Read Hadiyya Qooccanchi Kitaaba 32 Bible Online

Qooccanchi Kitaaba 32 - Hadiyya bible

Qooccanchi Kitaaba 32

¹Yaaqoob googonne hee'ukkuuyyim Waa'i asse'amaan googonne edanto'o.

²Ixxuwwa moo'u ammanenne «Waa'i ixxi gogotinne maqire edamoo beyyo» yukko. Ee bikkina ee beyyika summa Maahinaayim [27] yaa weeshukko.

³Ee lasage Eedoo'm uullanne Seeyira yakkam beyyonne hee'oo ixxi ambeet Eesa'i beyyo gaassaa asse'amaano asse'ukko.

⁴Yooqoobim «I moollanni Eesa'ana ‹Amma'nnamaammoo ki awwaadaanchi kaballi afeebe'e Laaba'anne maqire hee'ummisa kiina kuroommo.

⁵Kuno'o lobakat lar, halli, gereebbi, fella'i, goon awwaadaanii landi awwaadaanii iina yookko. Ka assom asse'ummok ki illagenne nuura siixxoommo yoommi neeyyatinnette› yitakka'a kullehe» yaa ijaajukko.

⁶Asse'amaanim Yaaqoob beyyo daba'llita'a waatta'a «Kiyyabbaayyi Eesa'i beyyo mallaa hee'nnummo. Ixxim kiinninne edameena waaroolla. Ixxenne maqire soor xibbi manni yo'o» yito'o.

⁷Ee ammanenne Yaaqoob baddaa lobakata u'nnamukko. Ixxenne maqire hee'llo'i mannam lam beyyo baxxansukko. Ee'isam gereebba, fella'a, mulli fooraam diinatee gaameela'aa lam beyyo baxxansukko.

⁸Eekka issu mashka'im «Eesa'a dangonne waaraa luxxi baxxancha aphphisuta'n mulli baxxanchi xoraa gateena xanookko» yaa sawwaatette.

⁹Ee lasage Yaaqoob «Niyyanno'ina Abrihaaminaa Yisaaqinaa Waa'a! I uunxato macceese; i Moollanna! ‹At iina ki gaqqi uullaa ki qarmanni beyyoo daba'lle; anim kiina ee beyyonne eroomma issoommo› yitaa hee'llitto.

¹⁰Ki awwaadaanchina baxxitti eroommii ki iittinne ama'nnantaattoohaannoomii iina hore'em laboobee'ane; an xale'i ka sikke'oommi bicco amadaa Yoordaanoos daajje higaa hee'ummo; ihukkaarem kaba an lam kollonne baxxamamaakkoo moollo amadaa daba'llaammo.

¹¹Iyyabbaayyi Eesa'i angiinsi eese gatise ixxi waaraa ‹Neese hundam amo'o oosinne maqirem bi'isookko› yaa an ixxo baddaammo.

¹²Hanqoominam at ‹Kiina eroomma issoommo ki shumo'om xigakka'a xanakkambee'i qaxa dambalaq gada'n shashsha'llisa issoommo› yitaa hee'llitto» yukko.

¹³Ixxim ee hiimo ekke'e garukko; ixxena yoo luwwi hundiinsim doo'llaa ixxi abbaayyi Eesa'ana uwweena gudisukko.

¹⁴Oohim lam xibbi meenti fella'a, lamiyyi fella'i ambulluwwa, lam xibbi meenti gereebba, lamiyyi ambulluwwa,

¹⁵sad adaam gaameela'uwwa ixxuwwi wotallinnem, sor saayya, tommi moolluwa, lamiyyi meenti hallaa odim tommi halli wodalluwwaa doo'llaa gudisukko.

¹⁶Ee diinatem lam beyyonne baxxansaa ixxi awwaadaanonne asse'ukko. Ixxi awwaadaaninam «Iinniinsi higgakka'a mallehe; diinate eddakkambee'isa annanni issitakka'a ushe'llehe» yukko.

¹⁷Luxxi awwaadaanchinam «Iyyabbaayyi Eesa'anne edantakkam ammane ‹At ayyane? Hanno mattoolla? Ku ki'nnuwwi illagenne yookkok ayyane?› yaa xa'mmulas

¹⁸atim ee ammane ‹Ki awwaadaanchi Yaaqoob moollanni Eesa'ana angaachchina asse'ukkane; ixxim lasinne waaroolla› yitaa dabare» yukko.

¹⁹Ee'isam la'mmaanninaa saxxaanninaa ee diinate ushe'oo keenina hundinam «Eesa'anne edantakkam ammane ka woshsha kullehe;

²⁰Annannannem ‹Oono'o kiina awwaadaanchi Yaaqoob lasinne waaroolla› yitakka'a kullehe» yukko. Eehid yu mashka'im an afoo'n gaassaa ka ixxena asse'ummi angaachchi luwwinne ixxi quunqi billeena xanookko. Ee lasage an ixxenne edamoommi ammane ixxi eese liiranchinne aa'ookko» yaa sawwaatette.

²¹Ee'isinne angaachchi luwwooma higisaa asse'aa lasage ixxi gagoom ee wiidda'n beyyonnem garukko.

²²Ee hiimom ixxi lamem meento, ee meenti awwaadaanoo ixxeka tommoo mat oosoo amadaa Yaabooq daajje higukko.

²³Ixxena yoo luwwi hundam massaa ee daajje higisukko.

²⁴Ihukkaarem Yaaqoob mullam daajji eeqidonne gatukko. Mat manchim uulli soodeebe'e ixxenne gubbamam hee'ukko.

²⁵Oo manchim kaa'ubee'isa moo'u ammanenne gubeexxi shulluuda nakkukko; Yaaqoob gubbamukkuuyyim ixxek gubeexxi shulluud duudukko.

²⁶Ee lasage oo manchim «Uulli soodeena ihaakkoo bikkina eese fatakihe» yukko. Yaaqoobim «Eese maasse'lloo'n fatakoommoyyo» yukko.

²⁷Oo manchim «Ki summi ayyette?» yaa xa'mmukko. Ixxim «Yaaqoobatte» yukko.

²⁸Oo manchim «Ka lasage ki summi Isra'eela yamamona bagaan Yaaqooba yamamoone; Waa'innee manninnee gubbantaa kaa'llaatto» yukko.

²⁹Yaaqoobim «Ki summa kure» yukko. Oo manchim «I summa mahina xa'mmitoolla?» yaa ee beyyonnem ixxo maasse'ukko.

³⁰Yaaqoobim «Waa'a i illinnem moo'aammo; ihukkaarem an foorinnem yoommo» yaa ee beyyika summa «Phini'eela»[28] yaa weeshukko.

³¹Phini'eeliinsi higukkisam eelliinchi firukko. Ixxekim gubeed duudaa hee'u bikkina dimam hee'ukko.

³²Ee bikkina Isra'ee'l oos ka balli afeebe'em gubeexxi shulluud maara ittamoyyo; mashka'oomim Yaaqoob ee manchinne gubbamukkuuyyim oo manchi gubeexxi shulluuda nakkaa hee'u bikkinatte.