Read Hadiyya Qooccanchi Kitaaba 37 Bible Online

Qooccanchi Kitaaba 37 - Hadiyya bible

Qooccanchi Kitaaba 37

¹Yaaqoob ixxi anni koyyinanonne hee'u Kana'aa'n uullanne hee'am hee'ukko.

²Yaaqoob abaroos aganni kane; Yooseef tommoo lamar hiinchi woraadichchi hee'u ammane ixxi anni Baala'annee Zalfa'annee qaru ixxi abbaayyuwwinne maqire gereebbaa fella'aa allaaram hee'ukko. Yooseefim ixxuwwi annina ixxuwwika jor woshsha eebaa kuram hee'ukko.

³Isra'eelim Yooseefa lommannanonne qaru bikkina oosiinsi hundiinsim lonsaa iittam hee'ukko. Ixxim ixxena lobakata mishisoo qeeraa'l qambiisa axisaa eddeesam hee'ukko.

⁴Ixxennem xummaanchi sagara wocimmina xanto'oyyo.

⁵Mat ayyaamo hiimonne Yooseef haqaawwo haqaawwe'ukko. Ee haqaawwom ixxi abbaayyuwwina kuru ammanenne ixxuwwi ixxo lonsita'a sabbo'o.

⁶Ixxim ixxuwwina «An haqaawwe'ummi haqaawwo macceessehe!

⁷Neese hundim abuulli woronne arasa farshinsinummuuyyi hee'nnummo; ee ammanenne i farshim ki'aa uullukko. Ki'nnuwwi farshimmuwwim i farshima kibbita'a otossito'o» yukko.

⁸Ixxi abbaayyuwwim «At ni hanenne adil ikkeena sawwitaahinnihe? Te'im neese gassiteena hassaatennihe?» yito'o. Ixxi haqaawwi bikkinaa ee woshshi bikkinaa eraa'llaanniinsim lonsita'a sabbo'o.

⁹Odim mulli haqaawwom haqaawwe'ukko; eekkam ixxi abbaayyuwwina «Eelliinchi, aganii tommii mat boollaankii iina otossitu'uuyyi moo'ummo» yaa kurukko.

¹⁰Odim ee haqaawwo ixxi anninaa abbaayyuwwinaa kuru ammanenne ixxi annim ixxenne wocamaa «Ku haqaawwe'llitti haqaawwi maruchcho? Hanqinam an, kiyyummaa kiyyabbaayyuwwii kiina uullanne umbaa otossineenannihe?» yukko.

¹¹Ixxi abbaayyuwwim ixxonne to'achchito'o. Ihukkaarem ixxi anni woshshooma ixxi wodanonne egeram hee'ukko.

¹²Mat ayyaamo ixxi abbaayyuwwi Seekeema yakkam beyyonne ixxuwwi anni gereebba allaatteena matto'o.

¹³Isra'eelim Yooseefina «Kiyyabbaayyuwwi Sekeema yakkam beyyonne gereebba allaatto'oollayyonnihe? Ixxuwwi beyyo asse'oommo waare» yukko. Yooseefim «Kuno'o gudaammo» yukko.

¹⁴Yaaqoobim «Mattaa kiyyabbaayyuwwii gereebbii xumda'e moo'e; ixxuwwi woshsham iina eebe» yaa Keebiroona yakkam qaala'i kolliinsi Seekeema yakkam beyyo Yooseefa asse'ukko; Yooseefm Seekeema yakkam beyyo afukko.

¹⁵Ee beyyonnem udma'anne Yooseef jalli jallukkuuyyi mat manchi moo'aa «Maha hassoolla?» yaa xa'mmukko.

¹⁶Ixxim «Iyyabbaayyuwwa hasoommuulla gereebba allaattam beyyo kutteena xantoolas kure» yukko.

¹⁷Oo manchim «Ka beyyo utta'a Dootaana yakkam uulla mallona yitu'uuyyi macceesaammo» yukko. Yooseefim ee beyyiinsi ixxi abbaayyuwwa hasukkuuyyi marukko. Ixxuwwam ee Dootaananne siidukko.

