Read Hadiyya Qooccanchi Kitaaba 46 Bible Online

Qooccanchi Kitaaba 46 - Hadiyya bible

Qooccanchi Kitaaba 46

¹Isra'eela yamamu Yaaqoob ixxena yoo luwwi hundam wixxaa'aa amadaa Bersaabe'i beero'onne ixxi anni Yisaaq Waa'ina kitimukko.

²Ixxim ee beyyo afaa lasage Waa'i hii'm kaaltanne ixxena moo'amaa «Yaaqooba, Yaaqooba» yaa weeshukko. Yaaqoobim «An keyye yoommo» yaa dabarukko.

³Waa'im ixxena «An kiyyanni Waa'a; Gibxi uulla marimma boddititte; mashka'oomim ee beyyonne ki shumo'o lobakat minaadab issoommo.

⁴Ee Gibxi uullam an kiinninne maqire maroommo; odim an ki shumo'o ka uulla dabaraa woroommo; ki foor firukkuuyyi Yooseef ixxi anginne ki ille ifiisookko» yukko.

⁵Ee lasage Yaaqoob Bersaabe'e uraa marukko; ixxi oosim ixxuwwi oosoo ixxuwwi meentoo Gibxi uulli Fari'oon asse'u faraxxi gaare'enne afuussito'o.

⁶Odim ixxuwwi gereebbaa laroo Kana'aa'n uullanne ixxuwwina hee'u luchchi hundam amadda'a Gibxi uulla matto'o; Yaaqoobii ixxi abaroosim ixxuwwinne maqirem matto'o.

⁷Ixxi oosii ixxi oos oosii ixxi landik goo'n oosii landii ixxi shumo'i hundim ixxenne maqirem Gibxi uulla matto'o.

⁸Gibxi uulla maru Yaaqoob shumo'i kane; Yaaqoobina won beet Roobeelatte;

⁹Ixxi oosim Heenookatte' Faalu'atte' Heesiroonattee Kaarmi'attee hee'llo'o.

¹⁰Simi'oon oos Yimu'eelatte' Yaamiinattee Oohaadattee Yaakinattee Xoohaaratte' Kana'aa'n uulli meentichchoonsi qaramu Shaa'uulattee hee'llo'o.

¹¹Leewi'i oos Geershoontte, Qa'aatattee Maraarattee hee'llo'o.

¹²Yihud oos Eeratte, Oonaanatte, Sheela'atte, Faareesattee Zaaraahattee hee'llo'o. Eerii Oonaanii Kana'aa'nnanne uullanne hee'llo'i ammane leto'i keeno. Faarees oos Heesiroonattee Hamuulattee hee'llo'o.

¹³Yisaakoor oos Toollatte, Fuuwwatte, Yaashuubattee Shiimiroonattee hee'llo'o.

¹⁴Zaabiloon oos Seereedatte, Eeloonattee Yaahiila'eelattee hee'llo'o.

¹⁵Oo keen hundim lam daajji lambe'i uullanne hee'llo'i ammane Liya'a Yaaqoobina qatto'i keeno. Odim Diina yakkam landichchom qatta'a hee'llo'o; Liya'a Yaaqoobina qatto'i oos landii goonii hundim sadee sas horoore.

¹⁶Gaad oos Xaafoonatte, Hage'ette, Shuunatte, Eexboonatte, Eeratte, Aaroodattee Ari'eelattee hee'llo'o.

¹⁷Aseer oos Yimiinatte, Yishiwwatte, Yishiwiinattee Beeri'attee ikka'a ixxuwwi aayyam Seeraahattee hee'llo'o. Beere'i oos Heebeerattee Maaliki'eelattee hee'llo'o.

¹⁸Oo tommii lohem oosim Laaba'a ixxi landichcho Liya'ana uwwu agishsho Zalafaansi qaranto'i Yaaqoob shumo'i hee'llo'o.

¹⁹Yaaqoob meentichcho Raaheel oos Yooseefattee Biiniyaam attee hee'llo'o.

²⁰Gibxi uullanne Yooseef Heeliyoota yakkam beero'onne qeessichchi ihu Phooxiifaar landichcho Asnaateensi Minaasee Efireemaa lam ooso qarukko.

²¹Biiniyaam oos Beelatte, Beekeeratte, Asbeelatte, Geeratte, Naa'imaanatte, Eehatte, Rooshatte, Muufiimatte, Huufiimattee Araadattee hee'llo'o.

²²Oo tommii soorem oosim Raaheele Yaaqoobina qatto'i shumo'o.

²³Daan beet Huushumatte.

²⁴Niftaaleem oos Yaahixi'eelatte, Guni'atte, Yeexeerattee Shiileemattee hee'llo'o.

²⁵Oo lamarem oosim Laaba'a ixxi landichcho Raaheelena uwwu agishsho Baala'aansi Yaaqoobina qaramu ooso.

²⁶Yaaqoobinne maqirem Gibxi uulla matto'i Yaaqoob shumo'i hundoomim ixxi oos meenti bee'eka lohayyee loh horooree hee'llo'o.

²⁷Gibxi uullanne Yooseef lam ooso qarukko. Ee bikkina Yaaqoobinne maqire Gibxi uullanne hee'llo'i ixxi shumo'i hundoomim lamarayyi horoor hee'llo'o.

²⁸Hundiinsim gaassaa maraa Geesee'm uulla afoo'isinaa Yooseefinne edamaa kuroo'isinaa Yaaqoob Yihuda asse'ukko. Ixxuwwim Geeseema affo'o.

²⁹Yooseefim araxxi gaarre'e gudisaa anna aa'eena Geeseem afeebe'e marukko. Ixxim anna moo'u ammanenne annika gaanje qaaphphaa lobakat ammane wi'llukko.

³⁰Ee lasage Yaaqoob Yooseefina «At foorinne hee'llittuuyyi moo'umlas kaba lehane» yukko.

³¹Yooseefim ixxi abbaayyuwwinaa ixxi anni abaroosinaa «An Fari'oon beyyo maraa ‹Kana'aa'n uullanne hee'llo'i iyyabbaayyuwwii iyyanni abaroosii i beyyo waatto'ookko› yaa kuroommo.

³²Odim ki'nnuwwi allaaraan ikkakko'isaa ki'nnuwwi gereebbaa laroo ki'nnuwwina yoo luchchi hundam amaddakka'a waattakko'isaa kuroommo.

³³Faari'oonim ki'nnuwwa weeshoo ammane ki'nnuwwi bax maruchda'e xa'mmulas

³⁴oosoommaniinsi ki'isaa kabad afeebe'e gereebbaa laroo allaaraan ikkakko'isaa ki'nnuwwi anno'im baxxam hee'llo'i bax kanem ihukkisaa ixxena kullehe. Ka'isa issitakka'a lasage Geeseema yakkam uullanne afuuttakkamisa issookko» yukko. Yooseef ka'isa yu mashka'i Gibxi uulli manni illagenne gereebba allaaraan gadanto'oo manni ikko'i bikkinatte.