Read Hadiyya 2 Saamu'eel Kitaaba 2 Bible Online

2 Saamu'eel Kitaaba 2 - Hadiyya bible

2 Saamu'eel Kitaaba 2

¹Ee lasage Daawiit «Yihuxxi beero'uwwiinsi mato maraa amadonnihe?» yaa Waa'a xa'mmukko. Waa'im «Eeyya, mattaa amade» yukko. Daawiitim «Hinki beero'o amado?» yaa xa'mmukko. Waa'im «Keebiroona amade» yukko.

²Ee bikkina Daawiit ixxi lamem meentinne maqirem Keebiroona marukko; ixxuwwim Yizra'eeliinsette ikko'i Ahino'aamettee lehaa hee'u Qarmeeloos uulli Naabaal meentichcho Abigeelettee hee'llo'o.

³Ee'isam Daawiit ixxi awwonaano ixxuwwi abaroosinne maqirem massukko. Ixxuwwim Keebiroo'n kululleetanne yo'i hoffi beero'uwwanne afuutto'o.

⁴Ee lasage Yihuxxi manni Keebiroona waatto'o. Daawiitam doollita'a Yihuxxi adil issito'o. Yaabeesh Gala'aaxxan ikko'i manni Saa'oola waammito'isa Daawiit macceesaa

⁵Yaabeesh gala'aada manna asse'aa «Ixxeka leesha waammimminne ki'n moollanni Saa'oolina ama'nnantakko'oo manni ikkakko'isa moo'issakko'i bikkina Waa'i ki'nnuwwa maasse'ona.

⁶Odim Waa'i ixxi biijoomaa amma'nnamaakkoohaanoomaa ki'nnuwwina la'isona. Ki'nnuwwi issitakko'i eroommi bikkina anim anga dabaroommo.

⁷Eehannah qoxxehe; malaayyem issehe; ki'nnuwwi moollanni Saa'ool lehaakko; Yihuxxi minaadab eese doo'llita'a ixxuwwi adil issito'ookko» yukko.

⁸Saa'ool gogoxxi ijaajaanchi Neer beet Abaneer Saa'ool beet Iyyaabustenne maqire Yoordaanoos daajje higaa Mahinaayima gibaa marukko.

⁹Ee beyyonnem Abaneer Iyyaabuste'e Gala'aaxxi uullanne, Aaseeranne, Yizra'eelanne, Efireem uullannee Biiniyaam uullannee oohim Isra'ee'l minaadabanne hundannem adil issukko.

¹⁰Iyyaabuste adil ihu ammane ixxek umur sor hiincho ihaa hee'ukko. Ixxim lam hiincho gassukko. Ihukkaarem Yihuxxi sulli Daawiita awwonto'o.

¹¹Daawiitim Keebiroonanne afuuraa lamar hiinchinaa kollinaa Yihudanne adil ihukko.

¹²Neer beet Abaneerii Iyyaabuste'i gassaanii Mahinaayimiinsi ki'lla'a Gaba'oo'n beero'o waatto'o.

¹³Xaruy beet Yoo'aabii Daawiitik mulli gogotii fitta'a delbi gadanonne edanto'o. Yoo'aab gaalchi ee delbi mat idonne Abaneer gaalchim mulli idonne afuutta'a hee'llo'o.

¹⁴Ee ammanenne Abaneer Yoo'aabina «Niinniinsi lamem kolliinsim woraadduwwa doo'llinaa o'l mu'utinne orantamisa issinona» yukko. Yoo'aabim «Erane» yaa dabarukko.

¹⁵Ee bikkina Biiniyaam sulliinsi Iyyaabuste'e bikkita'a oranteena tommii lam manchii doo'llanto'o. Daawiit kollinnem tommii lam manchii doo'llanta'a oramimma asheetto'o.

¹⁶Annannichchim ixxi diinakkichchika horoore amadaa bisa'a midaadonne kaasukko. Ee'isinne lamiyyii soorem manchim mateeyyam ubba'a leto'o. Ee bikkina Gaba'oonanne oo beyyi «Bisa'i uulla» yamamukko.

