Read Hadiyya 2 Saamu'eel Kitaaba 11 Bible Online

2 Saamu'eel Kitaaba 11 - Hadiyya bible

2 Saamu'eel Kitaaba 11

¹Adilluwwi hiinchonne hiinchonne ixxuwwi losa'nnisam orina mattam qaraax agananne Daawiit gaaxxi awwonsaaninnee Isra'ee'l gogotinnee maqirem Yoo'aaba gaadisukko. Ixxuwwim Amoo'n gogota kaa'lla'a Raabaa yakkam beero'o kibbito'o; ihukkaarem Daawiit orina maroo'nnim Yerusaaleemanne hosukko.

²Mat ayyaamo maaro'i ballanne Daawiit balli diriichchiinsi ki'aa adi'lla'n minenne fooqanne firaa chirukkuuyyi mat danaam meentichcho orachcho aanshaqqitu'uuyyi moo'ukko.

³Ee bikkina ise ayyetda'e ikko'isa la'eena ixxi mat mancho asse'aa ise Eeli'aam landichcho Beersaabe'ettee Hiitekkichchi Ooriyo'i meentichchottee ikko'isa la'ukko.

⁴Isem ixxi beyyo eebakkona manna asse'ukko. Oo mannim ise ixxi beyyo eebo'aare isenne maqire iinse'ukko. Oo ammanim ise agananne meentiinsi waaroo luwwiinsi muccutto'oo amman hee'ukko. Ee lasage oo meentichcho mine daba'llita'a elle'llo'o.

⁵Hofqax ammaniinsi lasage lamfooratte ikko'isa laqqa'a manna asse'lla'a lamfoorette ihaammo yita'a Daawiitina kutto'o.

⁶Ee lasage Daawiit «Hiitekkichchi Ooriyo i beyyo asse'e» yaa Yoo'aab beyyo manna asse'ukko. Ee bikkina Yoo'aab Ooriyo Daawiit beyyo asse'ukko.

⁷Daawiitim Ooriy waaraa afukkaare «Yoo'aabii gogotii hundim xummannihe? O'l duuha'im hinkidette?» yaa xa'mmukko.

⁸Ee lasage Daawiit Ooriyina «Eehidette ihukkaa'lleensi ki mine mattaa usheexxe» yukko. Ooriyim Daawiit illagiinsi marukko. Daawiitim er hurbaata ixxena asse'ukko.

⁹Ihukkaarem Ooriy ixxi mine maroo'nnim adi'l lombi waardiyyinne maqirem adilla'n mi'n ooxxi goocanne iinse'aa garukko.

¹⁰Ooriy ixxi mine maroo'n gatukkisa Daawiit macceesaa «Lobakat ammane ki abaroosiinsi annanni ikkaa hee'llitto. Eehannah mahina ki mine mattittoyyo?» yaa xa'mmukko.

¹¹Ooriyim «Isra'ee'llekii Yihuxxi gaadaanii o'l beyyonne wiiddanta'a dukkaananne yo'o. Hidi'l Saga'l Saaxinim ixxuwwinnette. I gaaxxi awwonsaanchi Yoo'aabii ixxi gaadaa'n awwonsaanii udma'anne wiiddanto'ookko; eehaare an i mine maraa itimma, agimmaa i mi'n amannem iinse'immaa hinkid xanoommo? Kaka an hore'em issoombee'an ihummisa ki illagenne hide'oommo» yaa dabarukko.

¹²Daawiitim «Eehidette ihulas kaballa keyye hose; ihukkaarem soodo dabaraa asse'oommo» yukko. Ee bikkina Ooriy ee lamem ballam Yerusaaleemanne hosukko.

¹³Daawiitim Ooriyina hii'm hurbaaxxi maadda itisaa woyi'n diqqaasa dimbeebe'e agisukko. Ee hiimom Ooriy adilla'n mi'n waardiyyuwwi minenne dakka daqqaa iinse'aa garukko bagaan ixxi mine marukkoyyo.

¹⁴Daram Daawiit Yoo'aabina askura kitaabaa Ooriyonnem asse'ukko.

¹⁵Oo askurim «Ooriyo or iibbu kollinne bagaxxi miinsanne higoo'isa isse; ee lasage at lasinne gibbaa ixxi shakkamisa isse» yoohan hee'ukko.

¹⁶Ee'isinne Yoo'aab ee beero'o kibbaa amadukkuuyyi diina'i malaayyukkisa la'oo kollinne Ooriyo illagenne higisukko.

¹⁷Diina'i gaadaan beero'iinsi fitta'a Yoo'aab gogota qasso'o. Daawiit gaaxxi awwonsaaniinsi hofqaxim leto'o; Ooriyim ee keeninne maqirem lehukko.

¹⁸Ee lasage Yoo'aab ee oranne ihu luwwa hundam kuroo mancho Daawiit beyyo asse'ukko.

¹⁹Ee asse'amu manchinam «O'l bikkina hundam luwwam adilina kuttaa lasage

²⁰adil quuqaa ‹Ixxuwwinne orantakkeena beero'onne mahina hincitakko'o? Kininne ootamu ooxxi hanenne uullita'a ki'nnuwwanne xiyya darabbamisa laqqakko'oyyonnihe?

²¹Geedewoon beet Abemeeleek hinkid lehuda'e tiittakkamoyyonnihe? Ixxo Teebeex yakkam beyyonne mat meentichcho liitimmi ifichcho hanaanaad fatakita'a Abemeeleekika sammo anta'a shito'o. Eehannah ki'nnuwwi ee ootanne hincitakko'ok mahinatte?› yaa adil keese xa'mmulas ‹Ki gaadaanchi Ooriyim lehaakko› yitaa kure» yaa ijaajukko.

²²Ee bikkina oo asse'amaanchi Daawiit beyyo maraa Yoo'aab ijaaju luwwa hundam

²³«Ni diina'i malaayyita'a neese qasseena beero'iinsi fitta'a udma'a waatto'o. Ihukkaarem neese hollinaa beero'i ooxxi gooca afinsummo.

²⁴Ee lasage ki'n ooxxi hanenne uullita'a xiyya neesenne darabbo'o; Adila! Ki gaaxxi awwonsaaniinsi hofqaxim ee ammanenne leto'o; ki awwaadaanchi Ooriyim lehaakko» yaa kurukko.

²⁵Daawiitim ee asse'amaanchina «Yoo'aabina oranne ayyi lehooda'e gaassakka'a la'akkeena xanakkambee'i bikkina ‹Kichche'llitte! Ka lasage qoxxitaa qasantaa ee beero'o bi'ise› yitaa kure» yukko.

²⁶Beersaabe is manchi lehukkisa macceesso'i ammanenne kichche'lla'a wi'llito'o.

²⁷Wi'l siggaa lasage Daawiit manna asse'aa ixxi adilla'n mine eebisukko. Ixxenam aretti ikka'a goonchi beeto qotto'o; ihukkaarem Daawiit baxu bax Waa'a kichche'isukko.