Read Hadiyya Qooccanchi Kitaaba 44 Bible Online

Qooccanchi Kitaaba 44 - Hadiyya bible

Qooccanchi Kitaaba 44

¹Yooseef ixxi mi'n baxaano baxisoo manchina «Ee manni cananne can aa'oo qax hurbaata wonshe; odim annannichchikam diinate ca'n suumenne isse.

²Hoffi beet ca'n suumenne iikka birinne baxamu humbullo hurbaaxxi woronne diinatinne maqirem isse» yaa ijaajukko; ixxim Yooseef yukkisa issukko.

³Soodaraar daram abbaayyuwwi ixxuwwi halla amaxxita'a mattamisa issukko.

⁴Beero'iinsi hofqaxa qee'llito'isam Yooseef ixxi mi'n awwaadaanchina «Ee manna laseese ixxuwwam affoo ammane ‹Danaamina jora dabattakko'ok mahinatte?

⁵Mahina i moollannika bi'l humbullo game'llakko? Oo humbulli ixxi agoohanee qooroominne daphphu luwwa la'oohaneyyonnihe? Ki'nnuwwi eehid issimminne lobakat jolle baxxakko'ookko» yitaa xa'mme yukko.

⁶Baxaanchim afaa amadu ammane ka sagara dabaransaa wocukko.

⁷Ixxuwwim ixxena dabatta'a «Moollanna kido'i woshsha mahina woccoolla? Neese maham issinummoyyo; hassittaare neese hide'nnoommo.

⁸Ni ca'n suumenne siindummi diinate Kana'aa'n uulliinsi daballaa ki beyyo eembummisa at laqqootto; eehannah mahina ki moollanni miniinsi bira te'im worqa game'nnoommo?

⁹Niinniinsi matonne siidamukkaare ixxi lehona; odim gantummi qax kiina agid inkoommo» yito'o.

¹⁰Ixxim «Iitamoommo ihukkaarem humbullooma massu manchi ixxi i agishshi ihookko; gattakko'i qax xumminnem mattakkamo» yukko.

¹¹Ixxuwwim qaqqissa'a halliinsi iyyo uullanne dilliissa'a annannichchim ixxuwwi gaqqi cana titto'o.

¹²Yooseef awwaadaanchim woniinsi ki'isaa ilmuchchaannonne afeebe'e danaamisa issaa hasaa humbullooma Biiniyaam ca'n woronne siidukko.

¹³Ixxi abbaayyuwwim kichche'lla'a ixxuwwi eddechcha dereetto'o; hurbaatoomam hallanne iyyiissa'a beero'i kollonne daba'llito'o.

¹⁴Yihudii ixxi abbaayyuwwii Yooseef mine aaggo'i ammane ixxi minennem hee'ukko; ixxuwwim ixxi illagenne uullanne ubba'a otossito'o.

¹⁵Yooseefim «Ku issitakko'i luchchi maruchcho? An qooroominne kido'i daphphu luwwa la'oommisa laqqakkamoyyonnihe?» yukko.

¹⁶Yihudim «Moollanna kiina mayyinoommo? Maha woncoommo? Te'im hinkid issinaa ni gaga muccur issinoommo? Waa'i ni baaxiilo biir issaakko; kaba ixxonne humbulli siidamukkan xale'i ihoo'n neese hundim ki agido» yukko.

¹⁷Yooseefim «Eehideyyo; an ee'isa issoommoyyo; xale'i humbulli siidamukkok i agishshi ihookko; gattakko'i qax ki'nnuwwi anni beyyo xumminne mallehe» yukko.

¹⁸Yihud Yooseef beyyo hincaa «I moollanna at Fari'oonisam ikkitti bikkina iinninne quuqqitte; an kiinninne wocoommo.

¹⁹At ni moollanni ‹Ki'nnuwina annii mulli abbaayyii yoohonnihe?› yitaa neese xa'mmitto.

²⁰Neesem ‹Eeyya, lommanchi anni yookko; ixxim lommannanonne qaraakkoo beet yookko; ixxi abbaayyim lehaakko; ixxim amana matome annim ixxo lobakata iittoohane› yinummo.

²¹Ni moollanna atim ‹Ixxo moo'oommo i beyyo eebbehe› yitto.

²²Neesem ‹Beet anniinsi annanni iheena xanooyyo; ixximdu annanni ihulas anni lehookko› yinummo.

²³Ee lasage at ‹Ki'nnuwwi hoffi abbaayyi ki'nnuwwinne maqire waarubeelas la'mmaagge i illagenne hincitakkamoyyo› yitaa qoxxissitto.

²⁴«Neesem niyyanni beyyo daba'llinaa mallummi ammane at yittoka ixxena kullummo.

²⁵Niyyanni odim ‹Mattakka'a hofqax hurbaatam bitaa'llehe› yukko.

²⁶Neesem ‹Malloommoyyo; hoffi niyyabbaayyi niinninne maqire marulas malloommo; ee beelas ee manchi illagenne hincineena xannoommi bee'i bikkina malloommoyyo› yinummo.

²⁷Niyyannim niina ‹I meentichcho Raaheele iina xale'i lam ooso qatto'isa laqqakkamo.

²⁸Ixxuwwiinsim mat bi'ukko. Ixxom moochchi muransaa ituda'e ixxi marukkaaniinsi kid an ixxo moo'ummoyyo.

²⁹Kaba odim kaka iinniinsi annanni issitakka'a massitakka'a matisa ihulas an lommannanonne i beet bikkina kichchechchinne lehoommo› yukko.

³⁰Moollanna kaba odim an ka beeto amadoo'n iyyanni beyyo daba'llummaare beet iinninne maqire bee'isa moo'ulas lehookko; mashka'oomim ixxi ka beeto lobakata iittoo bikkina ixxi bee'eka hee'eena xanooyyo. Neesem ixxi kichchechchinne lehona mashka'i inkoommo.

³²An ka beet bikkina lubbat ihaammo mashka'oomim an iyyannina ixxomdu dabarumbeelas ixxi xiiga i angiinsi hase; animdu kaka issumbeelas doolli hundannem keese hawwodaammoohan ihane» yaammo.

³³Ee bikkina i moollanna, an ixxi bikkenne agishshi ihaa afuuroommo; ku beet ixxi abbaayyuwwinne maqirem marona.

³⁴Oo beelas ixxo amadoo'n iyyanni beyyo hinkid ihaa daba'lloommo iyyannanne afoo hawwo iyyeena xanoommoyyo» yukko.