Read Hadiyya 2 Saamu'eel Kitaaba 17 Bible Online

2 Saamu'eel Kitaaba 17 - Hadiyya bible

2 Saamu'eel Kitaaba 17

¹Hofqax ammaniinsi lasonne Akxoofeel Abeseloomina «Kaballi maaro'o an Daawiita hollansaa amadeena tommoo lam kum mannaa doo'lloomisa isse.

²Hoogaa neeyyata muraa yoohaannonne dangisaa qasoommo; ee ammane ixxi muggookko; ixxi awwonaanim utta'a gibbamaare adila mullam afaa shoommo.

³Idaayyichcho is aro'i beyyo daba'llitamisa Daawiita awwontam manni hundim ki beyyo daba'llita'a waattamisa issoommo. Kaba at shiteena hassoottok mat mancho. Ihukkaarem gatu mulli manni xummanne hee'ookko» yukko.

⁴Ku woshshim Abeseloominaa mulli Isra'ee'l awwonsaaninaa hundinam er sogitano labaa moo'amukko.

⁵Abeseloomim «Kaba odim Huushaaya weeshshehe ixxi yoo woshsha macceensona» yukko.

⁶Huushaay afu ammanenne Abeseloom «Akxoofeel neese kid yaa sogaakko; eebeelas at kuttoo woshshi yoohonnihe?» yaa xa'mmukko.

⁷Huushaayyim «Ka ammanenne Akxoofeel ki'nnuwwa sogu sogitan eraneyyo.

⁸Kiyyanni Daawiitii ixxi awwonaanii qoxxaalli o'l manni ikko'isaa wotalla aa'akko'i tibbekkichchisa baddissam keen ikko'isaa laqqootto; kiyyanni ora la'oo qoxar gaadaanchi ihu bikkina hiimo ixxi gogotinne maqire garooyyo.

⁹Ayyi la'ukko kabadem daawwa'i woronne te'im mulli beyyonne maaxamaa hee'ookko. Daawiit ki googota qasukkisa macceesu manni hundim ee qaxannem ki gaadaan kaa'anto'aannisa issaa wocookko.

¹⁰Kiyyanni lob o'l manchi ihukkisaa ixxi awwonaanim qoxxaalli o'l manni ikko'isaa Isra'ee'l uullanne yoo manni hundim la'oo bikkina hobbisa iggaalluwwi ikko'i ki gaadaa'nnekim ihuta'n wodan baa'eena xanookko.

¹¹Ee bikkina an keese sogoommok ullaannonne soorem lamejjannem Daaniinsi Beersaabe'i afeebe'e yo'i keenoo ixxuwwikim xig dambalaq shashsha'llisa ihu Isra'ee'l minaadabaa hundam mateeyyoomminne wixxaa'llaa at ki gagoomim gaaxxi awwonsaanchi ikkaa orina awwonsitoo'isinatte.

¹²Ee ammane hannonnem maaxamuta'n Daawiita hansaa siindoommo. Barad uullanne dilloo'isa ixxonne dillinoommo. Ixxottem ihukko te'im ixxi awwonaaniinsi mat manchim gatooyyo.

¹³Gibaa beero'o aaguta'nnim ni minaadab ee beero'o usinne gosaasaa mat kinchim gatoo'n cebbanne dilliisookko» yukko.

¹⁴Abeseloomii Isra'ee'l minaadabii hundim Akxoofeel sogitaniinsi Huushaay sogitan lophphookko» yito'o. Waa'i Abeselooma bi'iseena hasu bikkina Akxoofeelika danaam sogitano aa'llambee'isa issukko.

¹⁵Ee lasage ixxii Akxoofeelii Abeseloominaa Isra'ee'l awwonsaaninaa soggo'i sogitano qeessuwwi ikko'i Saadooqinaa Abiyaataarinaa Huushaay kurukko.

¹⁶Ee'isam «Kaballi maaro'o udma'i uullanne yoo daajje higakkam beyyonne garoobee'isa qaqqissakka'a manna asse'llakka'a Daawiitina kullehe! Ixxoo ixxi awwonaanoo amadakka'a shakkambee'isa qaqqissa'a Yoordaanoos daajji eeqidonne fittona!» yukko.

