Read Hadiyya 2 Saamu'eel Kitaaba 14 Bible Online

2 Saamu'eel Kitaaba 14 - Hadiyya bible

2 Saamu'eel Kitaaba 14

¹Adil Daawiit Abeselooma moo'eena quluxukkisa Yoo'aab la'ukko.

²Ee bikkina Taqo'anne hee'llam mat qoor meentichcho weeshisukko. Isem waatto'aare «Wi'llaancho labbeena yakihe; xiddi eddechcham edde'e; buurom laphphititte; lobakat ammane kichchechchanne hee'llitoka labbeena gude.

³Ee lasage adi'l beyyo hincitaa an kiina kuroommi woshsha kure» yukko. Ee lasage ise adilina kurimmi hasisoo woshsha hundam Yoo'aab isena kurukko.

⁴Oo meentichchom adi'l beyyo hincita'a uullanne heeshita'a «Adila, hay iina hara'mme» yito'o.

⁵Adilim «An kiina hara'mmona hassoo luwwi maruwwa?» yaa ise xa'mmukko. Isem «An goonchi lehaakkoo busaratte.

⁶Adila iina lam goo'n oos hee'llo'o. Mat ayyaamo araaro'isoo manni be'i beyyonne lamem oosim gananta'a mat mulleka shukko.

⁷Adila, oono'o kaba qar hundim ki'aa ‹Ixxi abbaayyo shu bikkina ixxom shineenatte ki beeto niina higissaa uwwe› yukkuuyyi eese hawwisaakko. Ixxuwwi eese ee'isa issito'aalleensi an oos bee'em gateenatte; iikka gatu mexxo'i beetichchom shita'a i ille qooqisseenatte. I aro'ikam shumo'o bi'isseenatte» yito'o.

⁸Adilim «Ki mine daba'llitaa mare; anim ki woshsha axisoommo» yukko.

⁹Isem «At issitoo luwwi hundinam hawwojjoom iihanee i abaroosanee ihona; ihukkaarem adilii ixxi adillanii muccuraakkoohan ihona» yito'o.

¹⁰Adilim «Ayyi manchim keese hawwisulas iina kure; keese la'mmeka hawwiseena hore'em xanooyyo» yukko.

¹¹Isem «Adila, i beetika xiiga miqisoo manchi iikka mulli beeto shimminne illagee'nnaanniisi lophphaakkoo damigo baxoobee'isa issiteena Waa'i summinne hide'e» yito'o. Adil Daawiitim «Ki beetonne hawwodanchi afimmi gataa ixxi horoo'l saraatiinsi matim uullanne uboobee'an ihukkisa hee'oo Waa'i summinne hide'oommo» yukko.

¹²Oo meentichchom «Adila, an ki awwaadaancho odim mat woshsha wocoommo» yito'o. Ixxim «Woce» yukko.

¹³Isem «Waa'i minaadaba ka'isa hawwoddittok mahinatte? Ki beet yaayyamaa maraa hee'u uulliinsi waaroo'isa issittoyyo; ee bikkina kaba wocci sagarinne ki gaganne oogattaatto.

¹⁴Neese hundim lehimmi gatoobee'ane; neesem uullanne dunamaa lasage la'mmeka inkiirakkeena xanakkambee'i wo'isa. Ihukkaarem Waa'i ixxeensi qee'llu manchina daba'lloo googo gudisookko bagaan ixxeka foore bi'isooyyo.

¹⁵Kabadem adila, an ki beyyo waarummok ka woshshanne eese manni baddisukkisa kureenatte. ‹An xa'mmummi luwwa hundam iina issookko› yoommi neeyyatinne ki illagenne hincaammo.

¹⁶Kaba an kiina kuroommi woshsha macceessaa i beetoo eesee shimminne Waa'i ixxi minaadabina gulummi issaa uwwu uulliinsi neese hooreena hasoo manchiinsi eese gatissootto yaa sawwaatette.

¹⁷Ee'isam adil Moollanni Waa'i asse'amaanchisa joraa erokaa annanni issaa la'oo bikkina at uwwitti neeyyaxxi sagar xumminne hee'oommisa issookko yaa sawwaatette. Eehannah ki Moollanni Waa'i kiinninne maqir ihona» yito'o.

