Read Hadiyya Qooccanchi Kitaaba 31 Bible Online

Qooccanchi Kitaaba 31 - Hadiyya bible

Qooccanchi Kitaaba 31

¹Laaba'i oos «Yaaqoob niyyanni luwwa hundam massaqqukko; ku ixxi amaxxi hundim waarukkok niyyanniinseyyonnihe?» yita'a woccu'uuyyi Yaaqoob macceesukko.

²Yaaqoobim Laaba'i illi kollo moo'u ammanenne eraa'llisa danaam illinne moo'ubee'isa la'ukko.

³Ee ammanenne Waa'i Yaaqoobina «An kiinninne maqir ihoommo; kiyyanno'i uullaa ki qarmanni uullaa daba'llitaa mare» yukko.

⁴Ee bikkina Raaheelee Liya'aa Yaaqoob diinate allaaru beyyo waattona asse'ukko.

⁵Ixxuwwinam «Ki'n anni illi eesenne eraa'llisa ihubee'isa an la'aammo; ihukkaarem iyyanni Waa'i iinninne maqire yookko.

⁶An ki'n annina i malaayyi hundinnem baxummisa laqqakkamo.

⁷Ihukkaarem ki'n anni eese qawwiisaa iina miqoo luwwa tommi kore dabaransukko; ihukkaarem Waa'i Laaba'a eesenne jor luwwa issona uwwukkoyyo.

⁸Laaba'a ‹Bir hagar yoo diinat hundim kiihan ihona› yu ammanenne diinat hundim bira qarukko; ‹gadar hundim kiina miqamoohan ihona› yu ammanenne diinat hundim gadara qarukko.

⁹Ee'isinne Waa'i ki'nnuwwi anni horiinsi massaa iina uwwukko.

¹⁰«Diinat cophoo ammanenne an haqaawwonne gadar ambulluwwi, bir ambulluwwii cacar ambulluwwii damookkoka moo'ummo.

¹¹Ee haqaawwonnem Waa'i asse'amaanchi ‹Yaaqooba› yaa weeshukkaare anim ‹Yee› yummo

¹²Waa'i asse'amaanchim ‹Ki gereebbanne damu ambulluwwi gadara, biraa cacaraa ihukkisa ki ille iimaa'llaa moo'e; eehid issummok anette; mashka'oomim Laaba'a keesenne issoo luwwi hundam moo'aammo.

¹³An kiina Beeteelanne moo'amummaare at kina utuphphisa kaassaa wee'l zayta labbaa iina hidiro aaggitti Waa'ana'e; kabadem ihukkaare ka uulliinsi ki'llaa at qarantitti uulla daba'lle› aakko» yaa kurukko.

¹⁴Raaheelee Liya'am Yaaqoobina «Niyyanni minenne neese lago aa'nnoommi luwwi mah gataate?

¹⁵Neese ixxi illagenne allaggisa xigammaammoo keenoyyonnihe? Ixxi neese biteesaa itaakko; kaba odim niina miqamu bito hundam bi'isaakko.

¹⁶Ee bikkina Waa'i niyyanniinsi hooraa kiina uwwu hor hundim niihanee ni oosanee; kabadem Waa'i kiina kuru luwwi hundam isse» yito'o.

¹⁷Yaaqoobim ki'aa ixxi oosoo meentoo gaameela'anne saa'llisukko.

¹⁸Odim ixxi Masphexoome'enne hee'u ammane ho'llu amaxxaa horaa hundam amadaa ixxi anni Yisaaq beyyo Kana'aa'n uulla marukko.

¹⁹Ee ammane Laaba'a ixxi gereebbi odda mureena maraa hee'ukko; ixxi bee'isa laqqo'i ammanenne Raaheele is anni ixxi minenne waa'isa issaa otossoo luwwa game'llo'o.

²⁰Odim Yaaqoob Laaba'a lagaa uraa maroo'isa kurukkoyyi hee'ukko.

