Read Hadiyya 2 Saamu'eel Kitaaba 1 Bible Online

2 Saamu'eel Kitaaba 1 - Hadiyya bible

2 Saamu'eel Kitaaba 1

¹Saa'ool lehaa lasage Daawiit Amaaleeq manna kaa'aa daba'llukko. Xiqlaagannem lam ayyaamo hosukko.

²Saxxi ayyaamonnem mat woraadichchi Saa'ool gaaxxi wiiddaniinsi ixxi beyyo waarukko. Ixxim kichchechchinne eddechcha dereeraa horoorennem buchcha laphphaa hee'ukko. Daawiit kolli hincaa uullanne aad heeshaa ixxena lomba uwwukko.

³Daawiitim «Hanniinsi waattitto» yaa xa'mmukko. Ixxim «Isra'ee'l gogoxxi wiiddaniinsi xoraa waarummo» yaa dabarukko.

⁴Daawiitim «Hino'o, or hinkid ihoolda'e kure» yukko. Ixxim «Ni gogot o'l beyyiinsi gibaakko. Ni manniinsim lobakat lehaakko. Saa'oolaa ixxi beet Yoonaataanam shakko'ookko» yukko.

⁵Daawiitim «Saa'oolii Yoonaataanii leto'isa hinkid laqqitto?» yaa xa'mmukko.

⁶Oo woraadichchim «An Gilbo'i duunanne hee'ummo; Saa'oolim bagaxxi qaalleencho bakke'aa uullaa hee'ukko; diina'i faraxxi gaarre'ii faradaanii ixxuwwi beyyo hincitu'uuyyi moo'ummo.

⁷Ixxim laso daba'llaa eese moo'aa weeshukko. Anim, ‹Yee!› yummo.

⁸Ixxim ‹At ayyette?› yaa xa'mmukko. Anim xa'mmu ammanenne Amaaleeq uulli manchi ihummisa kurummo.

⁹Ixxim ‹I kolli hincitaa eese shihe; lobakata mada aa'aammoo bikkina an leheenatte?› yukko.

¹⁰Anim ixxi koolli hincaa shummo; mashka'oomim ee beyyonne ubulas gatoobee'isa la'ummi bikkinatti hee'ukko. Ee lasage adilla'n mare'e ixxi horooriinsi laakkam angiinsi aa'ummo. I Moollanna! Ee keenom kuno'o kiina eebaammo» yaa dabarukko.

¹¹Daawiitim kichchechchinne ixxi eddechcha deree'llukko. Ixxenne maqire hee'llo'i keen hundim ee'isa issito'o.

¹²Ee oranne beeddito'i Saa'oolina, ixxi beet Yoonaataaninaa Waa'i gogot ikko'i Isra'eel hundinaa uulli hiimeebe'e soommanimminnee kee'mmaalli kichchechchinnee wi'llito'o.

¹³Daawiitim ixxena woshsha kuru woraadichcho «At hinka'i uulli mancho?» yaa xa'mmukko. Ixxim «An ki uullanne waaraanchi ihaa hee'oo Amaaleeq uulli manchi beeto» yaa dabarukko.

¹⁴Daawiitim «Eehannah Waa'i doo'llu adila hinkikid iggitaa shitto?» yaa xa'mmukko.

¹⁵Ee lasage Daawiit ixxi awwaadaaniinsi mato weeshaa «Shihe!» yaa ijaajukko. Oo manchim ee Amaaleeq uulli mancho aphphisaa shukko.

¹⁶Daawiitim ee Amaaleeq uulli manchina «Ka bichcha ki hanenne eebaqqittok at ki gagame. Waa'i doo'llaa adil issu mancho ‹Shaammo› yitaa wocimminne ki gaganne oogaxxitaatto» yukko.

¹⁷Daawiit Saa'oolinaa ixxi beet Yoonaataaninaa kichchechchinne sorukkuuyyi wi'llukko.

¹⁸Ee'isam xiyyi wi'llishsha yakkamoka Yihuxxi minaadabina losisakkamisina ijaajukko. Ookkim Yaashaar Kitaabanne kitaabamaakko.

¹⁹Daawiitim «Isra'eelaa, ki lombi duunnuwwanne oramaa lehaakko! Geedduwwi hinkid ka'isa ubbo'o!

²⁰Filisxee'm landi liiramoobee'isa ballachchamubee'i kee'n landim ilil yoobee'isa ka woshsha Geetanne woccakkotte! Asqaaloo'n googguwwannem alallaattakkotte.

²¹«Gilbo'i duunnuwwa! xeen te'im qiibat ki'nnuwwanne ga'nnoone; ki'nnuwwi abuullannem mahim mutoone. Mashka'oomim geedduwwi agir eekke'e sholle'nninne ubaakko. Saa'ool agirim Zaytinne shiinshanchiinsi gataakko.

²²Yoonaataan xiyyim shoo'n daba'lloobee'an Saa'ool bisa'im diina'a muransoohan geedduwwa aphphisaa iiqoohan Diina'am shoohan hee'ukko.

²³«Saa'oolii Yoonaataanii maalasiisoo iittinne hee'llo'o; lehonnem heechchannem annanni ikko'oyyo. Ixxuwwim gaaqichchiinsi loboka qare'aalluwwi Hobbichchiinsim loboka wodaammuwwi hee'llo'o.

²⁴«Isra'ee'l landa! Ki'nnuwwina mishisoo kashar eddechcha eddeesam hee'u worqinnem wereeggisam hee'u Saa'oolina wi'llehe.

²⁵«Oranne geedduwwi hinkid beeddito'o! Yoonaataanim lehaa ki duunnuwwanne ubaakko!

²⁶«Iyyabbaayyi Yoonaataana! An ki bikkina lobakata kichche'aammo; At iina er kobichchi hee'llitto. Ki iittim iina maalalsiisoohan hee'ukko; meenti iittiinsi loboka qoxxaalli hee'ukko.

²⁷‹Geedduwwi hinkid ubbo'o! O'l mu'utdu hinkid bi'ukko!›» yaa sorukko.