Baala'a tuto'o; at isenne; iinse'e ise i gubeedonne iina ooso qattona; ee'isinne an oos amatte iheena xanoommo» yito'o.

⁴Ee bikkina is awwaadaancho Baala'a Yaaqoobina meentichchotte ikkona uwwito'o; ixxim maraa isenne iinse'ukko.

⁵Baala'am lamfoorette ikka'a Yaaqoobina goonchi beeto qatto'o.

⁶Raaheelem «Waa'i iina oogatukko i uunxatom macceesaa goonchi beeto iina uwwukko» yito'o; ee bikkina beetika summa Daana[20] yita'a weeshsho'o.

⁷Raaheelena awwaadaancho Baala'a odim lamfoorette ikka'a Yaaqoobina goonchi beeto qatto'o

⁸Raaheelem «An iyyaayyanne malaayyaam gubbancha gubbamaa kaa'aammo» yito'o. Ee bikkina beetika summa Niftaaleema[21] yita'a weeshsho'o.

⁹Liya'a ooso qarimma uullisso'isa moo'llo'i ammanenne isena awwaadaanchotte hee'llo'i Zilfa'a massita'a Yaaqoobina meentichchotti ikkona uwwito'o.

¹⁰Ee lasage Liya'i awwaadaancho Zilfa'a Yaaqoobina goonchi beeto qatto'o.

¹¹Liya'am «An hinkido'i er gada'aamotte» yita'a beetika summa Gaada[22] yita'a weeshsho'o.

¹²Liya'ana awwaadaancho Zilfa'am la'mmekam goonchi beeto qatto'o.

¹³Liya'am «An lobakata liiramaammo; kanniinsi eehid meenti hundim eese ‹Liiranto'oo meentichchotte yookko› yita'a ixxi summa Aseera[23]» yita'a weeshsho'o.

¹⁴Arasa murakkam agananne Roobeel haqqoro maraa wobax haqqi'nnoo'oka siidukko; ixxom eebaa ixxi amatte hee'llo'i Liya'ana uwwukko; Raaheelem Liya'ana «Ki beet eebu wobax haqqika iina uwwe» yita'a uunxito'o.

¹⁵Ihukkaarem Liya'a «Iinniinsi i aro'o hoottittok hoffe'aatennihe? Kaba odim i beet eebu wobax haqqichcho labookkoka hoottaa massiteena hassaatennihe?» yito'o; Raaheelem «At ki beet eebu wobax haqqa laboo haqqichchiinsi iina uwwitta'n at maaro'o Yaaqoobinne iinse'llam hee'llitto» yito'o.

¹⁶Yaaqoobim maaro'onne haqqioriinsi waarukko. Liya'am ixxo aa'lleena miniinsi fitta'a «I beet eebu wobax haqqichchinne keese bitaa'ummi bikkina at kaballa gattoottok iinninnette» yito'o. Ee bikkina ee hiimo isenne maqire garukko.

¹⁷Waa'im Liya'aka uunxato macceesukko; isem lamfoorette ikka'a Yaaqoobina ontika goonchi beeto qatto'o

¹⁸Liya'am «I awwaadaancho i aro'ina uwwummi bikkina Waa'i iina bito miqaakko» yita'a beetika summa Yisaakoora[24] yita'a weeshsho'o.

¹⁹Liya'a odim lamfoorette ikka'a Yaaqoobina lohikam goonchi beeto qatto'o.

²⁰Liya'am «Waa'i iina er irifo'o irifaakko; kabada'i i aro'i eese lonsookko; mashka'oomim an ixxena loh goo'n ooso qaraammo» yita'a beetika summa Zaabiloona[25] yita'a weeshsho'o.

²¹Ee lasage ise landichcho qatto'o; landichchokkam summa Diina[26] yita'a weeshsho'o.

²²Waa'im Raaheele sawwukko, is uunxatom macceesaa ise qattam goosa fooqaa'ukko.

²³Isem lamfoorette ikka'a goonchi beeto qatto'o; ee bikkina «Waa'im iinam goonchi beeto uwwukko; i game'llatom iinniinsi hoorukko.

²⁴Odim iina mulli goonchi beetom edaa uwwona» yita'a ee beetika summa Yooseefa yita'a weesho'o.

²⁵Raaheele Yooseefa qatta'a lasage Yaaqoob Laaba'ana «An qaramummi uulla daba'llaa marona eese geegeese.

