Read Hadiyya Qooccanchi Kitaaba 48 Bible Online

Qooccanchi Kitaaba 48 - Hadiyya bible

Qooccanchi Kitaaba 48

¹Hofqax ammaniinsi lasage Yooseefina «Kiyyannina xissaakko» yakka'a kurakko'o. Ixxim lamem ixxi oosom Minaasee Efireemaa amadaa anna moo'eena marukko.

²Yaaqoobinam «Ki beet Yooseef waaraakko» yakka'a kurakko'o; Yaaqoobim ki'aa ixxi ara'anne afuurukko.

³Yaaqoobim Yooseefina «Hundam xanoo Waa'i Kana'aa'n uullanne Looza yakkam beyyonne moo'amaa eese maasse'ukko.

⁴Ixxim an keese mishaam issoommo; fikkaannisoommo; lobakat minaadaphphi dummichchisam issoommo; ka uullam kiinniinsi lasage doolliinsi doolli afeebe'e ki shumo'ina uwwoommo» yukko.

⁵«Kabadem an ki beyyo waareena illage Gibxi uullanne qaranto'i ki lamem oosim Efireemii Minaasee iihan ikkamo ixxuwwim iina Roobeelisaa Simi'oonisaa ikkamo.

⁶Ixxuwwiinsi lasage qattoo oosim kiihan ihona; ixxuwwim uulla baxxantamok lamem abbaayyuwwi summinnetteme.

⁷Anim Masphexoome'iinsi waarummi ammane Efiraata aageena hofqax gataakkoohaannonne googonne hee'ummuuyyim Kana'aa'n uullanne kiyyumma Raaheele leto'o; is bikkinam lobakata kichche'aa Efiraat googonne waammummo» yukko. Efiraatim kaba Beetaliheema yamamookko.

⁸Isra'eelim Yooseef ooso moo'aa «Kukeen ayyayyaamo?» yaa xa'mmukko.

⁹Yooseefim «Ku keen Waa'i ka uullanne uwwu i ooso» yukko. Ixxim «An maasse'oommo i kollonne hincaa'e» yukko.

¹⁰Isra'eelikim illi lommanna'n mashka'inne lobakata siidam hee'ukkoyyo; ee bikkina ixxi kollonne hincaa'ukkaare qaaphphaa suunqukko.

¹¹Isra'eelim Yooseefina «Ki ille moo'oommo yaa sawwummoyyi hee'ukko; ihukkaarem Waa'i odim ki shumo'om moo'isukko» yukko.

¹²Yooseefim ixxi ooso Yaaqoob gubeediinsi ki'isaak uullanne guruphphaa heeshukko.

¹³Yooseefim ixxi lamem oosom Isra'eel beyyo massukko; Isra'eel makki kollinne Minaase qeddi kollinne odim Efireema issaa ixxi kollonne hincaa'ukko.

¹⁴Isra'eelm lob beet Minaas horoorenne issimmi hasisam hee'u ixxi makki anga woroon higisaa hoffi beet Efireem horoorenne issukko; qeddi anga odim Minaas horoorenne issukko.

¹⁵Yaaqoobim Yooseefa «Iyyanno'i Abrihaamii Yisaaqii ixxi illagenne matto'ok, eesem hoffoomaniinsi ki'isaa kaballi afeebe'e allaaru Waa'i,

¹⁶eesem jor hundiinsim egeru Waa'i asse'amaanchi ixxi ka ooso maasse'ona; i summii iyyanno'ik Abrihaamikii Yisaaq summii ixxuwwinne weeshamona; uullannem lobakata fikkaannitona» yukko.

¹⁷Yooseefim ixxi anniixxi makki anga Efireemmanne issukkisa moo'u ammane liiramukkoyyo; ixxi anni makki angam Efireem horooriinsi ki'isaa Minaas horoorenne isseena ihukko.

¹⁸Anninam «Iyyanna, ee'isayyo won kane; ki makki anga kanni hanenne isse» yukko.

¹⁹Annim sabaa «I beeto, an la'oommo odim Minaas shumo'im lobakat minaadab ihookko; ihukkaarem hoffi abbaayyi ixxeensi lophphookko; ixxi shumo'im lobakat minaadab ihookko» yukko.

²⁰Ee balla ki'nnuwwi summinne Isra'ee'l oos ‹Waa'i keese Efireemisaa Minaasisaa issona› yita'a maasse'llamo yaa maasse'ukko; ee'isinne Yaaqoob Efireema Minaaseensi illag issukko.

²¹Ee Lasage Isra'eelim Yooseefina «An lehoommi amman hincaakko; Waa'im kiinninne maqire ihookko; kiyyanno'i uullam ki'nnuwwina dabarookko.

²²Anim Amoore'i manniinsi bisa'innee bagadinnee massummi duu'n gabonne yoo Seekeema yakkam harish uulla kiyyabbaayyuwwiinsi lonsaa kiina uwwaammo» yukko.