²¹Ixxim ixxena yoo luwwi hundam amadaa gibukkuuyyi Efiraaxiis daajje firaa Gala'aada yakkam duunaam uulla marukko.

²²Sas ayyaamiinsi lasage Yaaqoob maaxamaa gibukkisa Laaba'a macceesukko.

²³Ixxim ixxi qarmanninne maqirem lamar balli googo hollamaa Gala'aaxxi duunanne amadeena hincukko.

²⁴Ihukkaarem ee ammane Waa'i Sooriy uulla Laaba'i beyyo hii'm haqaawwonne waaraa «Yaaqoobanne jor luwwa te'im er luwwa woccoobee'isa ege'lle» yukko.

²⁵Yaaqoobim Gala'aaxxi duunanne dukkaana kaasaa wiiddanaa yoohaannonne Laaba'a afukko. Ee'isam Laaba'am ixxi qarmanninne maqirem duunaam Gala'aaxxi uullanne dukkaana kaasaa wiiddanukko.

²⁶Ee lasage Laaba'a Yaaqoobina «At eese ka'isa qawwiissaa i landa orinne qeefadakka'a massakkamisa mahina ushe'llitto?

²⁷Odim iina kuttoo'n eese qawwiissaa mahina maaxamtaa gibbitto? At iina kuttaattoota'n liiranchinne, kajjinne, dibbe'innee xurumbinnee geegeesam hee'ummoyyonnihe?

²⁸An i oosoo i oos oosoo ‹Xummanne hee'llehe› yaa suunqaa geegeeseena mahina hoottitto? Ookkim lobakat huushancha.

²⁹An keese hawwodoommi malaayyi hee'ukko; ihukkaarem ludhii'mmo'o haqaawwonne kiyyanni Waa'i ‹Yaaqoobanne jora te'im danaammo maham woccoobee'isa ege'lle› yaakko.

³⁰At kaba mattoo mashka'i kiyyanni mine lobakata quluxxaatette ihukkisa an la'aammo; ihukkaarem an i minenne waa'isa otossoommi luwwa mahina game'llitto» yukko.

³¹Yaaqoobim Laaba'ana «At ki landa iinniinsi hoottaa massitoottoka labisaa baddummi bikkinatte.

³²Ihukkaarem at ki waa'i issitaa otossitoo luwwi ixxi beyyonne siidamu manchi ayyim lehona ka niyyabbaayyuwwi illagenne ki luchchika ma'llichchom hassaa siiddilas massaqqe» yaa dabarukko; ee ammane Yaaqoob is anni waa'isa issaa otossoo luwwa Raaheele game'llo'isa la'ukkoyyi hee'ukko.

³³Laaba'am haseena Yaaqoob dukkaa'n woro marukko; odim Liya'i dukkaanaa lamem baxaa'n dukkaanam marukko; ihukkaarem maham siidukkoyyo. Liya'i dukkaaniinsi firaa Raaheel dukkaana marukko.

³⁴Raaheele Laaba'a waa'isa issaa otossoo luwwa massita'a gaameela'uwwi kooriinsi woroon issita'a ixxi hanenne afuutta'a hee'llo'o. Laaba'am dukkaannuwwi hundam hasukko. Ihukkaarem maham siidukkoyyo.

³⁵Raaheelem is annina «Iyyanna, eesenne quuqqoobee'isa an ki illagenne uulleena xanumbee'ek meentonne agananne waarookkok waaru bikkinatte» yito'o. Laaba'am beyyi hundannem hasaa waa'isa issaa otossoo taraafiimmuwwa siideena xanukkoyyo.

³⁶Yaaqoobim Laaba'anne quuqaa «An keese hawwodummok mahinnette? At eese kaa'nna laseessittok an kiina mah jolle issummo?

³⁷Kabadem at i mu'uxxi woro hundam hassitto ihona bagaan ki luwwika maha siidditto? Huno'o kore, ku iyyabbaayyuwwii kiyyabbaayyuwwii i lambe'ennee ki lambe'ennee moo'llona.

