Read Hadiyya Qooccanchi Kitaaba 41 Bible Online

Qooccanchi Kitaaba 41 - Hadiyya bible

Qooccanchi Kitaaba 41

¹Lam hiinchi higaa lasage Fari'oon haqaawwo haqaawwe'ukko; ixxim Abbaayyi daajji gadanonne uullaa hee'ukko.

²Hagar mishisoo geejji lamar lar abbaayyi daajji woriinsi fitta'a hixe ittam hee'llo'o.

³Odim mulli keen hagar mishisoobee'i nac lar wo'i woriinsi fitta'a gaassita'a daajjiinsi fitto'i kee'n gadanonne uullito'o.

⁴Ee lasage hagar mishisoobee'i nac lar ee hagar mishisoo geejji laro liqicito'o; Fari'oonim diriiriinsi baqukko.

⁵Odim daba'llaa diriiraa la'mmaaggem mulli haqaawwo haqaawwe'ukko; mat aras maqanne lamar mish yoo hamaama hamaamukko; ixxim illi danaam geejji hee'ukko.

⁶Odim eelliinchi firoo kolliinsi hafachchu hafachchinne quubaakkoo mulli lamar mish yoo hamaam mat maqanne hamaamukko; ixxim quubaakkoo illi wic hee'ukko.

⁷Oo quubu illi wic hamaamim ee lamarem illi geejji danaam hamaammuwwa liqicukko; Fari'oonim baqaa lasage haqaawwi ihukkisa la'ukko.

⁸Soodaa lasage Fari'oon u'nnamaa Gibxi uullanne yo'i haqaawwo tiraanoo qoolluwwi mannaa weeshisaa ixxuwwina ixxi haqaawwo kurukko; ihukkaarem ixxuwwiinsi matim ixxi haqaawwo tiraa kureena xanukkoyyo.

⁹Ee ammanenne diqaasa danaanaa'n awwonsaanchi Fari'oonina «Kaballa i huushancha sawwummo.

¹⁰At hurbaata sassiissoohaannonnee eesennee quuqqitto; neesem higissaa karaxxi mine egeraanchina uwwitto.

¹¹Neesem mat hiimo annanni annanni haqaawwo haqaawwe'nnummo; lamikim haqaawwi tirat annanni hee'ukko.

¹²Ee beyyonne karaxxi mine egeraanchina awwaadaanchi hee'u Ibrokkichchi woraadichchi niinninne maqire karaxxi minenne hee'ukko; ixxenam haqaawwe'nnummi haqaawwo kullummo ixxim annannichchinam haqaawwe'nnummi haqaawwisam annanni issaa tiraa kurukko.

¹³Woshshim ixxi yukkisam ihukko; an i baxonnem daba'llummo; ihukkaarem hurbaata sassiisaanchi saqalamukko» yukko.

¹⁴Ee lasage Fari'oon Yooseef beyyo asse'aa weeshisukko; ixxom karaxxi miniinsi qaqisakka'a eebakko'o; ixxi horoorem hogoossakko'o; eddechcham dabassaa edde'aa adi'l illage hincukko.

¹⁵Fari'oonim Yooseefina «An haqaawwo haqaawwe'aa hee'ummo ihukkaarem ayyim iina tiraa kureena xanukkoyyo; at haqaawwo tittaa kuttoo'isa ki bikkina macceesaammo» yukko.

¹⁶Yooseefim dabaraa «Kuk iinniinseyyo; ihukkaarem Waa'i Fari'oonina ihookkoka tiraa kurookko» yukko.

¹⁷Fari'oonim Yooseefina «Haqaawwonne Abbaayyi daajji gadanonne uullaa hee'ummo.

¹⁸Hagar mishisoo lamar geejji lar daajji woriinsi fitta'a hixe ittam hee'llo'o.

¹⁹Odim hagar mishisoobee'i mulli lamar nac lar eekeeniinsi lasonne fitto'o; Gibxi uulli hundannem eehido'i hagar mishisoobee'i nac laro moo'ummoyyo.

²⁰Oo hagar mishisoobee'i nac larim gaassita'a fitto'i hagara mishissam geejji laro liqicito'o.

²¹Ihukkaarem ee lasage oo naccuwwi geejjuwwa liqicito'isa ayyim la'ukkoyyo; mashka'oomim ixxuwwi hagar illagee'nnisam nac hee'ukko; ee lasage baqummo.

²²Odim mulli haqaawwom moo'ummo; lamar mish hamaam mat maqanne hamaamukko; ixxim illi danaam hee'ukko.

²³Odim eelliinchi firinne hafachchu hafachchinne quubaakkoo mulli lamar mish mat aras maqanne hamaamukko; ixxim ille wic hee'ukko.

²⁴Oo illi wic hamaam lamarem danaam geejjuwwa liqicito'o; anim kaka hiraagaanina kurummo; ihukkaarem ayyim iina tiraa kureena xanukkoyyo» yukko.

²⁵Yooseefim Fari'oonina «Lamem haqaawwikim tirat mato; Waa'i isseena hasukkoka kiina kuraakko.

²⁶Lamarem geejji larim lamar hiincho; odim lamarem illi danaam hamaam lamar hiincho haqaawwoom matome.

