Read Hadiyya Qooccanchi Kitaaba 38 Bible Online

Qooccanchi Kitaaba 38 - Hadiyya bible

Qooccanchi Kitaaba 38

¹Ee agananne Yihud ixxi abbaayyuwwiinsi annanni ihaa Hiiraa yakkam Udulaa'm uulli manchi beyyo maraa ixxi heechchi beyyo eekke'enne issukko.

²Ee beyyonnem Yihud Kana'aa'n uulli manchika Shuu'aa'i landichcho moo'ukko; ee landichchom eebaa ixxi aretti issukko.

³Isem ixxena lamfooretti ikka'a goonchi beeto qatto'o; ixxi summam Eera yita'a weeshsho'o.

⁴La'mmekam ixxena lamfooretti ikka'a goonchi beeto qatto'o; ixxi summam Oonaana yita'a weeshsho'o.

⁵Odim lamfoor ikka'a goonchi beeto qatto'o; ixxi summam Seela yita'a weeshsho'o; ixxo qotto'i ammane Akkazeebaa yakkam uullanne hee'lo'o.

⁶Yuhud ixxi won beet Eerina Ti'imaare yakkam landichcho eebukko.

⁷Yihud won beet Eer ixxi Moollanni Waa'i illagenne jor hee'u bikkina Moollanni Waa'i ixxo shukko.

⁸Yuhudim Oonaanina «Mare lehu kiyyabbaayyi meentichcho lago gasse ki heereechchonam hasisoo luwwa issitaa kiyyabbaayyik shumo'i bi'oobee'isa isse» yukko.

⁹Ihukkaarem Oonaan qaramoo shumo'i ixxena ihoobee'isa la'ukko; ee bikkina ixxi abbaayyi meentichchonne iinse'oo ammane qachchi ihoo luwwa uullanne dunam hee'ukko; mashka'oomim ixxi abbaayyina shumo'o fissoobee'isnatte hee'ukko.

¹⁰Oo baxu bax Moollanni Waa'i illaggenne jor ihu bikkina ixxom Moollanni Waa'i shukko.

¹¹Ee lasage Yihud ixxi beetar Ti'imaarena «I beet Saalaan li'eebe'e kiyyanni mine daba'llitaa buubbeessaa afuure» yukko. Mashka'oomim ixxi ee ixxi abbaayyuwwisam lehoobee'isa baddaa hee'ukko. Ee bikkina Ti'imaare matta'a is anni minenne afuutto'o.

¹²Lobakat ammaniinsi lasage Yihud meentichcho Seewwa'i landichcho leto'o. Yihudim xiddo guullaa lasage Adulaa'mman ihu ixxi beshichchi Eraasennem gereebbi odda murakam beyyo marukko.

¹³Eekka la'u manni Ti'imaarena «Ki balli Yihud ixxi gereebbika odda mureena Taminaa yakkam beyyo firoolla» yakkam woshsha macceesso'o.

¹⁴Isem xiddi eddechcha sheelatta'a mulleka edde'llo'o; is illi kollom gunguu'llita'a Timina yakkam beyyo massoo gooqqi gadanonne Eenaayim beero'i goocanne afuutto'o. Mashka'oomim Saala'a li'ukkaarem ise eebona ixxi anni hasubee'isa laqqo'i bikkinatte.

¹⁵Yihudim moo'u ammanenne illi kollo gunguu'llito'i bikkina saa'aancho labisukko.

¹⁶Ixxim gooqqi gadanonne yo'i is kollo daba'llaa «An ki beyyo aageenatte at mee'o xa'mmitoottok?» yukko. Mashka'oomim ise ixxi beet arette ikko'isa la'ukkoyyi hee'ukko. Isem «I beyyo at aaggittaare iina maha uwwitootto?» yito'o.

¹⁷Ixxim «Allaachchiinsi mat fellakkichchi geexa asse'oommo» yaa dabarukko. Isem dabatta'a «Eekka asse'lleebe'e amadiissoo luwwa uwwittaa'lleensi danaamo» yito'o. Ixxim «Maha amadiiso?» yaa xa'mmukko.

¹⁸Isem «Ki summi yoo ki gaanji worqaa quba'aa ki anganne amaddoo biccoo iina uwwe» yito'o. Ixxim eekeeno uwwaa isenne iinse'ukko; isem lamfoorette ikko'o.

¹⁹Ee lasage ise ee beyyiinsi ki'lla'a matto'o. Ee gunguu'llito'okam sheelatta'a xiddi eddichcha odim edde'llo'o.

²⁰Yihudim amadiisaa hee'u mu'uta ee meentichchi angiinsi dabassiiseena ixxi beshichchi Hiira'anne fellakkichchi geexa asse'ukko; Hiira'am ise siideena xanukkoyyo.

²¹Ixxim manna «Eenaayyim googonne affutta'a hee'llo'i Saa'aancho hannonnette?» yaa xa'mmukko. Ixxuwwim «Ka beyyonne Saa'aancho bee'e» yita'a dabatto'o.

²²Ixxim Yihud beyyo daba'llaa «An ise siideena xanummoyyo; ee beyyi mannim <ka beyyonne saa'aancho hore'em bee'e> yito'ookko» yukko.

²³Yihudim «Neesenne manni osaroobee'isa ka fellakkichchi geexa maaxe; mashka'oomim an isena miqeena asse'ummo; atim ise siiddeena xantittoyyo» yukko.

²⁴Sas aganiinsi lasage Yihudina «Ti'imaare ki beet are Saa'lla'a kaba ise lamfoorette ikko'ookko» yakka'a kurakko'o. Yihudim «Biira fissitaka'a giirinne shokkiissakka'a shi'llehe» yukko.

²⁵Ixxuwwim biira fissito'i ammanenne «An lam foorette ihummok ka mu'uxxi annichchinatte; ku summi yoo gaanji worqi, quba'ii ku biccii ayyanda'e moo'e» yita'a balli beyyo asse'llo'o.

²⁶Ee ammanenne Yihud eekeeno tiiraa «An hushamaammo; ise wocco'ok hanqa i beet Saalaanim ise eebookko yummoka wonshummoyyo» yukko. Yihud la'mmeka isenne hore'em iinse'ukkoyyo.

²⁷Isem qattam amman afaakkoohaannonne qafa qattamisa laqqo'o.

²⁸Xuuchchi amadu ammanenne mat gaassaa anga fissukko; ee ammanenne qassiissam meentichcho ixxi anganne kashar fatira katta'a «Kuk gaassaa qaramookko» yito'o.

²⁹Ihukkaarem oo qachchi anga dabaraa woronne aagisukko. Ee ammanenne ixxi abbaayyi qaramukko. Qassiissam hee'llo'i meentichchom «Mahina gafe'llaa fittoolla» yita'a ixxi summa Faareesa[31] yita'a weeshsho'o.

³⁰Ee lasage kashar fatir anganne hee'u ixxi abbaayyi fatirinnem qaramukko; ixxi summim Zaaraahaa yamamukko.