Read Hadiyya Qooccanchi Kitaaba 6 Bible Online

Qooccanchi Kitaaba 6 - Hadiyya bible

Qooccanchi Kitaaba 6

¹Manni shumo'i uullanne fikkaannukkuuyyi maru ammanenne landi qaramukko.

²Ee ammanenne annanni ikko'oo qooccanchuwwi[3] ee landika dano moo'llo'o; ee kee'n lambe'iinsim iittito'i keeninne eebaqqanto'o.

³Waa'im «Mannina foore uwwoo i Ayyaan manninne maqire heer heerina hee'ooyyo; manni lehoohan ihu bikkina kanniinsi eehid mat xibbiinsii lamiyyi hiinchiinsii loboka hee'ooyyo» yukko.

⁴Ee doollennee ee lasagem manni landiinsii ee annanni ikko'oo qooccanchiinsii hamaaranta'a qaranto'oo «Neefiliima» yakkam wodaam manni hee'llo'o; ixxuwwim gaassi doollenne qoxallaninne la'anto'oo keen hee'llo'o.

⁵Waa'i uullanne yo'i manni hundim lobakata boqqi ikko'isaa ixxuwwi sawwitim hundi ammanem xale'i jolli ihukkisaa moo'ukko.

⁶Ee bikkina manna qooccu bikkinaa uullanne hee'llamisa issu bikkinaa kichche'ukko; lobakatam gaabbukko.

⁷Ee bikkina «Waa'i an ixxuwwa qooccummi bikkina kichche'aammo; ee bikkina ka qooccummi mannaa diinatee biqinne shuritu'uuyyi mikmikitam qooccanchuwwaa cii'aa uulliinsi bi'isoommo» yukko.

⁸Ihukkaarem Nohe'e Waa'i illagenne nuura siidaa hee'ukko.

⁹Nohe'ek aganni kanniinsi woroon kitaabamukkane; Nohe'e ixxi hee'u doollenne hee'u manni hundiinsim loboka muccuraa boqqoomiinsi qee'llaakkoo manchoo hee'ukko; ixxim maroo googo hundoomam Waa'inne maqire issukko.

¹⁰Nohe'em Seema, Kaamaa Yaafeetaa sas goo'n ooso qarukko.

¹¹Ee ammane uullanne hee'oo manni hundim Waa'i illagenne jor hee'ukko; ku uullim boqoominne wo'mmaakkoohan hee'ukko.

¹²Waa'im ka uulla moo'ukko; ku uulli bi'aakkoohan ihukkisaa uullanne yoo manni hundim jollinne hee'oo'isaa moo'ukko.

¹³Ee bikkina Waa'i Nohe'ena «An manni shumo'o bi'iseena murte'aammo; ku uulli manni boqqoo'm baxinne wo'mmaakkoohan ihu bikkina manna ka uullinne maqirem bi'isoommo.

¹⁴Ihukkaarem at er haqqiinsi markaba baxe; ixxom woronne dut beyyi hee'oo'isa issitaa baxxanse; ee markaphphekam hanee woroo leeyyinne marage.

¹⁵Ixxekam qeeraa'llooma mat xibbee sadee sas meetiraa midaaxxi haraarooma lamiyyee lam meetiraa uullichchi qeeraa'llooma tommoo sas meetiraa isse.

¹⁶Ee markaphphekam iima'n kollo meeggaro'inne axise; gortannii iimanii edamoo beyyonne mat anga ihoo qax maskoota gatise; ee markabinam sas fooq hee'oo'isa isse; goocam midaaxxi kollinne fisse.

¹⁷Anim imaniinsi woroon fooraam luwwi hundam uulliinsi bi'iseena bichchi wo'o eeboommo; uullanne yoo fooraam luwwi hundim bi'ookko.

¹⁸Kiinninne maqirem hidi'l sagara aagoommo; atii ki meentichchoo ki oosii ki oos meentii markabanne aaggehe.

¹⁹«Kiinninne maqirem foorinne hee'llamisina maara edde'u fooraam qooccanchuwwika hundikam lam goonchoo lam meentichchoo massitaa markabanne aagise.

²⁰Foorinne hee'llamisina annanni annanni cii'iinsi annanni annanni diinatiinsii biqinne shuritu'uuyyi mikmikitam annanni annanni qooccanchuwwiinsii lam lam ki beyyo waattona.

²¹Ee'isam ki gaginaa ka qooccanchuwwinaa hundinam ihoo annanni annanni hurbaata ee markaphphi woronne wixxaa'e» yukko.

²²Nohe'em Waa'i ijaaju luwwi hundam issukko.