Read Hadiyya Qooccanchi Kitaaba 9 Bible Online

Qooccanchi Kitaaba 9 - Hadiyya bible

Qooccanchi Kitaaba 9

¹Waa'i Nohe'ee ixxi oosoo «Fikkaannehe; uulli hundannem wo'mmehe.

²Mi'n diinat, cii'i, biqinne shuritu'uuyyi mikmikitam qooccanchuwwii qurxumme'ii hundim ki'nnuwwa baddimminnee muggimminnee hee'llona; hundim ki'nnuwi ijaacci woronne hee'llona.

³Ki'nuwwina uulliinsi mutoo luwwa hurbaatoomina ittakkona uwwummisam odim uullanne mikmikoo foorinne yoo luwwi hundam ittakkona uwwaammo.

⁴Ihukkaarem xiiqqi woronne foor yoo bikkina xiigaam maara ittakkotte.

⁵Ki'nnuwwik foor yoo xiiga an hanqinam hasoommo; moochchiinsii manniinsii hasoommo; manni hundiinsim mannika foore hasoommo.

⁶Manni qooccamukkok Waa'i kobi'llannetti ihu bikkina mancho shukkok hundim manni anganne lehookko.

⁷Ee bikkina «Ki'nnuwwi fikkaannehe; Barkattehe; uullanne hundannem wo'mmitakkamisina lobakat ooso qallehe; lophphehe» yukko.

⁸Ee lasage Waa'i Nohe'enaa ixxi oosinaa

⁹«An ki'nuwwinnee ki'nuwiinsi qaramoo shumo'innee hundinnem hidi'l sagara aagoommo;

¹⁰Ee'isam foor yoo cii'inne, mi'n diinattinne, bii'l moochchinnee ki'nnuwwinne maqirem markabiinsi firu fooraam luwwi hundinnee hidi'l sagara aagoommo.

¹¹An ki'nnuwwinne aagummi hidi'l saga'l mashka'inne ka lasage fooraam qooccanchi hundam bichchi wo'inne hore'em bi'isoommoyyo; ku uullim la'mmaagge bichchi wo'inne bi'ooyyo» yukko.

¹²Odim Waa'i «I lambe'ennee ki'nnuwwi lambe'ennee ki'nnuwwinne maqire yoo fooraam luwwi hundinnem doolli hundinam hide'oommi hidi'l mare'i kane.

¹³Waadamuuncho duubanne issoommo; ixxim uullina an aagummi hidi'l mare'e.

¹⁴Iimane duubinne ifiisaa waadamuunchi duubanne hanenne moo'amoo amman hundam

¹⁵ee ammane anim ki'nnuwwinnee fooraam luwwinnee hundinnem hide'ummi hidiro sawwoommo; la'mmaage bichchi wo'i fooraam luwwi hundam bi'isooyyo.

¹⁶Waadamuuncho duubanne moo'oommi ammane i lambe'ennee uullanne yoo hundem fooraam luwwi lambe'ennee yoo doolli hundinam hee'oo hidiro sawwoommo» yukko.

¹⁷Waa'im Nohe'ena «Ku waadamuunchi ihaannonnee uullanne yoo fooraam qooccanchi lambe'nnee issummi hidi'l saga'l mare'e» yukko.

¹⁸Nohe'ek markabiinsi fitto'i sasem oosim Seematte, Kaamattee Yaafeetattee hee'llo'o. Kaamim Kana'aanina anni hee'ukko.

¹⁹Uullanne hundannem yoo minaadab hundinam Nahe'ek sasem oosim anno'o.

²⁰Luxxekam woyina yakkam xuda kaasukkok abuullaanchi hee'u Nohe'ette hee'ukko.

²¹Mat balla woyi'n diqaasa agaa dimbaa leexa'am dukkaananne he'ukko.

²²Kana'aanina anni ihu Kaam waaraa ixxi anni leexa'am iinse'ukkisa moo'aa biira firaa lamem ixxi abbaayyuwwinam kurukko.

²³Seemii Yaafeetii ixxuwwi anni umba'adam xoo'isa macceesso'i ammanenne ixxi umba'adooma moo'llambee'isa afa'llaachcha matta'a weyyakka massita'a ixxi orachchonne eddeesso'o.

²⁴Nohe'em woyi'n diqaas dimbiinsi baqu ammanenne ixxi hoffi beet maha issuda'e macceesaa la'ukko.

²⁵Ixxim «Kana'aan duumamaakkoohan ihona; odim ixxi abbaayyuwwi agidina agishshi ihona.

²⁶Odim Seem Moollanni Waa'i maasse'amaakkoohan ihona. Kana'aan ixxena agishshi ihona.

²⁷Waa'im Yaafeetika uulla haraassona; Yaafeet shumo'i Seem shumo'inne maqirem mat ikka'a hee'llona; Kana'aanim ixxena agishshi ihona» yukko.

²⁸Bichchi wo'iinsi lasage Nohe'e sas xibbee ontayyi hiinchoo hee'ukko.

²⁹Ixxim honsi xibbee ontayyi hiinchoo hee'aa lehukko.