Read Hadiyya 2 Saamu'eel Kitaaba 18 Bible Online

2 Saamu'eel Kitaaba 18 - Hadiyya bible

2 Saamu'eel Kitaaba 18

¹Adil Daawiit ixxi awwonaan hundam mat issaa weeshaa lasage kumaa xibbee issaa gaalcha fissukko; ee gaalchuwwina annannichchinam gaaxxi awwonsaano doo'llukko.

²Ee lasage sas beyyo baxxansaa asse'ukko. Yoo'aab, ixxi abbaayyi Abiisii Gaatiinsette ihu Iitaayii annannichchim mat mat gaalchina gaaxxi awwonsaan ikko'o; adilim ixxi awwonaanina «Anim ki'nnuwwi maqirem maroommo» yukko.

³Ixxuwwim «At niinninne maqire marimmi hasisooyyo; niinniinsi hofqaxim laso daba'llinaa mallummita'n te'im kolli lenummita'n ni diina'ina ookki mahayyome. Ihukkaarem at tommi kuma inkoommi qax manniinsi lophphitootto. Ee bikkina at ka beero'onne afuuttaa niina hasisoo hara'mmato asse'llittaare e'llookko» yito'o.

⁴Adilim «Ki'nnuwwina eran ihaa moo'amu luwwa hundam issoommo» yaa dabarukko. Ee lasage beero'i ooxxi gooc gadanonne uullaa kumannee xibbennee baxxansamu gaadaan orina gudaa firukkuuyyi moo'ukko.

⁵Yoo'aaba, Abiisaa Iitaayimaa «Iinaa yitakka'a i beet Abeselooma shitakkotte» yaa ijaajukko. Daawiit ee ijaajo uwwukkuuyyi gaadaan hundim macceessam hee'llo'o.

⁶Daawiitik gaadaan hax uulla matta'a Isra'ee'l manninne Efireem haqqi woronne qasanto'o.

⁷Isra'ee'l mannam Daawiit gaadaan kaa'llo'o. Kaa'anto'i duuha'im lobakata hiriraa'oohan hee'ukko. Mashka'oomim ee balla ixxuwwiinsi lehukkok lamiyyi kuma ihoo qax manni hee'ukko.

⁸Oo orim hax uullanne hundannem haraaru bikkina oranne leto'i manniinsi loboka haqqoronne leto'i mannik xig lophphukko.

⁹Abeseloom Dangonnem Daawiit awwonaaniinsi hofqaxinnem edamukko. Ee ammane Abeseloom baquchchonne saa'llaa jigisam hee'u bikkina oo ixxi saa'llu baquchchi mat geejji qillixo'i luguminne higukkuuyyi ee haqqichchik caaf Abeseloomika horoo'l saraata amadukko. Oo baquchchi ixxi koofiinsi luxuunxaa firu ammanenne Abeseloom calcalaa gatukko.

¹⁰Daawiit gaadaaniinsi mat eekka moo'aa Yoo'aabina «I Moollanna! Abeseloom mat qilxo'onne calcalaakkoo moo'aammo» yaa kurukko.

¹¹Yoo'aabim «Eehannah moo'llittahe ee ammanem shiteenahe? Eekka issitaattoohan ihuta'n an kiina tommi kin biraa mat zinnaaraa irifam hee'ummo» yaa dabarukko.

¹²Ihukkaarem oo manchi Yoo'aabina «Mat kum kin bira uwwitta'nnim adi'l beetonne an i anga higisoommoyyo. Adil keese, Abiisaa Iitaayaa ‹Iinaa yitakka'a i beet Abeselooma shitakkotte› yaa ijaajukkisa hundim macceensaammo.

¹³Eehannah an adi'l ijaajo gindaa Abeselooma shaammoohan ihuta'n adil woshshi hundam macceesoo'isam ka woshsham macceesimmi gatooyyo; atim agaaggaa eese gatissam hee'llittoyyo» yaa dabarukko.

¹⁴Yoo'aabim «An kaba kiinninne ammane bi'iseena hasoommoyyo» yaa sas bagado amadaa maraa Abeseloom qilxo'onne calcalaa foorinne hee'onam afaa wodano qasukko.

¹⁵Ee lasage Yoo'aab gaadaaniinsi tommi Abeselooma kibbita'a qassa'a shito'o.

¹⁶Ee lasage or uulloo'isina Yoo'aab xurumba fugakkamisina ijaajukko. Gaadaanim Isra'ee'l manna hollansimma utta'a daba'llito'o.

¹⁷Abeseloomikam leesha massita'a haqqoronne yoo xillaalli barenne uunjito'o. Ixxonnem geejji geejji kina tuubba'a ifiisso'o; Isra'ee'l mannim gibba'a annannichchim ixxuwwi gaqqi minem aaggo'o.

