Read Hadiyya Qooccanchi Kitaaba 4 Bible Online

Qooccanchi Kitaaba 4 - Hadiyya bible

Qooccanchi Kitaaba 4

¹Ee lasage Addaam ixxi are Heewaanenne eebaqqanchi edancha edamukko; Heewaanem lam foorette ikka'a goonchi beeto qatto'o; isem «Moollanniinsi goonchi beeto siixxaammo» yito'o; ee bikkinam beetika summa «Qaayeela» yita'a weeshsho'o.

²Odim mulli beetom Qaayeel abbaayyi Aabeela qatto; Aabeelim gereebba allaaraanchi hee'ukko; ihukkaarem Qaayeel abuullaanchi hee'ukko.

³Mat ayyaamo Qaayeel ixxi abuulli mishiinsi kitim issaa hincaa'eena eebukko.

⁴Aabeelim ixxi gereebbiinsi wonika doo'l di'ira duraa Moollannina kitima hincaa'ukko; Moollannim Aabeelaa ixxi uwwu luwwaa liiramaa aa'ukko.

⁵Ihukkaarem Moollanni Qaayeelaa ixxi kitimaa sabukko; ee bikkina Qaayeel lobakata nadadukko; ixxi illim tuunsukko.

⁶Ee ammanenne Waa'i Qaayeelina «Mahina quuqqaatte? Mahindu ki illi tuunsaakkate?

⁷Er luwwa issitta'n ki ill caakkam hee'ukkoyyonnihe? Ihukkaarem ki bax jor ihu bikkina moochchi amadeena dugoo'isa baaxiil ki goocanne keese amadeena dugoolla; ihukkaarem at ixxo kaa'lleena orame» yukko.

⁸Ihukkaarem Qaayeel ixxi abbaayyi Aabeelina «Waare biir beyyo mallona» yukko; biir beyyo affa'a lasage Qaayeel ixxi abbaayyi Aabeela dangonnem aphphisaa shukko.

⁹Ee lasage Waa'i Qaayeela «Kiyyabbaayyi Aabeel hannonnette?» yaa xa'mmukko. Qaayeelim «An la'ummoyyo. An iyyabbaayyo egeraanchonnihe?» yaa dabarukko.

¹⁰Waa'im Qaayeelina «Mahina ka hantaaro baxxitto? Kabadem at kiyyabbaayyi xiiga duntitti uulliinsi ‹I xiiga miqise› yukkuuyyi kiyyabbaayyi xiig i kollonne laaroolla;

¹¹At kabadem duumantaattoohane; odim kiyyabbaayyi xiiga at duntitti ammane ixxi xiiga ageena suume fooqaa'u uulliinsi yaayyantaattoohane;

¹²uulla abuullitoohaarem maham misha uwwooyyo; kabadiinsi ki'isaa at ka uullanne min bee'anee manniinsi yaayyantaattoohanee ikkootto» yukko.

¹³Qaayeelim Waa'ina «Ku duunttitti duunchii ku yaayyanchii an iyyeena xanoombee'i kee'mmaalla.

¹⁴Oono'o eese kaballa ka uulliinsi hollitaatto; ki illiinsim maaxamoommo; an ka uullanne beyyi bee'i batbataanchi ihoommo; ayyim eese siidukkok shookko» yukko.

¹⁵Ihukkaarem Waa'i «Ee'isayyo; ayyim keese shukkaare lamar foorinne an baado dabaroommo» yukko; ee bikkina ayyim ixxo siidukkok shoobee'isa Waa'i Qaayeelanne mare'e issukko.

¹⁶Ee lasage Qaayeel Waa'i illagiinsi qee'llaa marukko; Edeniinsi eelliinchi fira kollonne Nooda[1] yakkam uullanne afuurukko.

¹⁷Qaayeel ixxi arenne eebaqqanchi edancha edamukko; isem lamfooratti ikka'a goonchi beeto qatto'o; beetikam summa «Heenooka» yaa weeshukko; Qaayeelim beero'o baxukko; ee beero'i summam ixxi beet summanne «Heenooka» yaa weeshukko.

¹⁸Heenookim Iiraada qarukko; Iiraadim Mahuyaa'eela qarukko; Mahuyaa'eelim Matushaa'eela qarukko; Matushaa'eelim Laameeka qarukko;

¹⁹Laamehim lam meento eebukko; luxxaantek summi Ada'atte; la'mmaantekim summi Xiila'atte.

²⁰Aada'am Yaabaala qatto'o; Yaabaalim duukkaananne hee'ukkuuyyi beyyiinsi beyyo darba'a maroo keenina anni hee'ukko.

²¹Ixxi abbaayyi summim Yoobaalatte; Yoobaalim diittinnee xurumbinnee lelloo keenina anni hee'ukko.

²²Xiila'am Tubaalqaayina qatto'o; ixxim naasiinsii xaariinsii baxamoo mu'ut hundam baxam hee'ukko. Tubaalqaayin aayyam Naa'imatti hee'lo'o.

²³Mat ayyaamo Laameek ixxi meentina «Ki'nnuwwi i meenti Aada'aa Xiila'aa i woshsha macceessehe; an mat woraadichchi mancho eese qasaa omassu bikkina shaammo.

²⁴Ayyim Qaayeela shukkaare lamar foorinne baad dabaramoohan ihulas an shummi manchi bikkina ayyim eese shuta'n lamarayyinnee lamar foorinnee baad daba'llookkoo» yukko.

²⁵Addaam odim ixxi arenne eebaqqanchi edancha edamaa mulli beetom qarukko; isem «Qaayeel shu Aabeel bikkenne Waa'i iina mulli beeto uwwukko» yita'a beetika summa «Seeta» yita'a weeshsho'o.

²⁶Seetim goonchi beeto qarukko; beetikam summa «Heenoosa» yukko; ee ammaniinsi ki'isaa manni Waa'i summa weeshimma asheerukko.