Read Hadiyya 2 Saamu'eel Kitaaba 16 Bible Online

2 Saamu'eel Kitaaba 16 - Hadiyya bible

2 Saamu'eel Kitaaba 16

¹Daawiit duu'n ludiinsi ekkollinne hofqaxa marukkisam lam xibbi xeffo'i daabbo'o, mat xibbi xexxefammi zabiiba, mat xibbi oda'i mishaa mat can woyi'n diqaasaa iyyaakkoo lam hallichcho ushe'am hee'u Mafiiboosheet awwaadaanchi Siiba'anne dangonnem edamukko.

²Adil Daawiitim «Ku luwwi hundim maruwwa?» yaa xa'mmukko. Siiba'am «Adila, ka halla worummok ki abaroos saa'llonatte, daabbo'oo oda'i misham keese awwontam keen ittonattee woyi'n diqaasam uulli udma'anne hooggam ammane aggonattee» yaa dabarukko.

³Adilim «Ki moollanni Saa'ool beet beet Mafiiboosheet hannonnette?» yaa xa'mmukko. Siiba'am «Isra'ee'l minaadab ixxena lobanni Saa'oolika adillano dabatta'a uwwitamoo yaa sawwu bikkina ixxi kaba yookkok Yerusaaleemannette» yaa dabarukko.

⁴Adilim Siiba'ana «Mafiiboosheetan ihu amaxxi hundim ka lasage kiihane» yukko. Siiba'am «Adila, oono'o an ki awwaadaancho; hundi ammanem an keese liiransoo baxo qoxxaa baxoommo» yaa dabarukko.

⁵Adil Daawiit Baahuuriima afu ammanenne Saa'ool qarmanchi Geera'i beet Shiimi'i firaa qangukkuuyyi Daawiit kolli hincukko.

⁶Daawiit ixxi gogoxxaannonnee ixxi lombi waardiyyuwwi lambe'ennee hee'ukkuuyyi Shiimi'i Daawiitannee ixxenne maqire yoo gassaanonnee kina darabimma asheerukko.

⁷Daawiitam «At manna shitaattoo damigaancho; ka uulliinsi laa'ihe!

⁸At Saa'ool adillano aa'llaatto; ixxi abaroosa hundam shitaatto; oono'o, kaba odim Waa'i keese guzumo'oolla. Waa'i ki adillano ki beet Abeseloomina higisaa uwwaakko; At manna shitaattoohane; oono'o, at bi'lloo amman kaba afaakko!» yukko.

⁹Ee ammanenne Xaruy beet Abiis adilina «Adila, ku lehu wishichchiinsi e'lloobee'i manchi i moollanna, adila hinkid qangoolla? An maraa ixxeka horoore muraa uroommo!» yukko.

¹⁰Adilim Abiisina ixxi abbaayyi Yoo'aabinaa «Ku woshshi ki'nnuwwa moo'ooyyo; Waa'i ixxo eese qangona ijaajulas ‹Mahina ka'isa issitoolla?› yaa ixxo xa'mmeena xanookkok ayyette?» yukko.

¹¹Odim Daawiit Abiisinaa gassaaninaa «I beet eese sheena hasoolla; eehannah ka Biiniyaam manchonne mahina maalaltakkamuulla? Eese qangoo'isina Waa'i ixxena kuraakko; ee bikkina ullehe sawwu luwwa issona.

¹²Ayyi la'ukko Waa'i i hawwo moo'aa ixxi qangimmi bikkenne iina maasso uwweena xanookko» yukko.

¹³Ee lasage Daawiitii ixxi gogotii mattam hee'llo'i googo amadda'a matto'o. Shiimi'im duu'n gammalinne awwonukkuuyyi ixxuwwi hanenne kina huushukkuuyyii dira binnaa'ukkuuyyii qangam hee'ukko.

¹⁴Adilii ixxenne maqire hee'llo'i mannii hundim Yoordaanoos daajje affa'a lasonne lobakata hoogga'a hee'llo'i bikkina ee beyyonne usheexxito'o.

¹⁵Abeseloomii ixxenne maqire hee'llo'i Isra'ee'l mannii hundim Yerusaaleema aaggo'o; Akxoofeelim ixxuwwinne maqirem hee'ukko.

¹⁶Daawiitik amma'nnamaakkoo beshichchi Huushaay Abeseloominne edamu ammanenne «Adil heer heerina hee'ona! Adil heer heerina hee'ona!» yukkuuyyi shuurukko.

¹⁷Abeseloomim «Ki beshichchi Daawiitina hee'u ki amma'nnanchi ka'isannihe? Ixdu awwontaa mahina mattittoyyo?» yaa xa'mmukko.

¹⁸Huushaayim «An hinkid ee'isa issoommo? An hundi ammanem Waa'i, ku minaadabii Isra'ee'l oosii hundim doo'llu adilinne ihoommo. Kabadem kiinninne maqire hee'oommo.

¹⁹I moollanni beetina awwaadoo'n od ayyena awwaadeenatte? Ee bikkina kiyyannina awwaadummisam kiinam awwaadoommo» yukko.

²⁰Ee lasage Abeseloom Akxoofeel kolli daballaa «Oono'o, kaba neese ka beyyonne yoommine'e; eehannah maha issinona soggootto» yaa xa'mmukko.

²¹Akxoofeelim Abeseloomina «Kiyyanni ixxi adilla'n mine egettona gatisu ixxi bakki meentinne iinse'e. Ee'isinne Isra'ee'l minaadab hundim kiyyanna sholliissittisa la'ookko. Kiinninne maqire Yoo mannik hundikim malaayyi qoxxookko» yukko.

²²Ee bikkina adi'l mi'n iimanenne Abeseloomina dukkaana kaasakko'o; ixxim manni hundim moo'ukkuuyyi ee dukkaa'n woronne aagaa ixxi anni bakki meentinne iinse'ukko.

²³Ee ammane Akxoofeel sogoo sogitan hundim Waa'i saga'llisa macceesamoohan hee'ukko. Illageen Daawiit ixxi sogitano macceesam hee'ukkisam kaba odim Abeseloom macceesam hee'ukko.