¹⁸Ixxi qee'llonnem hee'ukkuuyyi ixxi abbaayyuwwi ixxo moo'lla'a ixxi afoo'nnim gaassita'a ixxo shimmina a'llannito'o.

¹⁹Ixxuwwim mat matina «Oo haqaawwaanchi kuno'o waarukko.

²⁰Kaba waallehe shinaa leeshooma mat wo'i bee'i barenne uunjinona; ee lasage jor moochchi itaakko yinoommo; ixxi haqaawwim ihoo'isa moo'nnoommo» yaqqanto'o.

²¹Roobeel eekka macceesaa ixxuwwi angiinsi gatiseena hasaa «Ixxo shitakkotte. Ka udma'anne yoo barenne uunjehe. Ixxi hanenne ki'nnuwwi anga higissakkotte» yukko.

²²Ee'isa yu mashka'im ixxuwwi angiinsi gatisaa ixxi anni beyyo dabaraa asse'eenatte hee'ukko.

²³Ka'isam ihukko; Yooseef ixxi abbaayyuwwi beyyo afu ammanenne ixxi abbaayyuwwi ixxi edde'u lobakata mishisoo qeeraa'l qambiisa maxatto'o.

²⁴Ixxon massitta'a barenne uunjito'o; baroomim wo'i bee'i gogaalli hee'ukko.

²⁵Ee lasage hurbaata itteena afuutto'oohaanonne Isma'eel uulli daddaraan Gibxi uulla dilliteena Gala'aada yakkam beyyiinsi waattu'uuyyi moo'llo'o ixxuwwim gaameela'uwwanne enjuwwaa karbe'e yakkam enje'oo luwwaa iyyiissa'a hee'llo'o.

²⁶Ee ammane Yihud ixxi abbaayyuwwina «Niyyabbaayyo shinaa maanxummaare maha awwaadookko.

²⁷Waallehe, Isma'eel uulli daddaraanina biteensona ixxi hanenne ni anga higinsoone mashka'oomim ixxi niyyabbaayyichchoo ni maarana'ee» yukko. Ixxi abbaayyuwwim ixxi woshshanne liiranto'o.

²⁸Miidiyaa'm uulli daddaraanim higgu'uuyyi Yooseef abbaayyuwwi Yooseefa ubbuuso'i bariinsi fissita'a Isma'eeli uulli daddaraanina lamiyyi kin birina biteesso'o. Ixxuwwim Yooseefa Gibxi uulla massito'o.

²⁹Roobeelim ee ba'l beyyo daba'llaa waaru ammanenne Yooseef ba'l woronne hee'ukkoyyo; ixxim edde'u eddechcha dereeraa lobakata kichche'ukko.

³⁰Ixxi abbaayyuwwi beyyom daba'llaa «Beet bee'e kaba an hanno maro?» yukko.

³¹Yooseefikam mishisoo qeeraa'l qambiisa massita'a fellakkichchi ambula dutta'a ixxi qeeraa'l mishisoo qambiisa xiiganne ceffo'o.

³²Lobakata mishisoo qeeraa'l qambiisam massita'a ixxuwwi annina «Kaka siindaamoohane; hino'o ki beet qambiisda'e moo'e» yita'a uwwito'o

³³Ixxim «Eeyya; kuk i beet qambiisa; hanqinam jor moochchi ixxo muransaa itaakko» yukko.

³⁴Yaaqoobim ixxi gaqqi eddechcha dereerukko xiddi eddechcham edde'ukko. Ixxi beet bikkinam lobakat ayyaamo wi'llukko.

³⁵Ixxi goo'n oosii landii hundim Yaaqooba qoxxisimmina waatto'o. Ihukkaarem ixxi qoxximma sabaa «I beet bikkina leheembe'i afeebe'e wi'lloommo» yukko. Yooseef annim ixxi bikkina wi'llukko.

³⁶Ee ammanem Gibxi uullanne Miidiyaa'm manni Yooseefa Phooxifaara yakkam manchina Fari'oon mine egeraa'n ijaajaanchina biteesso'o.