Read Hadiyya 2 Saamu'eel Kitaaba 12 Bible Online

2 Saamu'eel Kitaaba 12 - Hadiyya bible

2 Saamu'eel Kitaaba 12

¹Waa'i hiraagaanchi Naataana Daawiit beyyo asse'ukko. Naataanim Daawiit beyyo maraa «Mat beero'onne lam manchi hee'am hee'ukko. Ixxuwwiinsim matii goddaancho matii buxichchi hee'ukko.

²Ee goddaanchi manchinam lobakat larii gereebbii hee'ukko.

³Ihukkaarem ee buxichchi manchina bita'llaakkoo xale'i mat gereechchichchi hee'ukko. Ee gereechchom abooyyukkuuyyi ixxi oosinne maqirem ixxi minenne li'ixxaakkoohan hee'ukko. Ixxi itoo hurbaatiinsim itisam hee'ukko; ixxi agoo aggiinsim agisam hee'ukko; qaaphphaahim iinse'am hee'ukko. Oo gereechchim ixxena qachchisa hee'ukko.

⁴Ee goddaanchi manchi mine mat balla koyyiinchi waarukko. Ihukkaarem oo goddaanchi manchi ixxena yoo gereebbiinsi te'im lariinsi mato duraa ixxi mine waaru koyyiinchina hurbaata gudiseena hasukkoyyo. Ee bikkenne ee buxichchi manchi gereechcho massaa duraa ee koyyiinchina hurbaata gudisukko» yukko.

⁵Daawiitim eehid issu manchonne lobakata quuqaa «Ee baxo baxu manchi lehimmi hasisoohan ihukkisa hee'oo Waa'i summinne hide'oommo.

⁶Eehido'i jor baxo baxu bikkina ee manchiinsi massukkoka soor suum issaa dabarimmi hasisookko» yukko.

⁷Naataanim Daawiitina «Oo manchi at ki gagame; Isra'ee'l Moollanni Waa'i ‹An keese Isra'eelanne adil issummo; Saa'ool angiinsim gatisummo.

⁸Ixxeka adillanoo meentoo kiina uwwummo; Isra'eelannee Yihudannee keese adil issummo. Oo hundim kiina hoffe'uta'n odim edaa uwwam hee'ummo.

⁹Eehannah i ijaajo gaddittok mahinatte? Ka hantaaro mahina baxxitto? Ooriyo o'l beyyonne shisiissitto; muccur manchom Amoo'n gogot shitamisa issitto; ixxi meentichchom ki gagina eebaqqitto.

¹⁰At iina ijaajantibee'i bikkinaa ooriy meentichcho hoo'llit bikkinaa ki shumo'iinsi doolli hundinam bisa'inne lehookkok bee'ooyyo.

¹¹Oono'o, ki abaroosiinsi mat ki'aa keesenne hawwo afisoo'isa issoomman ihukkisa hide'oommo. Ki meento kiiniinsi horaa kiina hincoo manchina uwwoommo; oo manchim uullaannonne salaat ballanne ki meentinne maqire iinse'ookko.

¹²At ka baaxiilo maaxaqqanne baxxaatto; ihukkaarem an ka woshsha salaat ballanne Isra'ee'l minaadaphphi illagenne hundannem la'amoo'isa issoommo› yoolla» yukko.

¹³Daawiitim «Baaxiilo baximminne Waa'a kichche'isaammo» yukko. Naataanim ixxena «Waa'i ki baaxiilo uru bikkina letooyyo.

¹⁴Ihukkaarem kido'i damigo baximminne Waa'a gadditti bikkina oo qaramu ki beet lehookko» yaa dabarukko.

¹⁵Naataan ixxi mine elle'aa lasonne Ooriy meentichcho Daawiitina qatto'i beetonne Waa'i kee'mmaalli xisso eebukko.

¹⁶Oo ciilichchom fayyiisoo'isina Daawiit Soommanukkuuyyi Waa'a uunxukko. Hiimina hiimina iinse'oo minenne uullanne iinse'am hee'ukko.

