Read Hadiyya 2 Saamu'eel Kitaaba 13 Bible Online

2 Saamu'eel Kitaaba 13 - Hadiyya bible

2 Saamu'eel Kitaaba 13

¹Daawiit beet Abeseloomina Ti'imaare yakkam mishissam aayya hee'llo'o. Isem minina ikkoo'n yo'i landichchotti hee'llo'o. Daawiit oosiinsi mat hee'u Amiinoon Ti'imaare iittukko.

²Ixxim ise lobakata iittu bikkina xissukko. Isem baajaamotte hee'llo'i bikkina goo'n oosinne edantambee'isa egeranta'a hee'llo'i bikkina isenne edameena hore'em xanukkoyyo.

³Ihukkaarem ixxena Yoonaadaaba yakkam qoor beshichchi hee'ukko. Ixxim Daawiit abbaayyi Shaama'i beet hee'ukko.

⁴Yoonaadaabim Amiinoonina «At adi'l beet ikkittuuyyi ki orachchi ballina ballina nacukkuuyyi moo'oommok mahinatte? Hino'o iina kure» yaa xa'mmukko. Amiinoonim «Iyyabbaayyi Abeseloom aayya Ti'imaare iittummi bikkinatte» yaa dabarukko.

⁵Yoonaadaabim «Eehidette ihulas xissittaannisa ikkaa ki ara'anne iinse'e; kiyyanni moo'eena waaroo ammane «Iyyaayya Ti'imaare waatta'a i gadanonne ikka'a an moo'ummuuyyi hurbaata satta'a iina duuqissona hasoommo› yihe» yukko.

⁶Ee bikkina Amiinoon xissukkaannisa ihaa ixxi ara'anne iinse'ukko. Adil Daawiitim moo'eena Amiinoon beyyo marukkaare «Ti'imaare i beyyo waatta'a an moo'ummuuyyi i gadanonne lam injeera satta'a ise gagoomim iina duuqissamisa isse» yukko.

⁷Ee bikkina Daawiit ixxi adilla'n minenne hee'llam Ti'imaarena «Kiyyabbaayyi Amiinoon mine mattaa ixxena hurbaata sare» yoo ijaajo asse'ukko.

⁸Isem is abbaayyi Aminoon mine matta'a ara'anne iinse'aakkoo moo'llo'o; hofqax qamam qufissa'a lasage Aminoon moo'ukkuuyyim satto'o.

⁹Satto'okam mixaadiinsi fissita'a itona hincaa'llo'o. Ihukkaarem ixxi itimma sabaa «Manna hundam ka miniinsi fissehe» yukko. Hundim firukko.

¹⁰Ee lasage «Hurbaata ka an iinse'ummi beyyo amaddaa waattaa ki anginne duuqise» yukko. Isem satto'i hurbaata amadda'a is abbaayyi Aminoon beyyo matto'o.

¹¹Hincaa'llo'i ammanennem calammaa'aa amadaa «Waare maqirem iinse'nnona» yukko.

¹²Isem «Ihooyyo! Iyyabbaayyo, hay eese sholliissitte; kido'i tuussiisoo jor bax Isra'eelanne ihaa la'ooyyo; ee bikkina kido'i tuusiisoo jor baxo baxxitte.

¹³At eese ka'isa sholliissaa lasonne minaadaphphi illagenne hinkid iggaa mareena xanoommo? Atdu maha ikkootto! Isra'ee'l minaadaphphi lambe'enne lobakata sholle'llaattoo jor manchi ikkootto. Ee'isiinsi at adila xa'mmitta'n eese kiina aretti issaa uwwoo'isa amma'nnoommo» yito'o.

¹⁴Ihukkaarem ixxi is woshsha macceeseena hasukkoyyo. Isem malaayyinne amadaa iseka baajoommano bi'isukko.

¹⁵Ee lasage Amiinoon ise Hore'oomam gaassi iittukkaanniinsi loboka sabu bikkina «Ka miniinsi fire» yukko.

¹⁶Isem «Ee'isa ihooyyo! Kaba eese fissitaa hollimmi illageen eesenne issitti jolliinsi baasa» yito'o. Ihukkaarem Amiinoon is woshsha macceeseena hasukkoyyo.

¹⁷Ixxim ixxi awwaadaancho weeshaa «Ka meentichcho i illagiinsi ekkid hoore; isem biira fissitaa gooca xufe» yukko.

¹⁸Ti'imaarem Aminoon awwaadaanchi biira fissaa gooca xufukko. Ee doollenne adilluwwik baajaam landi edde'oo angaf qeeraa'l eddechcha edde'lla'a hee'llo'o. Isem horoorenne gii'lbuchcha laphphita'a is eddechcham dereetta'a is anginnem horoore amaxxita'a sagara iimmaa'lla'a wi'llitu'uuyyi matto'o.