³⁸Ka lamiyyem hiinchom an hee'ummok kiinninnette; ki fella'ikii gereebbikii matim kara qarukkoyyo; ki diinaxxi geexxuwwiinsim an itummoyyo.

³⁹Moochchinne itamu ki diinate miqam hee'ummo bagaan ee woshsha ki beyyo eebummoyyo; ballanne te'im hiimonne game'amukkoka i angiinsi miqissam hee'llitto.

⁴⁰An lobakat ammane balli eelliinchonnee hii'm qiidannee hawwam hee'ummo; anim hore'em diriiram hee'ummoyyo.

⁴¹Ka lamiyyem hiinchom tommoo soor hiinchoo lamem landam masseena odim loh hiincho gereebbi bikkina kiina baxummuuyyi hee'ummo; iina miqamoo luwwa at tommi kore dabassitto.

⁴²Iyyanno'i Abrihaamii Yisaaqii otossitam hee'llo'i Waa'i iinninne maqir hee'ubeeta'n kaballam eese leexa'i angam hollitaa hee'llitto; ihukkaarem Waa'i i hawwoo i baxoo moo'aa ludhii'mmo'o keese qoxxisaa axeeraakko» yukko.

⁴³Laaba'am Yaaqoobina «Ku landi i landa ku oosim i ooso ku diinatim i diinate ku at moo'lloo hundim iihane; ihukkaarem kaballa an i landannee ixxuwwi oosonnee maha isseena xanoommo?

⁴⁴Kabadem waare atii anii mare'e issinaa hidiro aangona; ixxim ihaannonnee ki lambe'ennee naqqasoohan ihookko» yukko.

⁴⁵Ee bikkina Yaaqoob hidi'l kina uttuphphisa kaasukko.

⁴⁶Yaaqoobim ixxi qarimmannina «Kinneewwika wixxaa'llehe» yukko; Ixxuwwim kina massita'a tuubba'a lasage kinneewwi gadanonne hurbaata itto'o.

⁴⁷Laaba'am ixxo «Yigaarsaahaduta» yaa weeshukko. Ihukkaarem Yaaqoob «Gala'aadaa» yaa weeshukko. Eehid yimmim «Neesenne naqqasoo utuba» yimma.

⁴⁸Laaba'am Yaaqoobina «Ku tuubamu kin ihaannonnee ki lambe'ennee Naqaash ihona» yukko. Ee bikkina ixxi Gala'aadaa yamamukko.

⁴⁹Odim Laaba'a «Neese annanni inkoommi ammane Waa'i ki lambe'ennee i lambe'ennee ihaa egerona» yaa ee beyyi summa «Misiphpha» yaa weeshukko.

⁵⁰Odim Laaba'a Yaaqoobina «At i landa hawwoddittaare te'im i landanne waameettuwwa eebbittaare eekka an la'umbee'aare Waa'i moo'oohan ihukkisa la'e.

⁵¹I lambe'ennee ki lambe'ennee tuubamu kinii uullisummi ki'n utubii

⁵²an keese hawwodeena te'im at eese hawwoddeena higammoombee'isa ku kaaxxu kinii ku tuubamu kinii iinaa kiinaa naqaash ihona.

⁵³Ihukkaarem neese kaka issinoo'n ullumlas Abrihaam Waa'ii Naakoor Waa'ii ixxi anno'i Waa'im neesenne oogatona» yukko. Yaaqoobim ixxi anni Yisaaq otossoo Waa'i summinne hide'ukko.

⁵⁴Yaaqoobim ee duunanne kitima hincaa'ukko; ixxi qarmannam hurbaata ittona weeshukko; ixxuwwim itta'a ee duunannem gatto'o.

⁵⁵Laaba'am soodaraar daram ki'aa ixxi landi oosoo ixxi landaa maasse'aa «Xummanne hee'llehe» yaa suunqaa annanni ihaa ixxi mine daba'llaa elle'ukko.