Read Hadiyya 2 Saamu'eel Kitaaba 15 Bible Online

2 Saamu'eel Kitaaba 15 - Hadiyya bible

2 Saamu'eel Kitaaba 15

¹Ee lasage Abeseloom mat faraxxi gaarre'ee faradoo ixxi illagenne geettam ontayyi gaadaanoo gudisukko.

²Ixxim hundi ballam dar dara ki'aa ee beero'o aagakkam ooxxi gooc kolli massoo gooqqi inqenne uullam hee'ukko. Adil ixxeka meto'o moo'ooisina waaroo annanni annanni woshshi yoo manni hundim ee beyyo waaroo ammane Abeseloom ixxi beyyo weeshaa hanniinsi waaruda'e xa'mmam hee'ukko. Oo manchim hinka'i sulliinsi waaruda'e kuraa lasage

³Abeseloom «Moo'e! Ki quux hanqo'an hee'ukko. Eehannah adila bikkaa ki woshsha hanqo'isinne moo'ookkok bee'e» yam hee'ukko.

⁴Odim «An daanni ihaammoota'n fit te'im meto'i yoo manchi i beyyo waaroohaare hanqa oogatam hee'ummo» yam hee'ukko.

⁵Oo manchim ixxi illagenne hincaa heeshaa obodda yeena waaroohaare Abeseloom ee mancho qaaphphaa suunqam hee'ukko.

⁶Abeseloom hanaqo'i oogato'o siixxiteena adi'l beyyo waattam keenina hundinam ee'isa issam hee'u bikkina ixxuwwika tiiro agukko.

⁷Soor hiinchiinsi lasonne Abeseloom adil Daawiitina «Adila, an Waa'ina Uwwoommoo yaammoo uga'a uwweena Keebiroona maroommisa isse.

⁸Mashka'oomam Sooriy uulli Gashuuranne hee'ummi ammane ‹Eese Yerusaaleema dabattittaare Keebiroonanne kitima hincaa'oommo› yaa Waa'ina uga'a aagaammo» yukko.

⁹Adilim «Xummanne mare» yukko. Ee bikkina Abeseloom Keebiroona marukko.

¹⁰Ihukkaarem ixxi hundem Isra'ee'l sulli beyyom worinne manna asse'aa «Xurumbullika sagara macceessakkam ammane sagara iimaa'llakka'a ‹Abeseloom Keebiroonanne adil ihaakko!› yitakka'a shuullehe!» yita'a ixxuwwina kuttamisa issukko.

¹¹Abeseloom weeshukkaare ixxenne maqire Yerusaaleemiinsi matto'oo lam xibbi manni hee'llo'o. Ixxuwwim awwonta'a matto'ok ixxi sawwixxeka maham laqqoo'nnim godaphphi fayya'oomminnetti hee'ukko.

¹²Abeseloom kitima hincaa'oo ammane adil Daawiit sogaaniinsi mat hee'u Akxoofeela yakkam mancho manna asse'aa Giilo'i beero'iinsi weeshisukko. Abeseloom Adilanne sawwu bangujjaat qoxxukkuuyyii ixxo awwonoo mannik xig exxukkuuyyii marukko.

¹³Mat asse'amaanchi Daawiitina «Isra'ee'l minaadabik tiir Abeseloominnetti ihaakko» yukko.

¹⁴Ee bikkina Daawiit ixxenne maqire Yerusaaleemanne hee'llam gassaan hundinam «Abeseloom angiinsi ganteena hansummaa'lleensi ka beyyiinsi gimbaa xollona! Ee bikkina qaqqissehe! Eehid ihubeelas qaqisaa waaraa neese guullookko. Ka beero'onne siidu manni hundam shookko!» yukko.

¹⁵Ixxuwwim «Ihona adila, at yittoka hundam issimmina gundaammo» yita'a dabatto'o.

¹⁶Ee bikkina adil adilla'n mine egettona gatisu tommi bakki meentiinsi bagaan ixxi abaroosaa mulli gassaanoo hundam amadaa gibukko.

¹⁷Adilii ixxi awwonaanii hundim beero'iinsi fitta'a mattu'uuyyi beero'i lasaanchonne yoo mat mi'n gadanonne uullito'isam

¹⁸adi'l gassaan, lombi waardiyyuwwii Gaatiinsi waatto'i loh xibbi gaadaanii ixxi illaginne higgo'o.

