Read Hadiyya Qooccanchi Kitaaba 47 Bible Online

Qooccanchi Kitaaba 47 - Hadiyya bible

Qooccanchi Kitaaba 47

¹Yooseefim Fari'oon beyyo maraa «Iyyannii iyyabbaayyuwwii Kana'aa'n uulliinsi gereebba, fella'aa laroo ixxuwwina yoo luchchi hundam amadda'a waatta'a Geeseemanne yo'o» yukko.

²Ixxi abbaayyuwwiinsim onto Fari'oon illagenne hincaa'ukko.

³Fari'oonim ixxuwwa «Ki'nnuwwi bax maruchcho?» yaa xa'mmukko; ixxuwwim «Neese ki awwaadaan niyyanno'isam gereebba allaaraano.

⁴Ka uullanne koyyinano afuulleena waallaammo; mashka'oomim Kana'aa'n uullanne sibaar lophphaakko. Ni gereebbi itoo hixim bee'e. Kabadem keese uunxinoommok Geeseemanne afuulloommisa issitonatte» yito'o.

⁵Fari'oonim Yooseefina «Kiyyannii kiyyabbaayyuwwii ki beyyo waatto'ookko.

⁶Oono'o, Gibxi uulli ki angannette; at hassitti danaam hix yoo uullanne Geeseemanne kiyyannii kiyyabbaayyuwwii afuuttamisa isse; odim ixxuwwi lambe'iinsi annanni lachchi yoo keeno laqqilas i diinaxxi allaaraano ijaajjamisa isse» yukko.

⁷Ee lasage Yooseef ixxi anni Yaaqooba Fari'ooninne la'anisukko; Yaaqoobim Fari'oona maasse'ukko.

⁸Fari'oonim «Ki umur hinkaa'nna ihaate?» yaa xa'mmukko.

⁹Yaaqoobim «Iina mat xibbee sad hiinchoo ihaakko; i heechchi doollim hoffanee kee'mmaalla; iyyanno'i ixxuwwi doollenne koyyinano hee'llo'i qaxam hee'ummoyyo» yukko.

¹⁰La'mmaaggem Yaaqoob Fari'oona maasse'aa lasage annanni ihukko.

¹¹Yooseefim ixxi anninaa ixxi abbaayyuwwinaa Fari'oon ijaajukkisam Gibxi uullanne Raamse yakkam danaam uullanne beyyo uwwukko.

¹²Odim Yooseef ixxi annina, ixxi abbaayyuwwinaa ixxuwwi abaroosinaa hundinam ihoo hurbaata uwwakkamisa issukko.

¹³Uulli hundannem hurbaat bee'i bikkina kee'mmaalli sibaar hee'ukko. Gibxi uulli mannii Kana'aa'n uulli mannii ee sibaarinne hawwodanto'o.

¹⁴Yooseefim Gibxi uulli manninaa Kana'aa'n uulli manninaa hurbaata biteesimminne wixxaa'u diinat hundam Fari'oon mine aagisukko; Gibxi uullikii Kana'aa'n uullikii diinat hundim beeddu ammanenne Gibxi uulli manni Yooseef beyyo waatta'a «Niina hurbaata uwwe. Ni diinate guullinummi bikkina beeddineenatte!» yito'o.

¹⁶Yooseefim ixxuwwina «Ki'nnuwwi diinat hundim beeddulas ki'nnuwina yoo hora eebbehe; anim ee horinne dabassaa hurbaata uwwoommo» yukko.

¹⁷Ee bikkina ixxuwwi farado, gereebba, laroo hallaa eebba'a Yooseefina uwwito'o. Yooseefim ee maarage ixxuwwi eebbo'aanninne dabassaa hurbaata uwwukko.

¹⁸Oo hiinchi higaa la'm hiinchi waaru ammanenne ixxi beyyo waatta'a «Ni moollanna kiinniinsi maanxoommi luchchi bee'e; ni diinat beeddaakko; odim ni hor hundam kiina uwwinaammo ni gagiinsii ni uulliinsii bagaan hurbaata a'llinona niina gatu luchchi mahim bee'e.

¹⁹Neese lenona cawwitaa uttitte; mat luchcho isse; ni uullim bi'oone; neesee ni uullaa hurbaatinne bitaa'e; neesem Fari'oon agid inkoommo; ni uullim ixxan ihona; neese lenoombee'isa hurbaata uwwe; ni uullim wixamoo'n kora'a garoobee'isa sire'e uwwe» yito'o.

²⁰Yooseefim Gibxi uulli manni sibaar lophphu mashka'inne biteesso'i uulli hundam Fari'oonina bitaa'ukko; uullim Fari'oonan ihukko.

²¹Ixxim Gibxi uulli tochchiinsi tochchi afeebe'e mat idiinsi amadaa mulli idonne afeebe'e yoo manni hundam Fari'oonina agid issukko.

²²Yooseef aa'ubee'i uulli xale'i qeessuwwi uulla; mashka'oomim Fari'oon ixxuwwina aganina aganina ihoo qax hurbaata uwwam hee'u bikkina ookki ixxuwwi uulla biteessambee'isa hara'mmam hee'ukko.

²³Yooseefim ee mannina «Kaballa ki'nnuwwaa ki'nnuwwi uullaa an Fari'oonina bitaa'aammo; ee bikkina ka beyyonne sire'i yookko massitakka'a wixxehe.

²⁴Ihukkaarem hurbaatooma wixxaa'llakkam ammane ontiinsi matooma Fari'oonina uwwehe; gatu qaxoom sire'ina, ki'nnuwwi gaginaa ki'nnuwwi abaroosinaa hurbaat ihona» yukko.

²⁵Ixxuwwim dabatta'a «Ni moollanna ni foore at gatissaatto; neesem Fari'oonina agid inkoommo» yito'o.

²⁶Ee bikkina Yooseef Fari'oonan ihubee'i qeessuwwi uulliinsi bagaan wix hundiinsim ontiinsi mat suum Fari'oonina ihoo'isina Gibxi uullanne seera fissukko; oo seerim kaballi afeebe'em baxoolla.

²⁷Isra'ee'l minaadab Gibxi uullanne Geeseemanne afuutto'o; ee beyyonnem lobakat amaxxa siidda'a goddito'o; odim lobakat oosom qatto'o.

²⁸Yaaqoobim Gibxanne tommoo lamar hiinchoo hee'ukko; Yaaqoobikim heechchi doolli hundoomim mat xibbee soree lamar hiincho'o.

²⁹Yaaqoobim lehoo amman hincu ammanenne ixxi beet Yooseefa weeshaa «Animdu ki illagenne nuura siidaammoolas ki anga i gurubbonne issitaa eese ka Gibxi uullanne waammitoobee'isa hide'e.

³⁰An lehoommi ammane eese Gibxinsi massitaa iyyanno'i waammi yoo beyyonne waamme» yukko. Yooseefim dabaraa «At yittisam issoommo» yukko.

³¹Yaaqoobim dabaraa «Kaka issitoo'isina hide'e» yukko. Yooseefim ixxi yukkisam hide'ukko; ee lasage Yaaqoob ee beyyonne ixxi ara'anne afuurukkisam Waa'a galaxxukko.