Read Hadiyya Qooccanchi Kitaaba 7 Bible Online

Qooccanchi Kitaaba 7 - Hadiyya bible

Qooccanchi Kitaaba 7

¹Nohe'e markaba baxaa guullaa lasage Moollanni Nohe'ena «Ka uullanne yoo manni hundannem xale'i at i illagenne muccur ikkaa moo'antitti bikkina ki mi'n abaroos hundam amaddaa markabanne aage.

²Muccur ihu diinatiinsi hundiinsim lamar goonchoo lamar meentichchoo kiinninne maqirem markabanne aagise; ihukkaarem muccur ihubee'i diinaxxeka mat goonchoo mat meentichchoo aagise.

³Cii'iinsim ixxuwwi sire'isam hundiinsim lamar goonchoo lamar meentichchoo markabanne aagise; mashka'oomim diinaxxek moochchikii cii'ikii sire'i ka uullanne gataa la'mmaagge sire'oo'isinatte.

⁴Lamar balliinsi lasage sor ballaa sor hiimoo ka uullanne xeena ga'nnsoommo; qooccummi fooraam luwwi hundam uulliinsi bi'isoommo» yukko.

⁵Nohe'em Moollanni ijaaju ijaajo hundam issukko.

⁶Bichchi wo'i uullanne waaru ammane Nohe'e loh xibbi hiinchi manchi hee'ukko.

⁷Nohe'e bichchi wo'iinsi gatimmina ixxi meentichcho ixxi oosoo ixxi oos meentoo amadaa markabanne aagukko.

⁸Muccur diinatiinsi muccur ihubee'i diinatiinsi cii'iinsii uullanne biqinne shurukkuuyyi mikmikoo qooccanchi hundiinsii

⁹lam lam ikka'a goonii meentii Waa'i Nohe'e ijaajukkisannem ixxenne maqirem markabanne aaggo'o.

¹⁰Nohe'ena Waa'i yukkisam lamar balli beeddaa lasage bichchi wo'i uullanne ga'nukko.

¹¹Nohe'e qaramukkaanniinsi loh xibbi hiincho ihaakkoohaannonne la'm agananne aga'nnaannonnem tommonnee lama'l ayyaamonnee uulli woriinsi dangonnem wo'i xooqaa firukko; iima'n gooccuwwim fooqukko.

¹²Xeenim uullanne sor ballaa sor hiimoo ga'nnukko.

¹³Ee xeen ga'nnimma asheeru ayyaamonne Nohe'ee ixxi meentichchoo ixxuwwi sasem oos Seem, Kaamii Yaafeetii ixxuwwi meentinne maqirem markabanne aaggo'o.

¹⁴Bii'l moochchiinsi, mi'n diinatiinsi, biqinne shuritu'uuyyi mikmikitam qooccanchuwwiinsii iimaninne bararoo cii'iinsii hundiinsim ixxuwwi sire'isam ixxuwwinne maqirem aaggo'o.

¹⁵Ee'isinne foor yoo luwwi hundiinsim lam lam ikka'a Nohe'enne maqirem markabanne aaggo'o.

¹⁶Qooccanchi hundam goonchoo meentichchoo ihimminne markabanne aaggo'ok Waa'i ijaajukkisinnette; aagga'a lasage Moollanni markaphpheka u'llumma xufukko.

¹⁷Bichchi wo'im uullanne sor ballaa sor hiim lobakata ga'nnukkuuyyi marukko; wo'ikim xillaalloom exxukkuuyyi maru bikkina markaba uulli haniinsi iim ki'isukko.

¹⁸Wo'i uullanne lobakata lophphukkuuyyii exxukkuuyyii maru ammanenne markabim wo'i hanenne chabbukkuuyyi marimma asheerukko.

¹⁹Wo'i iimaniinsi woroon yoo lob duunnuwwa maaxeebe'i afeebe'e xillaalli ihukko.

²⁰Wo'oomim duunnuwwiinsi iim higaa lamar meetir ihukko.

²¹Uullanne hee'u fooraam qooccanchi cii'i, fooraam diinat, moochchii mannii hundim mat luwwim gatoobee'isa lehaa beeddukko; uullanne mikmikoo qooccanchi hundim bi'ukko.

²²Uullanne hee'oo foor yoo luwwi hundim lehukko.

²³Waa'i uullanne hee'u fooraam qooccanchi hundam manna, diinate, biqinne shurukkuuyyi mikmikoo qooccanchaa cii'aa mat luwwim gatoo'n bi'isukko; lehiinsi gatukkok xale'i Nohe'ettee ixxenne maqirem markabanne hee'llo'i keenoo.

²⁴Wo'im mat xibbee ontayyi balli afeebe'ee uulla maaxukkisam hee'ukko.