Read Hadiyya Qooccanchi Kitaaba 8 Bible Online

Qooccanchi Kitaaba 8 - Hadiyya bible

Qooccanchi Kitaaba 8

¹Waa'i Nohe'ee ixxenne maqirem markabanne hee'u moochchaa diinatee hundam sawwukko; hafachchim uullanne hafachchoo'isa issukko; wo'im xa'ukkuuyyi marukko.

²Uulliinsi woroon yo'i xillaalli bu'uwwii iimanenne yo'i wo'i dilloo gooccuwwii hundim xufamukko. Xeenim iimaniinsi ga'nnimma urukko.

³Ee bikkina wo'i uulliinsi ballina ballina xa'ukkuuyyi maraa mat xibbiinsii ontayyi balliinsii lasage wo'i lobakata xa'ukko.

⁴Lama'l agananne tommonnee lama'l ayyaamonnee markab Araaraat duunnuwwaannonne mattonne afuurukko.

⁵Wo'im xa'ukuuyyi maru bikkina tommi aga'nnaannonne luxxi ayyaamonne duunnuwwi lud siidamukko.

⁶Sor balliinsi lasage Nohe'e baxu markaphpheka maskoota fooqaa'aa

⁷qooraantichcho fissaa asse'ukko. Qooraantichchim daba'llaa maroo'nnim wo'i uulliinsi beeddaa xoo'eebe'i afeebe'e ekkidii kidii bararukkuuyyi do'am hee'ukko.

⁸Hoffi ammaniinsi lasage Nohe'e wo'i uulliinsi sholle'uda'e moo'oo'isina handarekkichcho asse'ukko.

⁹Ihukkaarem wo'i uulli hundam ambaa hee'u bikkina handarekkichchi hancaacoo beyyo hoogaa Nohe'i markaphphi beyyo daba'llukko; Nohe'em ixxi anganne aa'aa markaphphi woronne aagisukko.

¹⁰Ee lasage Nohe'e lamar balli afeebe'e egeraa odim handarekkichcho asse'ukko.

¹¹Handarekkichchim suumenne wee'l buyyika lata amadaa uulli maaro'aakkoohaannonne Nohe'i beyyo daba'llukko; ee bikkina Nohe'e wo'i uulliinsi sholle'ukkisa la'ukko.

¹²Nohe'em lamar balli afeebe'e egeraa la'mmaaggem handarekkichcho asse'ukko; ixxim od Nohe'i beyyo daba'llukkoyyo.

¹³Nohe'e qaramukkaanniinsi loh xibbee mat hiinchoo ihu ammanenne luxxi agananne aga'nnaannonnem luxxi ayyaamonne wo'i uulliinsi gogukko; ee lasage markaphphi ifiishshaancho fooqaa'aa uulli gogukkisa Nohe'e moo'ukko.

¹⁴La'm aga'nnaannonne lammiyyennee lama'l ayyaamonnee uulli guullaa gogukko.

¹⁵Ee lasage Waa'i Nohe'ena

¹⁶«Ki meentichchoo oosoo oos meentoo amaddaa markabiinsi fire.

¹⁷Odim kiinninne maqire marikabanne yoo moochcha, cii'a, diinatee uullanne biqinne shurukkuuyyi mikmikoo qooccanchuwwaa hundam la'mmaagge uullanne fikkaannitammisna kiinninne maqirem fisse» yukko.

¹⁸Ee lasage Nohe'e Waa'i yukkoka macceesaa ixxi meentichcho, oosoo oos meentoo amadaa markabiinsi firukko.

¹⁹Moochchi, mi'n diinat, cii'ii uullanne biqinne shurukkuuyyi mikmikoo qooccanchii hundim ixxuwwi sire'isam markabiinsi firukko.

²⁰Nohe'em Waa'ina kitima hincaa'akkam beyyo axisukko; muccur diinatiinsii cii'iinsii sire'i hundiinsim mat mato massaa kiti'm beyyonne Moollannina kitima hincaa'aa shokkiisukko.

²¹Ee kiti'mmekim enji Waa'a liiransukko; ixxi tiironnem oosoommaniinsi ki'isaa mannik sawwit jor ihukkisa la'oommi bikkina «Manni bi'isu bi'ishshi bikkina la'mmaagge an uulla hore'em duumoommoyyo; kaba issummisa fooraam qooccanchi hundam od hore'em bi'isoommoyyo.

²²Uulli hee'oo doollenne hundannem wiximminaa murimminaa qiidinaa iibbinaa billinaa hagayyinaa hiiminaa ballinaa muramoobee'i amman hee'ookko» yukko.