Read Hadiyya Qooccanchi Kitaaba 39 Bible Online

Qooccanchi Kitaaba 39 - Hadiyya bible

Qooccanchi Kitaaba 39

¹Ismaa'eel shumo'i Yooseefa Gibxi uulla massita'a Fari'ooniinsi woroon awwonsaanchi hee'u phooxifaara yakkam adi'l mi'n egeraa'n ijaajaanchina biteesso'o.

²Moollannim Yooseefinne maqire hee'ukko; Yooseefikam baxo hundam taaphansukko. Yooseefim ixxi moollanni hee'u Gibxi uulli manchi minenne hee'ukko.

³Oo ixxi moollannim Moollanni Waa'i ixxenne maqire ihukkisaa ixxi issoo luwwi hundam Moollanni Waa'i ixxena taaphansoo'isaa moo'ukko.

⁴Yooseefim ixxi moollanni illagenne galaxxamaakkoohan ihaa siidamu bikkina ixxena awwaadam hee'ukko. Ixxim ixxi minenne yoo luwwi hundannem Yooseefa gassaanchi issukko.

⁵Ixxi minenne yoo luwwi hundannem gassaanchi issaa lasage Moollanni Waa'i ee Gibxi uulli mancho Yooseef mashka'inne maasse'ukko. Moollanni Waa'i maassim minennee biirannee yoo luwwi hundannem ihukko.

⁶Ixxim ixxena yoo luwwi hundam Yooseef anganne higisaa uwwukko; itoo hurbaatiinsi bagaan matem luwwam la'am hee'ukkoyyo. Yooseefim lobakata mishisoohan hee'ukko.

⁷Hofqax ammaniinsi lasage ixxi moollanni Phooxifaar meentichcho Yooseefanne ille ubbuussa'a «Iinninne iinse'e» yito'o.

⁸Ixxim «Sabummo» yaa ee ixxi moollanni meentichchona moollanni minenne yoo luwwi hundannem matem luwwim gatoo'n eese gassaanchi issaakko ixxim la'oo luwwi ma'lluwwim bee'e.

⁹Ka minenne iina ixxaanni qax malaayyi yookko; at ixxi meentichchotte ikkitti bikkina kiinniinsi bagaan iina uwwoo'n uru luwwi bee'e; hinkid kido'i kee'mmaalli jor luwwa an issoommo? Waa'i illagendu hinkid baaxiilo baxoommo?» yukko.

¹⁰Ihukkaarem ise Yooseefa ballina ballina isenne iinse'ona hawwissam hee'llo'o. Ihukkaarem ixxi issenne maqire iinse'immaa isenne maqire ihimmaa sabukko.

¹¹Mat ayyaamo Yooseef ixxi baxo baxeena mine aagukko; ee ammane mi'n woronne baxoo baxaa'nnek matim hee'ukkoyyo.

¹²Isem «Iinninne maqire iinse'e» yita'a ixxi eddechcha hixixaa'lla'a amaddo'o. Ixxim ixxi eddechcha is anganne uraa gibaa biira firukko.

¹³Yooseefim ixxi eddechcha is anganne uraa biira gibukkisa moo'llo'i ammanenne

¹⁴Minenne yoo manna is beyyo weeshsha'a «Ku Ibrokkichchi manchi neesenne naacameena waaraakkoohane; ixxi iinninne iinse'eena iinsi mine aagukko; anim sagara fissaa laarummo.

¹⁵An sagara fissaa laarummisa moo'u ammanenne ixxi eddechcha i beyyonne uunjaa gibaa biira firukko» yita'a kutto'o.

¹⁶Isem Yooseef moollanni mine waareebe'e Yooseef eddechcha is beyyonne dissita'a

¹⁷«Oo eebbitti Ibrokkichchi agishshi iinninne Naacameena i iinsi mine aagukko.

¹⁸Anim sagaraa fissaa laarummi ammanenne edde'u eddechcha i beyyonne uraa bira gibukko» yita'a kutto'o.

¹⁹Yooseef moollannim ki agishshi ka'isa issukko yita'a kutto'i ixxi meentichchi woshsha macceesu ammanenne lobakata nadadukko.

²⁰Yooseef moollannim Yooseefa massaa adil kassiisu keen karantam mine aagisukko; ee beyyonnem karamaa hee'ukko.

²¹Moollanni Waa'im Yooseefinne maqire hee'ukko; ixxom maasse'ukko; ee bikkina karaxxi mi'n ijaajaanchi ixxonne liiramu bikkina

²²ee karaxxi minenne yoo manni hundam Yooseef gassona ixxi anganne uwwukko. Eekke'enne baxamoo bax hundam ixxi baxam hee'ukko.

²³Ee karaxxi mi'n egeraanchim Yooseef anganne yoo luwwi hundam sawwam hee'ukkoyyo. Mashka'oomim Moollanni Waa'i ixxenne maqire hee'u bikkinatte. Ee bikkina ixxi issoo luwwi hundam Moollanni Waa'i Taaphansam hee'ukko.