Read Hadiyya Qooccanchi Kitaaba 35 Bible Online

Qooccanchi Kitaaba 35 - Hadiyya bible

Qooccanchi Kitaaba 35

¹Waa'i Yaaqoobina «Ki'llaa Beeteela mare; ee uullannem afuure; at kiyyabbaayyi Eesa'aansi gibbitti ammane an kiina moo'amummi Waa'ana'e; eekke'em iina kitimtoo beyyo baxe» yukko.

²Ee bikkina Yaaqoob ixxi abaroosinaa ixxenne maqire hee'u manninaa «Ki'nnuwwi lambe'enne yoo allaggichchi Waa'iinsi annanni ikkakka'a ki'nnuwwi gaga muccussehe; muccur eddechcham edde'llehe.

³Ee lasage ka beyyiinsi ki'nnaa Beeteela mallona; ee beyyonnem an hawwummi ammane hara'mmu Waa'ina odim an marummi beyyi hundannem iinninne maqire ihu Waa'ina kiti'm beyyo baxoommo» yukko.

⁴Ee bikkina ixxuwwim ixxuwwi anganne hee'u qophpha'n waa'uwwaa ixxuwwi maccenne hee'u gutichchoo hundam Yaaqoobina uwwito'o. Yaaqoobim Seekeem gadanonne hee'u hujuphphi haqqichchi lugumonne waammukko.

⁵Yaaqoobii ixxi abaroosii ee beero'i lambe'inne higgu'uuyyim beero'uwwanne hee'u mannanne hundannem Waa'iinsi lobakat baddimmi ubukko. Ee bikkina ixxuwwi Yaaqoob ooso laseesso'oyyo.

⁶Yaaqoobim ixxenne maqire hee'u manni hundinnem Kana'aa'n uullanne yoo «Looza» yakkam beero'o afukko; ixxim «Beeteela» yakkamane.

⁷Eekke'em Yaaqoob Waa'ina kiti'm beyyo axisukko; ixxim ee beyyi summa «Eel Beeteela» [30] yaa weeshukko; mashka'oomim ixxi gagoomim ixxi abbaayyiinsi gibu ammane Waa'i ixxi gaga ixxena ee beyyonne moo'isaa hee'ukko.

⁸Ee beyyonnem Irbiqa li'isso'i Dboora leto'o. Isem Beeteelanne hujuphphi haqqichchi gadanonne waammanto'o. Ee bikkina oo beyyi «Wi'llishshi hujuba» yammukko.

⁹Waa'im Yaaqoob Masphexoome'iinsi daba'llaa lasage odim moo'amaa maasse'ukko.

¹⁰Ixxim «Ki summi Yaaqoobatte; ka lasage Isra'eela yamantaa weeshantootto bagaan Yaaqooba yamantooyyo» yukko. Ee bikkina ixxi summim «Isra'eela» yamamukko.

¹¹Odim Waa'i ixxena Hundam xanoommi Moollanni anette; at fikkaanne dut oosom qare; ki shumo'iinsi minaadabii odim lobakat giichchii firona; adilluwwim kiinniinsi qaramookko.

¹²An Abrihaaminaa Yisaaqinaa uwwummi uulla kiina uwwoommo; odim kiinniinsi lasonne ki shumo'inam ee uulla uwwoommo» yukko.

¹³Waa'im Yaaqoobinne wocu beyyiinsi iim firukko.

¹⁴Yaaqoobim Waa'i ixxenne wocu beyyonne ki'n utuba kaasukko; ixxonnem woyi'n diqaasaa wee'l zaytaa dunukko.

¹⁵Ixxim ee beyyi summa «Beeteela» yaa weeshukko.

¹⁶Ixxuwwim Beeteeliinsi ki'lla'a Efiraata affeena hofqaxim gataakkoohaannonne Raaheele xuuchchi amadukko. Oo xuuchchim lobakata malaayyukko.

¹⁷Is xuuchchim lobakata joru bikkina ise qassiissam meentichcho «Kuno'o odim mulli goonchi beetom qatteenatte baddititte» yito'o.

¹⁸Ihukkaarem ise leh anganne hee'llo'o; is foor firukkuuyyim ciilichchika summa «Beeni'oona» yita'a weeshsho'o. «Beeni'oona» yimmim «Kichchechcha» yimma. Ihukkaarem ixxi anni «Biiniyaama» yaa weeshukko. Biiniyaama yimmim «I makki anga» te'im «Er gada'a» yimma.

¹⁹Raaheele ee'isinne leto'o; isem Efiraata massoo gooqqi gadanonne waammanto'o; oo beyyim «Beetaliheema» yamamukko.

²⁰Yaaqoobim is waammanne kina kaasukko; ixxom kaballi afeebe'e «Raaheel waamma» yakkamo.

²¹Ee lasage Isra'eelim ee beyyiinsi ki'aa marukko. Dukkaanam «Edeer gimba» yakkam beyyi eeqidonne kaasukko.

²²Isra'eel ee uullanne hee'ukkuuyyim Roobeel ixxi anni bakki meentichchonne Beela'anne iinse'ukko; Isra'eelim eekka macceesukko. Yaaqoob oosim tommoo lamoo hee'llo'o.

²³Liya'a ixxena qatto'i oos Yaaqoob won beet Roobeelatte, Simi'oonatte, Leewi'ette, Yihudatte, Yisaakoorattee Zaabiloonattee.

²⁴Raaheelekim Yooseefattee Biiniyaamattee.

²⁵Raaheel baxaanchok Baala'akim Daanattee Niftaaleemattee.

²⁶Liya'i baxaanchok Zalafakim Gaadattee Aseerattee. Ku oos hundim Yaaqoobina Masphexoome'enne qaramu keeno.

²⁷Yaaqoob ixxi anni Yisaaq afuuraa hee'u beyyo Abrihaamii Yisaaqii koyyinano afuuta'a hee'llo'i Keebiroona yakkam beyyi gadanonne yoo Maammire yakkam beyyo waarukko.

²⁸Yisaaqim xibbee sadentayyi hiinchoo hee'ukko.

²⁹Ixxim lobakata hee'aa umura goddaa lehukko. Ixxi oosim Eesa'aa Yaaqoobii waammito'o.