Read Hadiyya Qooccanchi Kitaaba 40 Bible Online

Qooccanchi Kitaaba 40 - Hadiyya bible

Qooccanchi Kitaaba 40

¹Mat ayyaamo Gibxi uulli adilina diqaasa danaanaanchii hurbaata sassiisaanchii lamim ixxuwwi moollanni Gibxi uulli adila hawwoddo'o.

²Fari'oonim lamem mannannem diqaasa danaanaanchonnee hurbaata sassiisaanchonnee quuqukko.

³Ixxuwwam Yooseef karamaa hee'u karaxxi minenne egraa'n awwonsaanchi yoo minenne kassiisukko.

⁴Oo egeraa'n awwonsaanchim Yooseefina higisaa uwwukko. Ixxim ixxuwwina hasisoo luwwi hundam issam hee'ukko. Ixxuwwim lobakat ayyaamo karaxxi minenne afuutto'o.

⁵Mat hiimo karaxxi minenne hee'llo'i Gibxi uulli adi'l diqaasa danaanaanchii hurbaata sassiisaanchii lamim annanni annanni ihaakkoo annanni tiratim yoo haqaawwo haqaawwe'llo'o.

⁶Yooseefim soodaakkoohaannonne ixxuwwi beyyo aagukko; ee ammanenne ixxuwwi kichche'llo'ookkoka moo'aa

⁷Ixxi moollanni minenne ixxenne maqire baxxu'uuyyi hee'llo'i Fari'oon mi'n gassaanina «Ki'nnuwwi kaballa mahina kichche'llakka'ate?» yaa xa'mmukko.

⁸Ixxuwwim «Haqaawwo haqaawwe'nnummo; ihukkaarem tiroo manna hoongummo» yito'o. Yooseefim ixxuwwina «Haqaawwo tirookkok Waa'i uwwu manchoyyonnihe? Hino'o iina kullehe» yukko.

⁹Woyi'n diqaasa danaanaanchim ixxi haqaawwe'u haqaawwo «Haqaawwonne woyi'n xud i illagenne ihaa moo'ummo

¹⁰Ee xudannem sas shog yoohan hee'ukko. Oo xudim fiita fiitukko misham mishukko; oo mishim li'ukko.

¹¹Fari'oon agoo humbulli i anganne hee'ukko; ee misham massaa ee humbullonne ciinsummo. Ee lasage ee humbullo massaa Fari'oon anganne uwwummo» yaa kurukko.

¹²Yooseefim ka haqaawwi tirat ka'isa «Sasem shogguwwim sas ayyaamo.

¹³Sas ayyaa'm woronne Fari'oon keese tiirookko; illageen gassaanchi ikkaa hee'llitti beyyonnem dabarookko; diqaasa danaanaanchi hee'llitti ammane issitam hee'llittisam Fari'oon agoo humbullo ixxi anganne uwwitootto.

¹⁴Ihukkaarem kiina makkoo ammane eese sawwihe; iinam biijooma isse; i woshsham Fari'oonina kuttaa eese ka miniinsi fisse.

¹⁵Eese Ibro'i manni uulliinsi game'akka'a eebakka'a keyye karaxxi minenne karamummok matem jor luchchom issoo'nneteme» yukko.

¹⁶Hurbaata sassiisaanchim ee haqaawwo danaamisa tirukkisa moo'aa lasage Yooseefina «Odim anim haqaawwo moo'aa hee'ummo. Oohim sas leemaat hurbaat i horoorenne hee'uko;

¹⁷haninne yoo leemaatanne Fari'oon itoo li'u hurbaaxxi hagar hundim hee'ukko; ihukkaarem cii'i i horoo'l hanenne yoo leemaatiinsi itam hee'ukko» yaa ixxena kurukko.

¹⁸Yooseefim dabaraa haqaawwik kanniinsi tirat ka'isa «Sasem leemaat sas ayyaamo.

¹⁹Sas ayyaa'm woronne Fari'oon ki horoore muraa keese haqqanne saqalookko. Ammarim ki maara itookko» yukko.

²⁰Oo saxxi ayyaam Fari'oon qaramu qaranchi balli hee'ukko. Ixxim ixxi gassaan hundinam maadda gudisaa weeshukko; ee ammanenne ee diqaasa danaanaanchoo hurbaata sassiisaanchoo karaxxi miniinsi firamoo'isa issukko.

²¹Ee lasage diqaasa danaanaancho eraa'l baxonnem dabaraa Fari'oon agoo humbullo ixxi anganne uwwukko.

²²Ihukkaarem hurbaata sassiisaancho saqalsiisaa shukko. Lamikim haqaawwi yooseef tirukkisam ihukko.

²³Ihukkaarem diqaasa danaanaanchi Yooseefa tiiroo'nnim xadaa urukko.