²⁰Is Abbaayyi ise moo'aa «Keese sholliisukkok Aminoonattennihe? Iyyaayya! Hay kaba wi'llititte; ixxi kiyyabbaayyi ihu bikkina cawwitaa ure» yukko. Ee bikkina Ti'imaare Abeseloom minenne wossaanchotte ikka'a afuutto'o.

²¹Adil Daawiit ee ihu woshsha macceesu ammanenne lobakata quuqukko.

²²Abeseloom ixxi Aayyi Ti'imaare sholliisu bikkina Amiinoona lobakata sabukko. Ixxennem joraa erokaa woceena od hasukkoyyo.

²³Lam hiinchiinsi lasage Abeseloom Efireem beero'i gadanonne Haxoora yakkam beyyonne gereebbika odda muram hee'ukko. Ee bikkina adi'lleka goo'n ooso hundam ee beyyo weeshukko.

²⁴Adil Daawiit beyyom maraa «Adila, i gereebbika odda muroommuulla; ee bikkina atii ki gassaanii an gudisoommi maaddina waattakkeena xantakkamonnihe?» yukko.

²⁵Adilim «I beeto, neese waarimmi hasisooyyo; mashka'oomam neese hundim waallumlas koyyinan kee'mmookko» yaa dabarukko. Abeseloomim qoxxisaa uunxukko; ihukkaarem adil ixxi sawwite dabasseena hasubee'i bikkina Abeselooma maasse'aa geegeesukko.

²⁶Ihukkaarem Abeseloom «Erane! At waatteena hassibee'aa'lleensi iyyabbaayyi Amiinoon waaroo'isa issitooyyonnihe?» yaa xa'mmukko. Adilim «Ixdu mahina waaroohane?» yaa xa'mmukko.

²⁷Abeseloom qoxxisaa uunxu bikkina Daawiit Aminoonii mulli goo'n oos hundimii mattamisa issukko. Abeseloomim adilina laboo maadda gudisaa hee'ukko.

²⁸Ixxi awwaadaaninam «Aminoon lobakata agaa dimboo'isa egellehe; ixxi dimboo ammanem ixxo shitakkamisina ijaajoommaare shi'llehe; shi'llehe yummok anetti ihummi bikkina xa'mmamoommok anette; ee bikkina ki'nnuwwi hore'em badditakkotte; qoxallehe; ma'llichchom malantakkotte» yukko.

²⁹Ee bikkina Abeseloom awwaadaan ixxi kurukkisanne Aminoona shito'o; mulli Daawiit oosim ixxuwwi baqullanne saa'llita'a gibbo'o.

³⁰Mine elle'llu'uuyyi googonne hee'llonam «Abeseloom ki ooso hundam shaa guullukkotte; matim gatukkok bee'e» yakkam woshshi Daawiitina afukko.

³¹Adilim afuuru beyyiinsi ki'aa kichchechchinne ixxi eddechcha dereeraa uullanne biddiqaa ubukko; ee beyyonne ixxenne maqire hee'llo'i ixxi awwaadaanim kichchechchinne ixxuwwi eddechcha dereetto'o.

³²Ihukkaarem Daawiit abbaayyi Shaama'i beet Yoonaadaab «Adila, ooso hunda shakko'oyyo; shakko'ok xale'i Amiinoonatte. Abeseloom ka baxo baxeena sawwukkok Aminoon ixxi aayyi Ti'imaare sholliisu balliinsi ki'isaa qoodaakkoo qoodo'o.

³³Ee bikkina ki oos hundim lehaakko yakka'a kurakko'i woshsha amma'nnititte; lehukkok xale'i Amiinoonatte» yukko.

³⁴Ee ammane Abeseloom gibaa xoraa hee'ukko. Waardiyyichchim ee ammane Horoonaayimiinsi kid woroo googinne lobakat manni duuniinsi dillukkuuyyi moo'ukko; ixxim adilina «Horonaayi'm kollinne duuniinsi lobakat manni aad dillukkuuyyi moo'oommuulla» yukko.

³⁵Yoonaadaabim Daawiitina «An ki awwaadaanchi kurummisam oono'o ki oos waattamuulla» yukko.

³⁶Ixxi kaka wocaa guullukkisam Daawiit oos mine aagga'a wi'llito'o. Ee'isam, adilii ixxi awwaadaanim iranta'a wi'llitto'o.

³⁷Abeseloomim gibaa Gashuu'l adil hee'u Amhuud beet Taalmaay beyyo marukko. Ee beyyonnem sas hiincho afuurukko. Daawiitim ixxi beet Amiinoon leh bikkina qeeraa'l ammane kichchechchinne wi'llukko.

³⁹Ihukkaarem Amiinoon leh xadamukkuuyyi maru ammanenne ixxi beet Abeselooma moo'eena quluxukko.