²⁷Lasonne fitto'i lamarem nac larii eelliinchi firoo kolli hafachchinne quubu lamarem illi wic hamaamii lamar hiinchi sibaaro.

²⁸An kiina kurummisam Waa'i issoo luchcho kiina moo'isaakko.

²⁹Gibxi uulli hundannem lamar hiinchina lobakat goddi ihookko.

³⁰Ee lasage odim lamar hiinchina sibaar ihookko; Gibxi uullanne hee'u goddi hundim xadamookko; sibaarim uulla bi'isookko.

³¹Goddi maarag higaa lasage waaroo kee'mmaalli sibaa'l hawwi mashka'inne uullanne hee'u goddi hiinchi xadamookko.

³²Haqaawwoomim daba'llamaa moo'amu mashka'i Waa'iinsette ihu bikkina ka abbis ammanenne ku woshshi ihookko.

³³Ee bikkina kaba Fari'oon qoor lachchaam mancho doo'llona; ixxom Gibxi uullanne gassaanchi issona.

³⁴Odim Fari'oon uullanne gassaano uwwona; lamarem hiinchi goddiinsim Gibxi uullanne hundannem ontiinsi mato massona.

³⁵Ixxuwwim waaroo goddi hiinchonne hurbaata wixxaa'llona; hurbaatoomam Fari'oon ijaaccisa issitona; oo hurbaatim beero'onne wixxaa egeramoo'isina daannooma uwwe.

³⁶Ee'isa ihulas manni sibaarinne lehooyyo» yukko.

³⁷Oo woshshim Fari'oonaa ixxi gassaanoo liiransukko.

³⁸Fari'oonim ixxi gassaanina «Kido'i Waa'i Ayyaan yoo mancho Yooseefiinsi e'lloo mancho hore'em siindoommoyyo» yukko.

³⁹Ixxim Yooseefina «Kiinni'nno'i qoor lachchaam manchi bee'e; Waa'i kiina ka hundam caakkisaakko.

⁴⁰An keese i uullanne gassaanchi issaammo; odim i minaadab ki ijaajina ijaajantona iinniinsi bagaan ki gassimmi daannoomanne lophphookkok bee'e» yukko.

⁴¹Odim Fari'oon Yooseefina «An keese Gibxi uullanne hundannem gassaanchi issaammo» yukko.

⁴² Fari'oonim ixxi angi worqi quba'a fissaa Yooseef anganne issukko; qadaalli danaam talbi fatirinne dadamaakkoo eddechcham eddeesukko; gaanji worqam issukko.

⁴³Ixxi la'm farashshi gaare'ennem afuussukko; ixxi alallaataanchim «Otossi'llehe! Otossi'llehe!» yukkuuyyi laaram hee'ukko. Yooseefim Gibxi uulli hundannem gassaanchi ihukko.

⁴⁴Fari'oonim Yooseefina «An Fari'oonatte; Gibxi uullanne hundannem ki doo'l bee'eka ayyi manchim angam lokkom ki'isoone» yukko.

⁴⁵Yooseef summam «Xafinaat Fanaaha» yaa weeshukko; ixxenam Oon beero'i qeessichchi Phooxiifaar landichcho Asnaate eebukko; Yooseefim Gibxi uulli Fari'oon illaggenne uullu ammane umur sad hiincho ihaa hee'ukko; ixxim Fari'oon illagiinsi firukko; Gibxi uulli hundam do'ukko.

⁴⁶

⁴⁷Lamarem goddi hiinchi ammanenne uulli lobakat misha uwwukko.

⁴⁸Yooseefim Gibxi uullanne yoo lamarem goddi hiinchi hurbaata hundam wixxaa'ukko; hurbaatoomam beyyonne beyyonnem wixxaa'ukko.

⁴⁹Yooseefim wixxaa'u hurbaat daajji shashsha'llisa lobakat hee'u bikkina keenimma urukko.

⁵⁰Lamarem sibaa'l maaragim waaroo'n gaassita'a Oon beero'i qeessichchi Phooxiifaar landichcho Asnaate Yooseefina lam ooso qatto'o.

⁵¹Yooseefim «Waa'i i hawwi hundam xadonaa iyyanni abaroosam xadonaa kaka issukko» yaa ixxi won beet summa Minaasee yukko.

⁵²Odim Yooseef «I hawwi uullanne Waa'i ooso uwwukko» yaa la'm beetika summa Efireema yukko.

⁵³Gibxi uullanne hee'u lamarem goddi maarag beeddukko.

⁵⁴Yooseef yukkisam lamarem sibaa'l maarag waarukko; hundem uullannem sibaar ihukko; ihukkaarem Gibxi uullanne hurbaat hee'ukko.

⁵⁵Gibxi uulli mannim sibaatta'a hurbaatina Fari'oon beyyo matta'a laatto'o; ixxim «Yooseef beyyo mallehe; ixxi kurookkokam issehe» yukko.

⁵⁶Uulli hundannem sibaar jorisa baasukko; ee bikkina Yooseef gootalluwwa fooqaa'aa Gibxi uulli mannina hurbaata biteesimma amadukko.

⁵⁷Mannim uulli hundiinsim Yooseefiinsi hurbaata aa'immina Gibxi uulla waattam hee'llo'o; mashka'oomim sibaar hundem beyyonnem baasaa hee'ukko.