Read Hadiyya Qooccanchi Kitaaba 43 Bible Online

Qooccanchi Kitaaba 43 - Hadiyya bible

Qooccanchi Kitaaba 43

¹Kana'aa'n uullanne sibaar qoxxukkuuyyi marukko.

²Gibxi uulliinsi aa'lla'a eebbo'i hurbaat beeddu bikkina ixxuwwi anni «Odim daba'llitakka'a Gibxi uulla mallehe; hoffi hurbaatam bito aa'llakka'a waallehe» yukko.

³Yihudim «Oo manchi ‹Ki'nnuwwi hoffi abbaayyo amaddakka'a waattakkobeelas i illage hincitakkeena xantakkamoyyo› yaa qoxxaallisa wocaakko.

⁴Atimdu Biiniyaama niinninne marona uwwitlas daba'llinaa malloommo hurbaatam bitaa'nnoommo.

⁵Ixximdu niinninne marubeelas malloommoyyo; mashka'oomim oo manchi ‹Ki'nnuwwi hoffi abbaayyo eebbakkobeelas i illage hincitakkamoyyo› yaakko» yukko.

⁶Ixxuwwi anni Yaaqoobim dabaraa «Mahina mulli hoffi abbaayyi yookko yitakka'a kuttakko'o? Eesem kido'i hawwonne mahina aagissakko'o?» yukko.

⁷Ixxuwwim «Oo manchi ni bikkinaa ni abaroos bikkinaa lobakata qoxxaallisa xa'mmukko; odim kabadem ‹Ki'nnuwwi anni foorinne yoohonnihe? Ki'nnuwwi mulli abbaayyi yoohonnihe?› yukko. Neesem xa'mmu xa'mmichchi bikkina Biiniyaam woshshaa ki woshshaa kullummo; ixxi ki'nnuwwi abbaayyo eebbehe yoo'isa neese maha lanqaate?» yita'a annina dabatto'o.

⁸Yihud ixxi anni Isra'eelina «Biiniyaam niinninne maqire maroo'isina i anganne uwwe; neese amandaa malloommo; oo beelas neese, atii mi'n abaroosii hundim sibaarinne lenoommo.

⁹An Biiniyaam bikkina lubbat ihoommo. Matem luwwim ixxo nakkooyyo; an dabaraa ixxo ki illagenne uullisoommo; animdu kaka issumbeelas doolli hundinam keese hawwodaammoohan ihane.

¹⁰Kabe'e afeebe'e ka beyyonne ammane bi'insumbeeta'n eekke'e amfaa la'mmaagge daba'llinam hee'nnummo» yukko.

¹¹Ixxuwwi anni Isra'eelim ixxuwwina «Woshshoom danaamo; ka'isa ihulas an ki'nnuwwina kuroommi luwwa issehe; ka uullanne mutoo luwwi hundiinsim danaam ihukkoka moo'llakka'a hofqax marabo, lobakata enje'oo enjuwwika shitto'oo karbe'ee itakkam mishika tamiraa lawzaa ki'nnuwwi cananne issitakka'a ee manchina irifo'o massitakka'a uwwehe.

¹²Odim hurbaata aa'llakkeena amaddakko'i diinatenne eddakka'a lam suume issitakka'a amaddehe; mashka'oomim ee ca'n suumenne ihaa daba'llu diinate dabattakkamo; ayyi la'ukko huushanchinne daba'llaakkoohan ihookko.

¹³Ki'n abbaayyi Biiniyaamam amaddakka'a mallehe; ee manchinnem edammehe.

¹⁴Hundam xanoo Waa'i Biiniyaamaa ee beyyonne karamu ki'nnuwwi abbaayyoo ki'nnuwwinne maqire daba'llitamisina ee manchi wodano qacisona; anim i ooso hoogummisam gateenatte» yukko.

¹⁵Ee lasage Yaaqoob oos lam suum issita'a amaddo'i diinatee Biiniyaamaa amadda'a Gibxi uulla matto'o; eekke'e affa'a Yooseef illagenne uullito'o.

¹⁶Yooseefim Biiniyaama ixxuwwinne maqire moo'u ammanenne ixxi mi'n baxaa'n ijaajaanchina «Ee manna i mi'n kollo masse durakkam diinatikam duttaatta itakkam hurbaata gudise mashka'oomim ku manni balli hurbaata iinninne ittamo» yukko.

¹⁷Ee bikkina Yooseef awwaadaanchi Yooseef yukkisam issukko; ee mannam Yooseef mine aagisukko.

