Read Hadiyya Qooccanchi Kitaaba 45 Bible Online

Qooccanchi Kitaaba 45 - Hadiyya bible

Qooccanchi Kitaaba 45

¹Yooseef ixxi beyyonne uullito'i manni illagenne lobakata ixxi gaga egexxeena xanukkoyyo; ee bikkina hundim ixxi beyyiinsi fittona ijaajukko. Yooseefim ixxi abbaayyuwwina ixxi ayyetda'e ihukkisa kuru ammane ixxenne maqire ixxi abbaayyuwwiinsi bagaan ayyi manchim hee'ukkoyyo.

²Ixxim sagara fissaa wi'llukko. Gibxi uulli mannim macceesso'o; woshshoomim Fari'oon beyyo afukko.

³Yooseefim ixxi abbaayyuwwina «An Yooseefatte iyyanni kabadem foorinne yoohonnihe?» yukko. Ihukkaarem ixxi abbaayyuwwi kaka macceesso'i ammanenne lobakata muggitta'a hee'llo'i bikkina maham dabatto'oyyo.

⁴Yooseefim ixxi abbaayyuwwa «I beyyo hinci'llehe» yukko; ixxuwwim ixxi beyyo hincita'a lasage ixxuwwina «An Gibxi uullina ki'nnuwwi biteessakko'i ki'nnuwwi abbaayyi Yooseefatte.

⁵Kaba ki'nnuwwi eese kabeyyina biteessakko'i bikkina gaabbitakkotte te'im kichche'llakkotte; mashka'oomim Waa'i manni foore gatiseena hasu bikkina ki'nnuwwiinsi gaassaa eese asse'aakko.

⁶Uullanne sibaar aagukkaanniinsi kuk la'm hiincho; abuullakkambee'ekii murakkambee'ekkii onti hiinchi gataakko.

⁷Waa'i gaassaa ki'nnuwwaa ki'nnuwwi shumo'oo gatiseena sawwaa eese asse'ukko.

⁸Hanqinam ki'nnuwwi eese kabeyyo asse'llakko'oyyo. Ihukkaarem Waa'i eese asse'ukko; Fari'ooninam sogoo annisa ihoommisa issukko; anim ixxi mininaa luwwi hundinam gassaancho, odim Gibxi uulli hundam gassoommane.

⁹«Kabadem qaqqissakka'a iyyanni beyyo daba'llehe; ixxenam ‹Waa'i eese Gibxi uulli hundam gassaanchi issaakko; ee bikkina qaqqissaa i beyyo waare.

¹⁰At ki oosoo ki oos oosoo ki gereebbaa ki fella'aa ki laroo kiina yoo luwwi hundam amaddaa waare; iina abbis beyyonne Geeseemanne hee'llootto.

¹¹Geeseemanne ikkittaare an kiina hasisoo luchchi hundam issoommo; kabadem onti hiinchi sibaar yoo bikkina kiina, ki abaroosinaa ki horinaa sibaattakka'a letakkambee'isa an hurbaata uwwoommo› yaakko yitakka'a kullehe» yukko.

¹²Odim Yooseef «Hanqoominam wocoommok an Yooseefatte ihummisa ki'nnuwwi illi moo'aakko; iyyabbaayyi Biiniyaamim moo'aakko.

¹³Mattakka'a iyyannina an Gibxi uullanne hinkaa'n nuurinne yoomda'e moo'llakko'i luwwi hundam ixxena kullehe; iyyannam qaqqissakka'a i beyyo eebbehe» yukko.

¹⁴Ixxim wocaa gullaa lasage ixxi abbaayyi Biiniyaam gaanje qaaphphaa wi'llukko; Biiniyaamim ixxo qaaphphaa wi'llukko.

¹⁵Odim gatto'i ixxi abbaayyuwwi hundam qaaphphaa wi'llukko; ee lasage ixxi abbaayyuwwi hundim ixxenne maqire atooratto'o.

¹⁶Fari'oonim Yooseef abbaayyuwwi ee beyyo waatto'isa macceesaa liiramukko; ixxi beshshuwwim liiranto'o.

¹⁷Fari'oonim Yooseefina «Kiyyabbaayyuwwi hallanne hurbaata iyyiissa'a Kana'aa'n uulla daba'llitamisina kure.

¹⁸‹Ki'nnuwwi annaa ki'nnuwwi abaroosaa ammaddakka'a ka beyyo daba'llehe; an ki'nnuwwina Gibxi uullanne danaam harish beyyo uwwoommo; ka uulli danaam hurbaatam ittakkamo› yaakko yitaa kure» yukko.

¹⁹Odim adil «Atim ixxuwwina Gibxi uulliinsi faraxxi gaare'e amadda'a matta'a ixxuwwi meentoo hoffi oosoo annaa saa'llissa'a ka beyyo eebbona kure.

²⁰Odim ixxuwwi ee beyyonne yoo ixxuwwi luwwina kichche'llambee'isa kure; ixxuwwi Gibxi uulla affam ammane danaam luwwi hundim ka beyyonnette» yukko.

²¹Isra'ee'l oosim Fari'oon ixxuwwina yukkisam issito'o; ee ammanem Yooseef Fari'oon ijaaccisa Faraxxi gaare'uwwaa gooqqi sinqaa ixxuwwina uwwukko.

²²Odim hundinam haareechchi eddechcha uwwukko; ihukkaarem Biiniyaamina sas xibbi kin biraa onti haareechchi eddechchaa uwwukko.

²³Ixxi anninam Gibxi uulli danaam luwwiinsi tommi hallanne iyyiisukko; odim gooqqi sinqinam daabbo'oo wix hurbaataa tommi meenti hallanne iyyiisukko.

²⁴Oo hundim gudaa lasage Yooseef ixxi abbaayyuwwa geegeesaa daba'llu ammane ixxi abbaayyuwwina «Googonne jorantakkambee'isa» yukko.

²⁵Yooseef abbaayyuwwim Gibxi uulla utta'a Kana'aana daba'llita'a ixxuwwi anninne edanto'o.

²⁶Ixxuwwim ee beyyo affa'a lasage annina «Yooseef foorinnem yookko. Ixxim Gibxi uulli hundinam gassaanchi ihaakko» yita'a kutto'o. Yaaqoobim kaka macceesu ammanenne maggukko; ixxuwwam amma'nnukkoyyo.

²⁷Ihukkaarem ixxuwwi Yooseef kurukkoka hundam kutto'o; ixxim ixxo Gibxi uulla wottona asse'u faraxxi gaare'e moo'u ammanenne muggiinsi daba'llukko.

²⁸Isra'eelim «I beet Yooseef kaballi afeebe'e foorinne Yoolas ookki iina ihookko; an lehoo'n gaassaa ixxo moo'eena maroommo» yukko.