Read Hadiyya Qooccanchi Kitaaba 42 Bible Online

Qooccanchi Kitaaba 42 - Hadiyya bible

Qooccanchi Kitaaba 42

¹Yaaqoob Gibxi uullanne biteesamoo hurbaat yoo'isa macceesaa ixxi oosina «Mahina mat mato moo'llakkamuulla?

²Gibxi uullanne biteesakkam hurbaat yoo'isa an macceesaammo; sibaarinne lenoombee'isa mattakka'a Gibxi uulliinsi hurbaata bitaa'llehe» yukko.

³Ee lasage Yooseef abbaayyuwwiinsi tommim Gibxi uulliinsi hurbaata bitaa'immina matto'o.

⁴Ihukkaarem Yooqoob Yooseefina ambeet ihu Biiniyaama ixxi abbaayyuwwinne maqirem asse'ukkoyyo; mashka'oomim matisa ihookko yaa baddu bikkinatte.

⁵Isra'eela yamamu Yaaqoob oosim Kana'aa'n uullanne ihu sibaa'l mashka'inne Gibxi uulla mattam hee'llo'i mulli manna awwonta'a matto'o.

⁶Ee doollenne Yooseef Gibxi uulli hundam gassaanchi hee'ukko; ee uulliinsi hurbaata aa'eena maroo keenina biteesam hee'ukkok ixxotte; Yooseef abbaayyuwwim ixxi beyyo waatta'a uullanne heeshita'a ixxena otossito'o.

⁷Yooseefim ixxi abbaayyuwwa moo'u ammanenne ixxi abbaayyuwwi ikko'isa la'ukko; ihukkaarem ixxuwwa la'oobee'aannisa ihaa shaaqimminne «Hanniinsi waattakko'oo keeno?» yaa xa'mmukko; ixxuwwim «Neese waallummok Kana'aa'n uulliinsette; waallummi mashka'im hurbaata ka beyyiinsi bitaa'nneenatte» yito'o.

⁸Yooseefim kaka macceesu ammanenne hanqo'isam ixxi abbaayyuwwi ikko'isa qoossaa la'ukko; ihukkaarem ixxuwwi ixxi ayyetda'e ihukkisa laqqo'oyyo.

⁹Yooseefim ixxuwwi bikkina moo'u haqaawwo sawwukko; ixxuwwinam «Ki'nnuwwi caqassakkam keeno; ka uullanne yoo luwwaa bee'i luwwaa caqassakkeena waattakko'oo keeno» yukko.

¹⁰Ixxuwwim dabatta'a «Ni moollanna eehideyyo neese ki awwaadaan hurbaata bitaa'nneena waallaammoo keeno.

¹¹Neese hundim mat anni ooso; neese caqasaanoyyo hanqo'i manna» yito'o.

¹²Yooseefim dabaraa «Eehideyyo ki'nnuwwi waattakko'ok ka uullanne yoo luwwaa bee'i luwwaa caqassakkeenatte» yukko.

¹³Ixxuwwim «Ni moollanna neese Kana'aa'n uullanne matem anniinsim qarammaammoo tommoo lam abbaayyuwwa; hundiinsim lasaanchik kabadem minenne niyyanninne maqire yookko; mat lehaakko» yito'o.

¹⁴Yooseef odim dabaraa «Ki'nnuwwi caqasaano Yummok kaneme.

¹⁵An adi'l summinne hide'oommo ki'nnuwwi ee ki'nnuwwi hoffi abbaayyo eebbakkobeelas ka beyyiinsi mattakkamoyyo.

¹⁶Woccakko'i woshshi hanqi ihukkisa qoossameebe'e ki'nnuwwiinsi matoom ki'nnuwwi hoffi abbaayyo amadaa waarona mine asse'llakka'a gattakko'i qax karaxxi minenne afuullehe; oobeelas ki'nnuwwina Fari'oon summinne hide'oommo; ki'nnuwwi caqassakkeena waattakko'oo keen ikkakko'isa la'aammo» yukko.

¹⁷Ee lasage sas ballina ixxuwwi hundam karaxxi mine aagisukko.

¹⁸Saxxi ballanne Yooseef ixxuwwina «An ki'nnuwwina yoommoka issitakko'aare foorinne hee'llakkamo; mashka'oomim an Waa'a baddoommi mancho.

¹⁹Hanqo'i manni ikkakkolas ki'nnuwwiinsi mat karaxxi minenne gatona; gattakko'i qax bitaa'llakko'i hurbaata amaddakka'a sibaaru ki'nnuwwi abaroosina massehe.

²⁰Ki'nnuwwi hoffi abbaayyom i beyyo ebbehe; ki'nnuwwimdu ka'isa issitakkolas ki'nnuwwi woccakko'ok hanqi ihukkisa la'oommo; ki'nnuwwim letakkammoyyo» yukko; ixxuwwim ixxi yukkaannonne iittanto'o.