¹⁸Adilim «An mat xa'mmichcha keese xa'mmoommo; atim iina hanqa woce» yukko. Isem «Adila, hassitti luwwi hundam xa'mme» yito'o.

¹⁹Ixxim «Kaka issitoo'isina keese ijaajukkok Yoo'aabattennihe?» yaa xa'mmukko. Isem «Adila; at yitoo luwwi hundiinsim fireena xanoo manchi bee'an ihukkisa an ki summinne hide'oommo. Hanqinam an kid yaa wocoommisina eese sogukkok ki gaaxxi awwonsaanchi Yoo'aabatte.

²⁰Ixxim kaka issukkok woshsha hundam axiseena sawwu bikkinatte. Ihukkaarem Adila, at Waa'i asse'amaanchisa qoora; uullanne ihoo luwwa hundam laqqoohane» yito'o.

²¹Ee lasage Adil, Yoo'aabina «At yitti woshsha aa'aammo; mattaa Abeselooma hassaa wore» yukko.

²²Yoo'aabim Daawiit illagenne heeshaa ixxo galaxxukko. Ixxim «An yummi woshsha aa'llitti bikkina ki illagenne nuura siixxummisa kaba la'aammo» yukko.

²³Yoo'aabim Gashuura maraa Abeselooma dabaraa Yerusaaleema worukko.

²⁴Ihukkaarem adil «Ixxi mine elle'ona; ixxi i ille moo'oone» yukko. Ee bikkina Abeseloom ixxi mine elle'ukko. Adi'llekam ille moo'ukkoyyo.

²⁵Ee doollenne Abeseloome'nnoo'i danaam manchi Isra'ee'l uullanne hee'ukkoyyo. Ixxim horoo'l saraatiinsi ki'isaa lokki xura'anne afeebe'e miiqakkam luwwi bee'i manchi hee'ukko.

²⁶Ixxek horoo'l saraat hore'em lobakat hee'ukko. Ixxenam kee'mmoo bikkina hiinchonne mataagge muram hee'ukko. Ee muramu horoo'l saraatam adilla'n mi'n kilo'onne keenakkamaare lam kilo'iinsi lophpham hee'ukko.

²⁷Abeseloomina sas goo'n oosii mat landichchoo hee'amukko. Landichchokam summa Ti'imaare yakkamotan ikka'a lobakata danaamotte hee'llo'o.

²⁸Abeseloomim adi'lleka ille moo'oo'n Yerusaaleemanne lam hiincho hee'ukko.

²⁹Ee lasage Abeseloom adi'l beyyo maraa ixxi bikkina xa'mmona Yoo'aaba weeshisukko. Ihukkaarem Yoo'aab waarimma sabukko. Abeseloom Yoo'aab waaroo'isina la'mmaaggem asse'ukko. Ihukkaarem kabadem Yoo'aab waareena hasukkoyyo.

³⁰Ee bikkina Abeseloom ixxi awwaadaanina «Moo'llehe Yoo'aab uulli i uulli bakkonnetti ihaa so'i yoohane; ee bikkina mattakka'a shokka uwwehe» yaa ijaajukko. Ixxuwwim matta'a ee hurbaatanne shokka uwwitto'o.

³¹Ee lasage Yoo'aab Abeseloom mine maraa «Ki awwaadaan i hurbaata shokkiisso'ok mahinatte?» yaa xa'mmukko.

³²Abeseloomim «An weeshummaare at waatbee'i bikkinatte. Adi'l beyyo mattaa ‹An Gashuuriinsi keyye Waarummok mahinatte? Eehe'em hee'immi iina e'llam hee'ukkoyyonnihe?› yitaa i bikkina xa'mme; an adilinne edameena xanoommi duuha'a taaphanse; an bi'isaanchi ihaa siidamumlas eesenne leho oogatona» yukko.

³³Ee bikkina Yoo'aab adil Daawiit beyyo maraa Abeseloom ixxena yu luwwa hundam kurukko. Adilim Abeselooma weeshisukko. Abeseloomim maraa adi'l illagenne uullanne heeshaa obodda yukko. Adilim ixxo suunqukko.