¹⁸Abeseloomina summa weeshisoo goo'n oos hee'ubee'i bikkina foorinne hee'ukkuuyyim «Adi'l cebba» yakkam beyyonne ixxi gagina soodda baxisaa hee'ukko. Oohim ixxi lehoo'n illageen ixxi summinne hee'u bikkina kaballi afeebe'em «Abeseloom Soodda» yamamaa weeshamookko.

¹⁹Ee lasage Saadooq beet Ahimaax Yoo'aabina «Adila Waa'i ixxi diina'iinsi gatisukkisa kureena er woshsha amadaa adi'l beyyo geeroommo» yukko.

²⁰Yoo'aabim «Ihooyyo; kaballa at amaddaa mattoo er woshshi mahim bee'e; ayyi la'ukko mulli balla kaka issiteena xantootto; ihukkaarem kaballa adi'l beet lehu bikkina ka woshsha massittibe'aare eranne» yukko.

²¹Ee lasage Yoo'aab ixxi awwaadaanchi hee'u mat Tophphe'i mancho weeshaa «At moo'llitti luwwi hundam mattaa adilina kure» yukko. Oo awwaadaanchim ixxena obodda yaa ki'aa geerukkuuyyi marukko.

²²Ahimaaxim «Hasu luwwi hundim ihuta'nnim hawwi bee'e; ee bikkina anim ka woshsha afisoommisa isse» yukko. Ihukkaarem Yoo'aab «I beeto, mah bikkina kaka issiteena hassitto? Kaka issitti bikkina matem irifo'om siiddooyyo» yukko.

²³Ahimaax odim «Hasu luwwi hundim ihuta'nnim hawwi bee'e; an mareena hasoommo» yukko. Yoo'aabim «Eehaare mare» yukko. Ee bikkina Ahiima'aax Yoordaanoos daajji cebbinne massoo googinne geerukkuuyyi maraa Tophphe'i mancho gaassukko.

²⁴Daawiitim ee beero'i woro'llaannonnee bii'l gooccuwwi lambe'enne yoo biir beyyonne afuuraa hee'ukko. Ee beero'i waardiyyichchi ooxxi gimbanne baxamaakkoo godo'onne firaa daaphphoohaare mat manchi mullam geellichchinne waaram hee'ukko.

²⁵Ixxim sagara haraassaa moo'u luwwa adilina kurukko. Adilim «Mullatte ihukkaa'lleensi er woshsha amadaa waaraakkoohan ihookko» yukko. Oo geeram hee'u manchim hincukkuuyyi waarukko.

²⁶Ee lasage odim mat mulli manchim geerukkuuyyi waaroo moo'aa ee qashi gooc egeraancho weeshaa «Ee moo'e! Mullekim mat manchi geerukkuuyyi waaroolla» yukko. Adilim «Kukim er woshsha amadaa waaraakkoohan iheena xanookko» yaa dabarukko.

²⁷Oo egeraanchim «Oo luxxan ihaa geeroo manchi waaroo'is Ahimaaxisa» yukko. Adilim «Ixxi er mancho; er woshsha amadaa waarookko» yukko.

²⁸Ahimaaxim ixxi sagara iimaa'aa adila xummaatisukko; adi'l illagennem uullanne heeshaa «Adila, keesenne bangujjaatinne ki'llo'i keeno kaa'lloo'isina hara'mmu ki Waa'i galaxxamaakkoohan ihona!» yukko.

²⁹Adilim «Abeseloomanne matem hawwodanchim afukkoyyonnihe?» yaa xa'mmukko. Ahimaaxim «I moollanna, ki gaaxxi awwonsaanchi Yoo'aab ki beyyo asse'u ammane kee'mmaalli dambaq firaakkoo moo'ummo; ihukkaarem woshshoom mada'e ihukkisa la'ummoyyo» yukko.

³⁰Adilim «Eehid higgaa uulle!» yukko. Ixxim eehid higaa uullukko.

³¹Ee lasage Tophphe'i uulli manchi ee beyyo afaa adilina «Adila! An kiina mishiraachcha amadaa waaraammo; keesenne bangujjaatinne ki'llo'i kee'n angiinsi kaballa Waa'i keese gatisaakko» yukko.

³²Adilim ee Tophphe'i mancho «Abeseloom xummannihe?» yaa xa'mmukko. Oo Tophphe'i uulli manchim «I moollanna, ixxonne afu luwwi ki diina'annee keesenne bangujjaatinne ki'llo'i hundannemii afona!» yaa dabarukko.

³³Adilim lobakata kichche'ukko; qash gooc hanenne baxamaakkoo minenne aagaa wi'llukko. Ee beyyo marukkuuyyim «I beeto! I beeto Abeselooma! Abeselooma i beeto! Ki bikkenne an lehaammoota'n! I beeto! Abeselooma i beeto!» I beeto!» yukkuuyyi wi'llam hee'ukko.