Read Hadiyya Qooccanchi Kitaaba 33 Bible Online

Qooccanchi Kitaaba 33 - Hadiyya bible

Qooccanchi Kitaaba 33

¹Yaaqoobim Eesa'a ixxi beyyo waarukkuuyyi asi'mmaa moo'ukko. Ee ammane Eesa'anne maqirem soor xibbi manni waattam hee'llo'o. Ee bikkina Yaaqoob ixxi ooso Liya'ana, Raaheelenaa lamem baxaan meentinaa amo'o amo'inam baxxansukko.

²Ixxim baxaano ixxuwwi oosinnem illageen higisaa ixxuwwi lasonne Liya'aa is oosoo higisukko. Odim Raaheelee Yooseefaa hundiinsim lasonne issukko.

³Yaaqoobim hundiinsim illagenne higaa ixxi abbaayyi beyyo hinceebe'e uullanne lamaraagge heeshukko.

⁴Ihukkaarem Eesa'a ixxenne edameena geerukko. Ixxi gaanjem qaaphphaa suunqukko; odim ixxuwwi lamim wi'llto'o.

⁵Eesa'am meentoo oosoo asi'aa moo'aa Yaaqoobina «Oo minaadab mahane?» yukko. Yaaqoobim «Iina Waa'i ixxi biijoominne uwwaakkoo ooso» yaa dabarukko.

⁶Ee lasage ixxi baxaan Beela'aa Zaala'aa ixxuwwi oosinne maqirem hincita'a heeshito'o.

⁷Eehanniinsi lasage Liya'aa is oosii hincita'a heeshito'o; odim lasaanchonne Yooseefii Raaheelee hincita'a heeshito'o.

⁸Eesa'am «Oo an moo'ummi diinat hundim mahanduyye?» yaa xa'mmukko. Yaaqoobim ixxuwwina «Keese i moollanna liiransoo'isina an asse'ummane» yaa dabarukko.

⁹Ihukkaarem Eesa'a «Iyyabbaayyo, iina ihoo qax yookko; kiina yookkok kiihanem ihona» yukko.

¹⁰Ihukkaarem Yaaqoob «Ee'isayyo, atimdu eese iittittilas an uwwummoka i angiinsi aa'e. Mashka'oomim an ki ille moo'immi Waa'i ille moo'ummaannisa.

¹¹At ee'isam eese biijoominne aa'llaatto. Ka an kiina uwwummoka aa'e. Mashka'oomim Waa'i ixxi biijoominne iina hasisoo luwwi hundam uwwaakko; iina lobakat luwwi yookko» yukko. Eesa'am aa'eebe'e lobakata uunxukko.

¹²Ee lasage Eesa'a «Ki'llehe mallona; an ki'nnuwwiinsi illageen higaa maroommo» yukko.

¹³Ihukkaarem Yaaqoob Eesa'ana «I moollanna, oos qacaalluwwi ihukkisa atim laqqootto; odim wotallaa wo'llaa iicisoo gereebbaa laroo ushe'ummi bikkina an ixxuwwina sawwimmi hasisookko. Manni mat ayyaamina gaaggaabisaa ushe'uta'n matem ballannem diinat hundim lehaa beeddookko.

¹⁴Ee bikkina an diinatii oosii taakke'lla'a xanto'i qaxanne qaphphaa ushe'ummuuyyi keese awwonaa waaroommo. I moollanna, at higgaa Eedooma mare anim ee beyyonne kiinninne edameena waaroommo» yukko.

¹⁵Eesa'am «Eehaare iinninne yoo mannika mat qaxa gatisonnihe?» yukko. Ihukkaarem Yaaqoob «An i moollanni illagenne lomba siidummaa'lleensi mullek hasisooyyo» yukko.

¹⁶Eesa'am ee ayyaamom Eedooma mareena daba'llukko.

¹⁷Ihukkaarem Yaaqoob Sukoot kollonne marukko. Ee beyyonnem ixxi gagina mine ixxi diinatinam oota baxukko. Ee bikkina ee beyyika summa Sukoota[29] yaa weeshukko.

¹⁸Yaaqoob Maspheexoome'iinsi daba'llu ammane Kana'aa'n uullanne yoo Seekee'm beero'o xumminnem afukko; ee beero'i gadanonnem dukkaana kaasaa afuurukko.

¹⁹Ixxim ee beyyo Seekeemina anni hee'u Hamoor oosiinsi mat xibbi kin bira uwwaa bitaa'ukko.

²⁰Ee beyyonnem Waa'ina kiti'm beyyo baxukko; ee beyyom «Eel Eelohe Isra'eel» yaa weeshukko. Ee'isa yimmim «Isra'ee'l Moollanni Waa'a» yimma.