Read Hadiyya Qooccanchi Kitaaba 49 Bible Online

Qooccanchi Kitaaba 49 - Hadiyya bible

Qooccanchi Kitaaba 49

¹Yaaqoobim ixxi ooso hundam weeshaa «Wixxitakka'a i gadanonne hinci'llehe ka lasaqqi doollenne ki'nnuwwanne afoo luwwa ki'nnuwwina an kuroommo.

²«Ki'nnuwwi Yaaqoob oos wixxi'llehe; ki'nnuwwi anni Isra'eeliinsi macceessehe;

³«Roobeela at i won beeto, i malaayye iinam i gurubbiinsi fittitti luxxaneme; lombi awwonsaanchoo; malaayyinam awwonsaancho.

⁴Jambo'l wo'isa ikkitti bikkina awwonsaanchi ihimmi kiina ihooyyo; mashka'oomim at kiyyanni ara'anne fittaa kiyyanni bakki meentichchonne iinse'llaatto; i ara'am haashaassitaatto.

⁵«Simi'oonii Leewi'ii abbaayyuwwa; ixxuwwika boqqoo'm bisa'uwwam manna shimmina awwaaxxitamuulla.

⁶Ixxuwwi aranchanne i foor exxooyyo; ixxuwwi dummichchinne maqire i wodan mat ihooyyo. Mashka'oomim ixxuwwi quunqinne manna shito'ookko. Lobakat moolluwwam iiqansito'ookko.

⁷Ixxuwwi quunqi moochchisa ihu bikkina duumamaakkoohan ihona. Ixxuwwik nadajjim qishixxat bee'an hee'ukko. An ixxuwwa Yaaqoobanne baxxansoommo; Isra'eelannem binnaa'oommo.

⁸«Yihuda, kiyyabbaayyuwwi keese galaxxoolla. Ki angi ki maso'i hanennette; kiyyanni oos kiina otossitamo.

⁹Yihud hobbichchisa itoo luwwa shaa ixxi ma'nnanne massaa daabbaroo hobbichchisa. Maham daabbarukkaare ee beyyiinsi ixxo holleena ayyi xanookko?

¹⁰‹Gassaanchi ihukkok waareebe'e adilla'n bicci Yihudiinsi gassaa'n mugim ixxi shumo'i lambe'iinsi bee'ooyyo; minaadabim ixxena ijaajamoo'isa issookko.

¹¹Hallichchi geexa woyi'n xudinne hallichchi wotaram woyi'n geejji xudinne karookko. Ixxi eddechcham woyininne aanshookko. Hanenne edde'ookkokam xiiga laboo kashar woyininne aanshookko.

¹²Ixxi illim woyiniinsi lophphaa kashara. Ixxi inqim adiinsi lophphaa qadaalla.

¹³«Zaabiloo'n dambalaq tochchonne afuurookko; ixxim markabbuwwi uulloo beyyi ihookko. Ixxi uulli gabalim Siidoon afeebe'e afookko.

¹⁴«Yisaakoor miqe qoxxaalli hallichcho. Ixxim gereebbi oroxxi lambe'enne usheexxookko.

¹⁵«Oo usheexxu beyyim danaam ihukkisa moo'ukko. Oo beyyim harish uulli ihukkisa moo'aa ixxi gudumo iyyina heeshaa'ukko. Agixxisam kee'mmaalli baxo baxookko.

¹⁶«Isra'ee'l moolliinsi matisa Daan ixxi moollonne oogatookko.

¹⁷«Daan googonne yoo hamashshichchisa; gooqqi inqennem jor qubaam qasoo hamashshisa farashshi qubinne qasaa dimisookko; Farashshaanchim afaree'n kollonne ubukko.

¹⁸«I Moollanna ki gatishsha egeroommo.

¹⁹«Gaad moollonne lobakat gaadaan gaaddamo. Ixxim odim hollamaa ixxuwwanne gaadookko.

²⁰«aseer hurbaata goddaancho; adilluwwina liiransoo hurbaata uwwookko.

²¹«Niftaaleem tiramaa taakke'ukkuuyyi hee'oo mishisoo wotalla qaroo kukkussichchisa.

²²«Bu'i gadanonne mishoo haqqichchisa Yooseef mish wo'mmaakkoo haqqichcho; ixxi caafim haraara.

²³Ixxom xiyyinne hollansitu'uuyyi hasso'o; qasso'ome ixxom sabbo'o.

²⁴Ihukkaarem ixxi xiyyi hore'em ubukkoyyo. Oo Isra'eela egeraanchi kiina hara'mmookko. Ixxi angi Yaaqoob malaayyaam Waa'inne qoxxukko.

²⁵Keese hara'mmu kiyyanno'i Waa'i keese maasse'u hundam xanoo Waa'i Iimaniinsi waaroo luwwinnee uulliinsi firoo luwwinnee keese maasse'ookko. Ki anuu'n adoo ki godaphphi misham maasse'ookko; keesem maasse'ookko.

²⁶Kiyyanni maassi geejjuwwi ihu duunnuwwiinsi lobane. Doolliinsi doolle hee'oo duuniinsim ixxi maassi lobane; Ixxi abbaayyuwwi lambe'iinsi ixxi doo'llamaakkoohane. Oo maassim Yooseefina ihona.

²⁷«Biiniyaam sibaaraa itoo orokkichchisa; ixxim shaa eebukkoka soodaraaronne itukko. Hiimom shaa eebukkoka annanni issaa dissukko» yukko.

²⁸Ku keen tommoo lam Isra'ee'l mooll, ixxuwwinam ixxuwwi anni annannichchinam hasisoo maasso maasse'ukko.

²⁹Ee lasage ka'isa yaa ixxuwwa ijaajukko; «An lehoommi ammane i leesha iyyanno'i waamminne maqirem Abrihaam Hiitekkichchi efrooniinsi uullinnem edaa aa'u makkaa'n beyyonne waammehe.

³⁰Ixxim Kana'aa'n uullanne Maammire yakkam beyyi illagenne yoo Maakfee'l Daawwa'a; oo beyyim Abrihaam Hiitkkichchi Efirooniinsi waammi beyyi ihona aa'ukkane.

³¹Abrihaamii ixxi meentichcho Saara'aa ee beyyonne waammamto'o; Yisaaqii ixxi meentichcho Irbiqam eekke'em waammamto'o. Eehanniinsi odim i meentichcho Liya'a an waammummo.

³²Oo waammi beyyi ee balla Hiite'i oosiinsi bitaa'amaakkoohane» yukko.

³³Yaaqoobim ijaajo oosina kuraa guullu ammanenne ixxim ara'anne iinse'aa lasage foor firukko. Ixxi moollonnem exxukko.