¹⁷Adilla'n mi'n gassaanim ixxi kolli hincita'a uulliinsi ki'oo'isa issiteena yakito'o. Ihukkaarem ixxi uulliinsi ki'oobee'isinaa ixxuwwinne maqirem ma'lluwwam duuqoobee'isinaa murte'ukko.

¹⁸Xissu saantina oo ciilichchi lehukko. Daawiit gassaanim lehukkisa kurimma baddita'a «Ciilichchi foorinne hee'u ammanem songummaare ni woshsha macceesukkoyyo; eehannah kaba ixxi beet lehukkisa hinkid issinaa kulleena xannoommo? Ayla'ukko matisa ihooda'e» yaqqanto'o.

¹⁹Daawiitim ixxuwwina'i ixxuwwim hashaashshantu'uuyyi macceesaa ciilichchi lehukkisa la'ukko; ee bikkina «Ciilichchi lehukkonnihe?» yaa xa'mmukko. Ixxuwwim «Eeyya lehaakko» yita'a dabatto'o.

²⁰Daawiitim uullanne iinse'u beyyiinsi ki'aa ixxi orachcho aansha'ukko orachcho lii'lle'isoo luwwam laphphukko. Mulli eddechcham edde'ukko; ee lasage Keesammi Mine maraa Waa'ina otossukko. Ixxi adilla'n minem daba'llaa maraa hurbaata hincaa'akkamisina xa'mmukko; hincaa'akko'isam itukko.

²¹Ixxi gassaanim Daawiitina «At ka'isa ikkittok mahinatte? Ciilichchi foorinne hee'ukkuuyyi soommantittuuyyi wi'llitto. Ihukkaarem ixxi lehaa lasonne ee ammanem ki'llaa ittitto!» yito'o.

²²Daawiitim «Ciilichchi foorinne hee'ukkuuyyi soommanummokii wi'llummokii hanqame; oohim Waa'i iina haafaa ciilichcho fayyiissooda'e yaatette hee'ukko.

²³Ihukkaarem kaba lehaa lasonne mahina soommanoomane? Ka ciilichcho la'mmeka foorinne hee'oo'isa isseena xanoommonnihe? An ixxi kolli maroommo bagaan ixxi i kolli daba'llaa waarooyyo» yukko.

²⁴Ee lasage Daawiit ixxi meentichcho Beersaabe'e qoxxisukko; isenne maqirem iinse'ukko. Isem ixxena goonchi beeto qatto'o. Daawiitim ee beetika summa «Salamoona» yaa fissukko. Waa'im ee ciilichcho iittu bikkina

²⁵summa «Yidiidiyaa» yaa fissona hiraagaanchi Naataana ijaajukko; oohim «Waa'i iittaakkoohane» yimma.

²⁶Ee ammane Yoo'aab Raabaa yakkam Amoo'n manni Beero'o amadeena gaadu gaadinne gafe'ukkuuyyi maraa ee beero'i girba amadukko.

²⁷Ixxim Daawiit beyyo manna asse'aa «Raaba'i beero'o qasaa ee beero'i wo'i firoo beyyi girba ammadaammo.

²⁸Oono'o, kaba ki gogotiinsi gatu qaxa wixxaa'llaa ee beero'o qassaa at ki gagoomim amade; eebeelas an ee beero'o amadaa i summinne weeshamoo'isa issoommo» yukko.

²⁹Ee bikkina Daawiit ixxi gogota wixxaa'aa Raaba'i beero'o gaadaa kaa'aa amadukko.

³⁰Daawiit Amoo'n adi'l horooriinsi worqinnee inqu yakkam bito xee'aalli kininnee baxamaakkoo sadee onti kilo'oo kee'mmoo adilla'n mare'e massaa ixxi horoorenne issaqqukko. Ee'isam ee beero'iinsi lobakat luwwa qeefadaa massukko.

³¹Ee beero'i minaadabim magaazinne, uulla abuullakkam xaarinnee heedinnee baxxamisa issukko. Mine baxakkam xuubam baxxamisina ijaajukko. Mulli Amoo'n uulli beero'uwwanne yo'i minaadab hundam ee'isam baxxamisa issukko; ee lasage ixxii ixxi gogotii hundim Yerusaaleema matto'o.