¹⁷Abiyaataar beet Yoonaataanii Saadooq beet Ahimaaxii ee beero'o aaggu'uuyyi ayyim moo'oobee'isa baddito'i bikkina Yerusaalee'm gadanonne yoo Eenroogee'l bu'i gadanonne egetta'a hee'llo'o; mat landichchom hundi ammanem ee beyyo mattu'uuyyi ihoo woshshi hundam ixxuwwina kuttam hee'llo'o. Ee lasage odim ixxuwwi matta'a adil Daawiitina kuttam hee'llo'o.

¹⁸Ihukkaarem mat balla mat beet ixxuwwa moo'u bikkina maraa Abeseloomina kurukko; ee bikkina ixxuwwi Baahuuriimanne hee'oo mat manchi minenne maaxamteena gibba'a matto'o. Ee manchina ixxi mi'n gadanonne wo'i bar hee'u bikkina ee barenne aaggo'o.

¹⁹Ee manchi meentichchom ee ba'l suumenne hurbaata fitiissa'a ayyi manchim maloobee'isa issito'o.

²⁰Abiseeloom mannim ee mine waatta'a ee meentichcho «Ahimaaxii Yoonaataanii hannonne yo'o?» yita'a xa'mmito'o. Isem «Daajje fitta'a matto'ookko» yita'a dabatto'o. Oo mannim hassa'a ixxuwwa siiddeena xantobee'i bikkina Yerusaaleema daba'llito'o.

²¹Ixxuwwim matta'a lasage Ahiimaa'aaxii Yoonaataanii qaqqissa'a ee bariinsi fitta'a matta'a ee hundam adil Daawiitina kutto'o; Akxoofeel ixxuwwanne isseena sawwu luwwa kutta'a lasage «Qaqqisaa daajji eeqidonne fire» yito'o.

²²Ee bikkina Daawiitii ixxi awwonaanii Yoordaanoos daajji eeqidonne firimma asheetto'o. Uulli soodeebe'e hundim daajji eeqidonne fitta'a hee'llo'o.

²³Akxoofeelim ixxi sogu sogitano manni aa'ubee'isa qoossaa la'u ammanenne hallichchonne saa'llaa ixxi hee'oo beero'o daba'llaa elle'ukko. Hundem luwwam ansaadaa lasonne xaga'llaa lehukko. Ixxi abaroos waammanem waammamukko.

²⁴Abeseloomii Isra'ee'l minaadabii hundim Yoordaanoos daajje higgo'i ammanenne Daawiit Mahinaayima yakkam hoffi beero'o afaa hee'ukko.

²⁵Abeseloom Yoo'aab bikkenne Amaasaa yakkam mancho gaaxxi awwonsaanchi issaa doo'llukko; Amaas Isma'eelchi hee'u Yeeteer beet hee'ukko. Ixxi amam Abigeele yakkam Nahaash landichchotti ikko'uuyyi Yoo'aab am Xaaruyyana aayyatte hee'llo'o.

²⁶Abeseloomii ixxi gogotii Gala'aaxxi uullanne wiiddanto'o.

²⁷Daawiit Mahannaayima afu ammanenne Amoo'n gassi uullanne Raabaa yakkam beero'iinsi waaraakkoo Naa'oos beet Shooba'i, Lodobaar beero'iinsi waaru Ami'eel beet Maakiirii Gala'aad gassi uullanne Roogaaliim yakkam beero'iinsi waaru Barzilaayii ixxi beyyo waatto'o.

²⁸Ixxuwwim qure'uwwa, buchchinne baxamu harallaa iinse'akkam ara'uwwaa amadda'a waatto'o; ee'isam Daawiitinaa ixxi awwonaaninaa ihoo arasa, so'o, qama, sarakko'oo hamaama, baaqeela, gite'e, marabo, salalo, gi'inaa gereebbaa eebbo'o. Eekkam issito'ok Daawiitii ixxi awwonaanii udma'i heechchanne sibaatamisa, xeebe'llamisaa hooggamisaa sawwimminnette.