¹⁸Oo mannim Yooseef mi'n awwaadaanchi ixxuwwa Yooseef mine aagisukkisa moo'llo'i ammane baddita'a mat matina «Neese ka beyyo eebu mashka'i luxxeka waallummi ammane ca'n suumenne issakka'a daba'llu diinat bikkina ku manchi neesenne jolle isseenatte, dangonnem ixxi neese agid issaa ni hallam ixxi gagina massaqeenatte» yito'o.

¹⁹Ixxuwwim Yooseef mi'n awwaadaanchi beyyo hincita'a u'llummi goocanne ikka'a ixxena

²⁰«Ni moollanna luxxeka neese hurbaata bitaa'nneena ka beyyo waallaa hee'nnummo.

²¹Galloommi mi'n kollonne daba'llinaa uulli hiimukkaare gattina usheexxinaammoo beyyonne aa'nnaa waallummi hurbaaxxi cana tillaa moo'nnummo; ee ammanenne annannichchikim uwwinummi diinat hundim daba'llaakkookoka ca'n suumenne siindummo; ihukkaarem kaba daballaa wollaammo.

²²Odim mulli diinate hurbaata bitaa'nneena eembaammo; hinki manchi ni ca'n woronne ni diinate dabaraa issuda'e neese lanqummoyyo» yito'o.

²³Yooseef mi'n awwaadaanchim dabaraa «Eehannina sawwitakkotte, badditakkotteme; ki'nnuwwi Waa'ii ki'nnuwwi anni Waa'ii ki'nnuwwi ca'n woronne diinate dissaakko; ee bikkina ki'nnuwwi miqqakko'oka an aa'aammo» yukko. Ee lasage Simi'oona ixxuwwi beyyo worukko.

²⁴Oo awwaadaanchim ixxuwwa Yooseef mine aagisaa lasage lokko aanshaqqitam wo'o uwwukko.

²⁵Ixxuwwim Yooseef balli hurbaata ixxuwwinne maqire iteena waaroo'isa laqqo'i bikkina ixxena uwwiteena eebbo'i irifo'o gudisso'o.

²⁶Yooseefim waaraa mine aagu ammanenne amadda'a hee'llo'i irifo'o ixxena hincaa'lla'a ixxi illagenne otossito'o.

²⁷Ixxim ixxuwwa xummaatisaa lasage «Ki'nnuwwi lommanchi anni bikkina kuttakka'a hee'llakko'o; ixxi xummannihe? Kabadem foorinne yoohonnihe?» yaa xa'mmukko.

²⁸Ixxuwwim «Eeyya ni moollanna, niyyanni kabee'i afeebe'em foorinnem yookko; ixxim fayya'a» yita'a ixxena heeshito'o.

²⁹Yooseefim ixxi am beeto Biiniyaama moo'aa «Kuttakko'i ki'nnuwwi hoffi abbaayyi kanennihe?» yaa xa'mmaa lasage Biiniyaamina «I beeto, Waa'i keese maasse'ona» yukko.

³⁰Yooseefim ixxi ambeet qulunxi xansiisubee'i bikkina maaxamaa wi'lleena hasukko; ee bikkina qaqqisaa ixxi iinse'oo du'm woronne aagaa eekke'e wi'llukko.

³¹Ee lasage ille aanshaqqaa ixxuwwi beyyo waarukko; ixxi wodanom qoxxisaa itakkam hurbaata hincaa'llona ixxi baxaano ijaajukko.

³²Ixxuwwim itakkam hurbaata eebba'a Yooseefina annannam uwwito'o; ixxi abbaayyuwwinam annannam mulli beyyonne uwwitto'o; ixxenne maqire hee'llo'i Gibxi uulli manninam annannam uwwito'o; mashka'oomim Gibxi uulli manni losa'nnisanne Ibro'i manni Gibxi uulli manninne mateeyyoomanne hurbaata ittambee'i bikkina eehido'i luwwi ixxuwwina haashaassoo luwwisa.

³³Yooseef abbaayyuwwim wona wo'nnisam, hoffoka hoffaannisam Yooseef baxaan afuussito'o; mannim ixxuwwa afuussito'isa moo'llo'i ammanenne ixxuwwina'i ixxuwwim lobakata maalalta'a moo'aqqanto'o.

³⁴Yooseef illagenne hee'u hurbaatiinsi ixxi abbaayyuwwina uwwito'o. Biiniyaamina uwwito'ok mulli keenina uwwito'aanniinsi onti suume lophphaakkoohan hee'ukko; ixxuwwim godditeebe'i afeebe'e itta'atii agga'atii Yooseefinne maqirem liiranto'o.