Read Hadiyya Qooccanchi Kitaaba 50 Bible Online

Qooccanchi Kitaaba 50 - Hadiyya bible

Qooccanchi Kitaaba 50

¹Yooseef ixxi anni lehukkisa moo'u ammanenne ixxi anni leeshanne ubaa suunqukkuuyyi wi'llukko.

²Ee lasage Yooseefim Gibxi uulli losa'nnisam ixxi anni leesh boboobee'isa qararinne gokkisoo qaraa'l manna ijaajukko, qaraare laqqam keenim Isra'eel leesha qaraarinne gokkisso'o.

³Ixxuwwim ixxi leesha sor balli afeebe'e qaraarinne gudissa'a guullito'o. Gibxi uulli mannim ixxena lamarayyi balla wi'llito'o.

⁴Wi'llimmi ayyaamim beeddaa lasage Yooseef Fari'oon gassaanino issu keenina «He'i Fari'oonina.

⁵‹Iyyanni leheena illage Kana'aa'n uullanne ixxena gudu beyyonne ixxo waammona hidiisaakko› ee bikkina iyyanna waammaa daba'lleena maroommo» yukko.

⁶Fari'oonim dabaraa «Mare hide'llittisam kiyyanna waamme yaa» yukko.

⁷Ee lasage Yooseef ixxi anna waammeena marukko. Fari'oon gassaan issu keen, adi'l mi'n gatte awwonsaanii Gibxi uulli lommannii hundim Yooseefinne maqirem matto'o.

⁸Yooseef abaroos' ixxi abbaayyuwwii ixxi anni abaroosii hundim ixxenne maqirem matto'o. Geeseemanne xale'i hoffi oosiinsi, ixxuwwi gereebbiinsi, fella'iinsii lariinsii bagaan ayyim gatukkoyyo.

⁹Faradonnee gaarre'ennee afuutto'i mannim ixxenne maqire matto'o. Maru mannim hore'em lobakat hee'ukko.

¹⁰Ixxuwwim Yoordaanoos daajji eeqidonne «Axaad» yakkam oodo'o affa'a sagara fissita'a wi'llito'o. Yooseefim ixxi annina lamar balla wi'llishukko.

¹¹Ee uullanne hee'llam Kana'aa'n manni Axaad oodo'onne ihu wi'llo moo'lla'a Gibxi uulli manni lobakata xishshita'a wi'llitamuulla yimminne ee beyyika summa «Gibxi uulli manni wi'llishshi beyyo» yita'a weeshsho'o. Ixxim Yoordaanoos gadanonnette.

¹²Yaaqoob oosim ixxuwwi anni ijaajukkisa issito'o.

¹³Ixxi leesha Kana'aa'n uulli afeebe'e iyyita'a Maammire'i hujuphphi gadanonne yoo Maakfeela yakkam daawwa'anne waammito'o. Oo beyyim Abrihaam keexekkichchi Efrooniinsi waammi beyyi ihona aa'u uulla.

¹⁴Yooseefim anna waammaa lasage Gibxi uulla daba'llukko. Ixxi abbaayyuwwii waammiseena matto'i mannii hundim ixxenne maqirem daba'llukk.

¹⁵Yooseef abbaayyuwwi ixxuwwi anni lehaa lasage «Ayyi la'ukko neese ixxonne issinummi jolle sawwaa neesenne baado dabarookko» yita'a baddito'i bikkina

¹⁶Yooseef beyyo «Kiyyanni leheena illageen niina

¹⁷‹Kiyyabbaayyuwwi keesenne issu jolle uraammo yihe yitakka'a kullehe› yukko. Ee bikkina neese keesenne issinummi jolle niina haafihe; neese odim kiyyanni Waa'ina ijaajammoommi keeno» yita'a ooso asse'llo'o. Yooseefim eekka macceesu ammanenne wi'llukko.

¹⁸Ee lasage Yooseef abbaayyuwwi ixxi beyyo waatta'a ixxi illagenne heeshita'a «Neese ki agido» yito'o.

¹⁹Ihukkaarem Yooseef ixxuwwina «Badditakkotte an Waa'ayyo.

²⁰Ki'nnuwwi eesenne jolle sawwitakko'o; ihukkaarem Waa'i kaballa ihukkisam lobakat minaadab gatoo'isa iina danaam luwwa issimminne dabarukko.

²¹Kabadem ihukkaare badditakkotte; ki'nnuwwinaa ki'nnuwwi oosinaa hasisoo luchcho an issoommo» yaa ixxuwwi wodano qoxxisukkoo liiraansukko.

²²Yooseefii ixxi anni abaroosii Gibxi uullanne afuutto'o. Yooseefim mat xibbee tommi hiinchoo hee'ukko.

²³Ixxim Efireem oosoo Efireem oos oosoo moo'eebe'e hee'ukko. Minaas beet Maakiir oosim Yooseef anganne qaranto'o.

²⁴Yooseefim ixxi abbaayyuwwina «An lehoommi amman afaakko; ihukkaarem Waa'i ki'nnuwwinne maqire ihookko. Ka uulliinsim fissaa Abrihaamina, Yisaaqinaa Yaaqoobinaa uwweena hide'u uulla ki'nnuwwina uwwookko» yukko.

²⁵Yooseefim Isra'ee'l minaadabina «Waa'i ki'nnuwwa ka uulliinsi fissoo ammane i miqe fissitakka'a amaddakka'a mallehe» yaa hidiisukko.

²⁶Yooseefim Gibxi uullanne mat xibbee tommi hiinchoo hee'aa lehukko. Ixxuwwim ixxi leesha shamoobee'isa issoo qaraarinne gokkissa'a Gibxi uullannem Saaxinanne issita'a dissito'o.