Read Hadiyya Qooccanchi Kitaaba 34 Bible Online

Qooccanchi Kitaaba 34 - Hadiyya bible

Qooccanchi Kitaaba 34

¹Mat ayyaamo Liya'a Yaaqoobina qatto'i landichcho Diina'a Kana'aa'n uulli landa moo'lleena matto'o.

²Ee ammanenne ee uulli gassaanchi hee'u Hamoor beet Seekeem ise moo'aa gaassaa amadukko. Isennem maqire iinse'aa iseka baajoommano bi'isukko.

³Ixxim Yaaqoob landichcho Diina'a lobakata iittukko. Isem lobakata iittu bikkina liiranseena yakam hee'ukko.

⁴Ee bikkina Seekeem ixxi anni Hamoor beyyo maraa «Ka landichcho iina eebe» yukko.

⁵Yaaqoobim ixxi landichcho Diina'aka Seekeem baajoommano bi'isukkisa macceesukko. Ihukkaarem ixxi oos Diinattinne maqirem allaachchi beyyo matta'a hee'llo'i bikkina ixxuwwi waatteebe'e xa'nnaa egerukko.

⁶Seekeem annim Yaaqoobina kureena marukko.

⁷Ee ammanem Yaaqoob oos ee woshsha macceessa'a allaachchi beyyiinsi waatto'o. Ee ihu woshshannem lobakata muggito'o; fokko'i ihu bikkinam lobakata quuqqo'o. Mashka'oomim Seekeem Isra'ee'l landichcho gosaa isenne maqire iinse'immi ixxuwwina laboobee'i fokko'i hee'ukko.

⁸Ihukkaarem Hamoor «I beet Seekeem ki'nnuwwi landichcho lobakata iittaakko; ise ixxena uwwitakkona uunxoommo.

⁹Ki'nnuwwii neesee qarmanna; ki'nnuwwi landa niina uwwehe; ni landam ki'nnuwwi oosina massehe.

¹⁰Ki'nnuwwi niinninne maqire hee'llehe; ni uulli ki'nnuwwinam uulli ihookko; ka uullannem hassakko'i beyyo amaddakka'a baxxakku'uuyyii daddattakku'uuyyii hee'llakkeena xantakkamo» yukko.

¹¹Seekeemim Diina'i anninaa abbaayyuwwinaa «An ki'nnuwwa uunxummi luwwamdu issitakko'aare anim ki'nnuwwi yitakkam luwwi hundam uwwoommo.

¹²Isdu iina uwwehe bagaan qoot ihukko mulluwwam ihukko ki'nnuwwi hassakko'i luwwi hundam eese xa'mmehe; anim ki'nnuwwi yitakko'oka hundam uwwoommo» yukko.

¹³Yaaqoob oosim Seekeeminaa ixxi anni Hamoorinaa qawwisseena kid yita'a dabatto'o; mashka'oomim ixxuwwi aayya Diina'a massaa iseka baajoommano bi'isaa hee'ukko.

¹⁴«Neese niyyaayya mat ballachchamubee'i manchina uwwineena xansiisooyyo; eehid issimmi niina fokko'o.

¹⁵Ni'isam ki'nnuwwi goon hundam ballachchitakko'aa'lleensi xansiisookko; mullisinne xansiisooyyo.

¹⁶Ee lasage ni landam ki'nnuwwi oosina uwwinoommo; ee'isam neesem ki'nnuwwi landa eembeena xannoommo; neesem ki'nnuwwinne matem minaadab inkaa hee'nnoommo.

¹⁷Ihukkaarem ki'nnuwwi ni woshsha gaddakka'a ballachchancha sabbakko'aa'lleensi neesem ni landichcho amandaa malloommo» yito'o.

¹⁸Ixxuwwi woshshim Hamoorinaa ixxi beet Seekeeminaa eroka labaa moo'amukko.

¹⁹Seekeemim yakko'oka isseena daseena hasukkoyyo. Mashka'oomim ixxi Yaaqoob landichcho lobakata iittaa hee'ukko. Ixxim ixxi mi'n abaroos woronne lobakat lombi yoohan hee'ukko.

²⁰Ee bikkina Hamoorii ixxi beet Seekeemii beero'i gooc gadanonne manni dummoo beyyo matta'a beero'i mannina

²¹«Ku manni ni beyyonne xummaan manna; ixxuwwim ka uullanne hee'llonaa daddatonaa; mashka'oomim uulli ixxuwwinam ihoo haraara neesem ixxuwwi landa eemboommo; ni landam ixxuwwina uwwinoommo.

²²Ixxuwwim niinninne mat minaadab ikka'a hee'lleena xantamok ixxuwwi ballachchanto'isam niikkam goona hundam ballachchinummaa'lleensette; ixxuwwi niinninne hee'imma iittinaa xale'i ee woshshina ijaajammumlas

²³ixxuwwi diinatii ixxuwwi amaxxii hundim niihaneyyonnihe? Xale'i ka woshshanne iittammumlas niinninne afuuttamo» yito'o.

²⁴Ee beero'i minaadab hundim Hamoorii ixxi beet Seekeemii yito'i woshsha macceessa'a issiteena liiranta'a goon hundim ballachchanto'o.

²⁵Saxxi ayyaamonne omar fayye'oo'nnim Diina'ana abbaayyuwwi ikko'i Yaaqoob oosiinsi Simi'oonii Leewi'ii lamim bisa'a amadda'a maaxamta'a beero'o matta'a goon hundam shito'o.

²⁶Ixxuwwim Hamooraa ixxi beet Seekeemaa bisa'inne shito'o; ixxuwwi aayya Diina'am Seekeem miniinsi amadda'a fitto'o.

²⁷Yaaqoob mulli oosim ixxuwwi aayya bi'isso'i bikkina leto'i kee'n minneewwa matta'a beero'i manni amaxxi hundam boggo'o.

²⁸Ixxuwwim gereebba, laro, hallaa biirannee beero'onnee yoo luwwaa hundam massito'o.

²⁹Ixxuwwi amaxxa, ixxuwwi oosoo ixxuwwi meentoo hundam qeefadda'a massito'o.

³⁰Yaaqoobim Simi'ooninaa Leewi'inaa «An hawwonne uboommisa issitakko'ookko. Mashka'oomim ka uullanne hee'llam manni hundim eese sabbamo; Kana'aa'n mannii Feerze'i mannii hundim mat ikka'a eese qasseena waatto'aare iina ixxuwwi qax manni bee'i bikkina eesee i abaroosaa hundam shita'a guullitamo» yukko.

³¹Ihukkaarem ixxuwwi «Niyyaayya mat saa'aanchosa issimma iittinoommoyyo» yita'a dabatto'o.