¹⁹Adilim Iitaaya yakkam ee gaadaa'n awwonsaanchina «Niinninne maqire mahina mattoolla? Daba'llitaa haareechchi adil Abiseloominne maqire afuure. At ka uullanne manni uulli manchi ikkaa hee'lloo mulli uulli mancho.

²⁰Waattittokim beeballa; eehannah kaba iinninne maqire mahina badattoohane? An hanno maroomda'em la'ummoyyo; ee bikkina ka ki uulli manna amaddaa daba'lle; Waa'i ixxeka biijoomaa amma'nnamaakkoohaanoomaa kiina moo'isona» yukko.

²¹Ihukkaarem Iitaay «An ki awwaadaanchi keesenne leh afoohan ihuta'nnim at mattoo beyyo hundam maroomman ihukkisa an kiina Waa'i summinne hide'oommo» yaa dabarukko.

²²Daawiitim «Erane, eehid ihulas higgaa mare» yukko. Ee bikkina Iitaay ixxi gaadaaninnee ixxuwwi abaroosinnee marukko.

²³Daawiit awwonaan fitta'a matto'i ammanenne minaadab sagara iimaa'lla'a willito'o. Adil ixxi awwonaaninne maqirem Qeediroo'n cebba firukko. Mateeyyoominnem udma'i uulla matto'o.

²⁴Qeessichchi Saadooqim ixxuwwinne hee'ukko. Keesamakkoo Hidi'l Saga'l Saaxina iyyita'a Leewi'i oos ixxenne maqire hee'llo'o. Ixxuwwim Hidi'l Saga'l Saaxina minaadab hundim beero'iinsi fireebe'e eekke'e dissito'o. Abiyaataarim ee beyyonne hee'ukko.

²⁵Ee lasage Saadooqina adil «Hidi'l Saga'l Saaxina dabattaa beero'o masse; an Waa'i illagenne nuura siidumlas mat balla Hidi'l Saga'l Saaxinaa garoo beyyoo moo'oommisa issookko.

²⁶Ihukkaarem Waa'i an keesenne liiramummoyyo yulas eesenne hasu luwwa issona; anim aa'eena gudaammo.

²⁷Odim Saadooqina ‹Ki beet Ahimaaxaa Abiyaataar beet Yoonaataanaa amaddaa beero'o xummanne mare.

²⁸Anim kiinniinsi mat woshsha macceeseembe'e uulli udma'anne yoo daajje firakkam beyyonne egeroommo» yukko.

²⁹Ee bikkina Saadooqii Abiyaataarii Hidi'l Saga'l Saaxina dabatta'a Yerusaaleema massito'o. Ee beyyonnem afuutto'o.

³⁰Daawiitim kichche'ukkisa la'iseena caamma'a issaqqoo'nnim gunguu'llaa Wee'l duuna wi'llukkuuyyi firukko. Ixxo awwontam hee'llo'i keenim gunguu'llita'a wi'llitam hee'llo'o.

³¹Daawiitim Akxoofeel Abeseloominne maqirem bangujjukkisa macceesaa «Waa'a, Akxoofeel sogitano awwaad bee'an issitoo'isina keese uunxoommo» yaa Waa'a uunxukko.

³²Daawiit Waa'ina otossakkam beyyi yoo duu'n ludo afukkaare amma'nnamaakkoo ixxi beshichchi Arke'i uulli Huushaay ixxi eddechcha dereeraahii horoorennem dira laphphaahii ixxenne edameena waarukko.

³³Daawiitim «At niinninne marimminne iina ma'llichchom issitooyyo.

³⁴Ihukkaarem at iina hara'mmiteena xantoottok beero'o daba'llitaa mattaa Abeseloomina ‹Kiyyannina awwaadummisam kiinam amma'nnanchinne awwaadoommo› yitaa kuttilasii ee'isam Akxoofeel sogoo sogitano hundam sabbilasii

³⁵odim Qeessuwwi ikko'i Saadooqii Abiyaataarii ee beyyonne hee'llam bikkina adilla'n minenne macceessoo woshshi hundam ixxuwwina kuttilasette.

³⁶Ixxuwwinne maqirem ixxuwwi oos Ahimaaxii Yoonaataanii hee'llamo; at macceessitti woshshi hundam ixxuwwanne iina asse'lleena xantootto» yukko.

³⁷Ee bikkina Daawiit beshichchi Huushaay beero'o daba'llukko. Abeseloomim ee ammanem ee beyyo afukko.