²¹Ixxuwwim mat matina «Hanqinam niyyabbaayyonne issinummi jolli bikkina ka kee'mmaalli hawwo moo'nnummo; ixxi ee ammane neese u'nnanchinne worwaataa uunxukkuuyyi neese ixxi laachcha macceensummooyyo; kaba ka hawwonne aangummi mashka'im kanni bikkinatte yaqqanto'o.

²²Roobeelim ixxuwwina dabaraa «Niyyabbaayyonne mat luwwam issinoombee'isa wocummoyyonnihe? Ihukkaarem ki'nnuwwi i woshsha macceessakko'oyyo; Waa'im neese niyyabbaayyonne issinummi xiiqqi bikkina neese guzumo'oolla» yukko.

²³Yooseefim ixxuwwi yito'oka la'ukko; ihukkaarem ixxuwwi Yooseef ixxuwwi woshsha la'ukkisa laqqo'oyyo; mashka'oomim ixxuwwi lambe'enne ixxuwwi woshsha Yooseefina tiraa kuroo manchi hee'ukko.

²⁴Yooseefim ixxuwwi beyyiinsi mulli kollonne maraa wi'llukko; odim ixxuwwi kollonne daba'llaa wocukko; ee lasage Simi'oona ixxuwwiinsi annanni issaa ixxuwwi moo'llu'uuyyim karukko.

²⁵Yooseefim ixxi awwaadaan gatto'i kee'n cananne hurbaata wonshitona ijaajukko; annannichchi diinatem ixxuwwi cananne dabaraa issiisukko; ixxuwwinam googina hasisoo sinqa amadiissakkamisa issukko.

²⁶Ee lasage ixxuwwi bitaa'llo'i hurbaata hallanne iyyiixxita'a googo amaddo'o.

²⁷Ixxuwwiinsim mat uulli hiimaa gattina usheexxito'i beyyonne iyyu hallichchina hurbaatika uwweena fooqaa'u ammanenne ca'n suumenne uwwu diinat daba'llaakkoo siidukko.

²⁸Ixxi abbaayyuwwinam «I diinat kuno'o i ca'n suumenne issamaa daba'llaakko» yaa kurukko; ixxuwwim wodanonne baddita'a huxe'llu'uuyyi mat matina «Waa'i neesenne issukkok maruchcho?» yaqqanto'o.

²⁹Ixxuwwim ee ixxuwwi anni beyyo Kana'aa'n uulla daba'llito'i ammanenne ixxuwwanne afu hawwi hundam ixxuwwi annina

³⁰«Gibxi uulli gassaanchi ‹Beero'o caqassakkeena waattakko'oo keenoo› yaa qooxxaallisa wocukko.

³¹Neesem daballaa ‹Neese caqasaanoyyo neese hanqo'i manna.

³²Neese matem anniinsi qarammaammoo tommoo lam abbaayyuwwa niinniinsi mat lehaakko; hundiinsim hoffok kabadem niyyanninne maqirem Kana'aa'n uullannette› yinaa daballummo.

³³Ee lasage ee uulli gassaanchi ihu manchi ‹Hanqo'i keen ikkakko'isa la'oommisina ki'nnuwwi abbaayyuwwik mat iinninne maqire gatona; gattakko'i qax sibaaru ki'nnuwwi abaroosina bitaa'llakko'i hurbaata amaddakka'a mallehe.

³⁴Ki'nnuwwi hoffi abbaayyom amaddakka'a waallehe; ee ammane ki'nnuwwi caqasaan ikkakkobee'isaa hanqo'i keen ikkakko'isaa la'oommo; ki'nnuwwi abbaayyom ki'nnuwwina dabaraa uwwoommo; ki'nnuwwim hassakko'aare keyye affuttakka'a daddattakkamo› yaakko» yita'a kutto'o.

³⁵Ixxuwwim annannichchim ixxuwwi gaqqi cana titta'a moo'llo'i ammanenne ca'n suumenne hurbaatina uwwito'i diinat daba'llaakkoo moo'llo'o; ixxuwwim ca'n suumenne diinate moo'llo'i ammanenne ixxuwwii ixxuwwi anni Yaaqoobii baddito'o.

³⁶Yaaqoobim ixxuwwina «Eese oos bee'i matayyichchi issitakkeena hassakkamuullannihe? Yooseef bee'e Simi'oon bee'e; kaba odim Biiniyaama massitakkeena hassakkamuulla; ku hawwi hundim eesenne afaakko» yukko.

³⁷Roobeelim ixxi annina dabaraa «Biiniyaama ki beyyo dabaraa worumbeelas iikka lamem oosom shihe; ihukkaarem Biiniyaama iina uwwe anim ixxo kiina dabaraa woroommo» yukko.

³⁸Ihukkaarem Yaaqoob «I beet kiinninne maqire marooyyo; ixxi abbaayyi lehaakko; gatukkokim xale'i ixxotte; ixxim googonne matisa ihukkaare an ka lommannanonne i beet bikkina kichchechchinne wiiddanne dilloommisa issitootto» yukko.