¹⁷Ee balla kee'mmaalli or ihaa Abaneeraa Isra'ee'l mannaa Daawiit manni kaa'ukko.

¹⁸Ee beyyonnem Xaruyyek sasem oosim Yoo'aab, Abiisii Asaaheelii hee'llo'o; Asaaheelim geellichchanne udma'i kukkussichchisa qoxar hee'ukko.

¹⁹Abaneera hollaa amadeena ixxi kolli geerukko. Ixxo hollimmiinsi makkannem qeddannem daba'llukkoyyo.

²⁰Abaneerim laso daba'llaa «Ookki Asaaheelattennihe?» yaa xa'mmukko. Asaaheelim «Eeyya anette!» yaa dabarukko.

²¹Abaneerim «Eese hollansititte! Gaadaaniinsi mato hollansitaa amadu o'l mu'uta hoore» yukko. Ihukkaarem Asa'eel sabaa ixxo hollansukko.

²²Odim Abaneer «Ka eese hollansimma ure! An keese shoommisina mahina gafe'ansitoolla?» An keese shaa kiyyabbaayyi Yoo'aabika ille hinkid moo'eena xanoommo?» yukko.

²³Ihukkaarem Asa'eel kabadem hollansimma urimma sabukko. Ee bikkina Abaneer laso daba'llaa ixxi bagado huushaa godabonne kaasukkaare ludoom afarinne firukko. Asa'eelim uullanne ubaa lehukko. Ixxi leesh ubu beyyinne higoo manni hundim gadanonne uullaa moo'am hee'ukko.

²⁴Ihukkaarem Yoo'aabii Abiisii Abaneera hollansito'o. Eelliinchi aagukkuuyyim Giiyaahiinsi eelliinchi firinne Gaba'oo'n uulli udma'anne massoo googonne yoo Ama'i duuna affo'o.

²⁵Biiniyaam sulli manni odim wixxita'a Abaneer beyyo waatto'o. Ixxuwwim mat duunanne orina gudda'a uullito'o.

²⁶Abaneerim Yoo'aaba weeshaa « Heer heerinam orammummuuyyi hee'nnoommonnihe? Lasaanchonne qaraarimmiinsi bagaan mat luwwam siindeena xannoombee'isa sawwitooyyonnihe? Ku ki manni neese ixxuwwi abbaayyuwwa hollansimma uttamisina ijaajoobee'ek hinki balli afeebe'e?» yukko.

²⁷Yoo'aabim «At ka sagara woccibeeta'n ku manni sooxxi dar afeebe'e ixxuwwi abbaayyuwwa hollansimmiinsi daba'llitambee'an ihukkisa hee'oo Waa'i summinne hide'oommo» yaa dabarukko.

²⁸Ee bikkina Yoo'aab xurumba fugukko. Ee lasge ixxenne maqire hee'llo'i manni hundim Isra'eela hollansimma utto'o; orim uullukko.

²⁹Abaneerii ixxenne maqire hee'llo'i awwonaanii ee hiimo hundoomam taakke'lla'a Araab cebbi kollinne matto'o. Yoordaanoos daajjem higga'a Biitirooninne aa'lla'a Mahanaayima affo'o.

³⁰Yoo'aab Abaneera hollansimma uru ammanenne ixxi manni hundim mat ikka'a wixxito'o. Daawiit manniinsi Asa'eela edoo'n tommii honsi manchii bee'ukkis la'amukko.

³¹Daawiit manni Biiniyaam sulliinsi Abaneera awwonto'i mannika sas xibbee lohayyi manchoo shito'o.

³²Yoo'aabii ixxenne maqire hee'llo'i awwonaanii Asa'eel leesha massita'a Beetaliheemanne yoo ixxuwwi abaroos waammi beyyonne waammito'o. Ee hiimom taakke'llu'uuyyi gatta'a soodaraarom Keebiroona affo'o.