²⁶I meentoo i oosoo iina uwwe; ixxuwwi bikkina an kiina hinkaa'nna awwaadumda'e at laqqootto» yukko.

²⁷Ihukkaarem Laaba'a ixxena «Kiina liiransulas at iinninne maqire afuure; Waa'i ki mashka'inne eese lobakata maase'ukkisa an mareexxaammo.

²⁸Kiinam miqoommi luwwa kure; an eekka kiina uwwoommo» yukko.

²⁹Yaaqoobim «An kiina hinkaa'nna awwaadumda'e ki diinaxxi allaachchim an allaarummaanniinsi ki'isaa hinkaa'nna fikkaannuda'e at laqqootto.

³⁰An ki beyyo waareena illageen kiina hofqax hee'u ki diinaxxi allaachchi kaba lobakata fikkaannaakko; an ki beyyo waarummi bikkina Waa'i keese maase'aakko; an odim i mi'n abaroosina baxoommok hinka'i ammane?» yukko.

³¹Laaba'am «Eehannah an kiina hinkaa'nna miqahe?» yaa xa'mmukko. Yaaqoobim «An kiinniinsi ma'lluchchom hasoommoyyo; iina kaka issitlas odim ki gereebba allaaroommo. Yaaqoobim «An kiina yoommok xale'i mat luwwa iina issitlas an ki diinaxxi allaachcha odim allaaroommo.

³²An kaballa ki gereebbi geexxuwwi lambe'innee fella'i geexxuwwi lambe'innee higoommo; bir digib fella'i geexxuwwaa odim heemaddi gereebbi geexxuwwaa mulli keeniinsi annanni issoommo; ixxuwwim iina miqo'i ikkamo.

³³At i beyyonne yoo ki diinate moo'lleena waattoo ammane an xummaanchi ihummisa at moo'lleena xantootto; i beyyonnem bir fella'iinsi, digib fella'iinsii heemaddi gereebbiinsii mullek siidamulas game'ummaannisa xige» yukko.

³⁴Laaba'am «Ihona at yittaannonne hundannem iittamoommo» yukko.

³⁵Ihukkaarem ee ayyaamo Laaba'a fella'i ambulluwwiinsi gadar hagarii bir hagar mare'ii yoo keenoo hundem meenti fella'iinsim, biroo'm mare'i yoo keenoo qadaalloom yoo keenoo hundam odim heemaddi gereebbi hundamii annanni issaa ixxi oosina allaattona uwwukko.

³⁶Ixxim ee lasage Yaaqoobiinsi sas balli googo ihoo qaxa qeessukko; Yaaqoobim Laaba'aka gatu fella'aa gereebbaa allaaram hee'ukko.

³⁷Yaaqoobim siigeeda haruureeshshaa leegaa laboo haqquwwiinsi aashaalli biccuwwa fissaa eebukko; ee biccuwwikam hobara coo'aa deegar issukko.

³⁸Ixxim ee coo'aa gudisu biccuwwa gereebbii fella'ii wo'ina waatto'i ammanenne wo'o agisakkam wongi'l woronne gereebbi illagennee feella'i illagennee dissukko. Fella'ii gereebbii wo'o aggeena waattam ammane mooraa'llam hee'llo'o.

³⁹Gereebbii fella'ii ee biccuwwi illagenne moora heele'llam hee'llo'o; ixxuwwim guba'nnito'i bikkina gadalluwwaa billuwwaa mare'i yoo keeno qatto'o.

⁴⁰Yaaqoobim wotalluwwa annanni issaa Laaba'i gadar fella'i kollonne heemaddi gereebbi ille dabarukko; ixxi gereebbaa fella'am annanni issukko. Ee'isinne ixxi diinate Laaba'i diinatiinsi annanni issukko.

⁴¹Odim qoxxaalli fayya'i gereebbii fella'ii hundim guba'nto'i ammane fella'ii gereebbii biccuwwa moo'lla'a ee biccuwwa laboo keeno qattamisina ee biccuwwa gereebbi wo'o agoo wongi'l woronne ixxuwwi illagenne dissukko.

⁴²Ihukkaarem jiir gereebbi illagennee fella'i illagennee bicco dissam hee'ukkoyyo. Ee'isinne jiir keen Laaba'an ihukko; qoxxaalli keen odim Yaaqooban ihukko.

⁴³Ixxenam lobakat diinat, goon awwaadaan, meenti awwaadaan, gaameela'ii hallii hee'ukko.