Read Hadiyya 2 Saamu'eel Kitaaba 20 Bible Online

2 Saamu'eel Kitaaba 20 - Hadiyya bible

2 Saamu'eel Kitaaba 20

¹Ee ammane Sheeba yakkam mat jor manchi ee beyyonne hee'ukko; ixxim Biiniyaam sulliinsette ihaa Biikirina beet hee'ukko; ixxim xurumba fugaa «Niina Daawiitinne maqire matem sharadim bee'e! Issayyi beetiinsim lago aa'nnoommi luwwi bee'e. Isra'ee'l minaadaba, Annannichchim ki mine elle'e» yaa sagara iimaa'aa wocukko.

²Ee bikkina Isra'ee'l minaadab Daawiita lagga'a Sheeba'a awwonta'a matto'o. Ihukkaarem Yihuxxi minaadab ixxuwwi adiliinsi annanni ikkoo'n Yoordaanoosiinsi ki'isaa Yerusaaleem afeebe'e maqirem matto'o.

³Daawiit Yerusaaleemanne yoo ixxi adilla'n mine afu ammanenne ixxi adilla'n mine egettona dissaa hee'u tommem bakki meentom mulli mine massaa waardiyyinne egerantamisa issukko. Ixxuwwina hasisoo luwwi hundam uwwakkamisa issukko. Ihona bagaan ixxuwwinne maqire iinse'ukkoyyo. Ee ammaniinsi ki'isaa lehameebe'e minenne egeramaa manniinsi annanni ihamaa busar meentisa hee'amukko.

⁴Adilim Amaasina «Yihuxxi manna hundam wixxaa'llaa sas balli woronne amaddaa waare» yukko.

⁵Amaasim Yihuxxi manna weesheena marukko. Ihukkaarem adil yu ballanne waareena xanukkoyyo.

⁶Daawiitim Abiisina «Sheeba'a Abeseloomaanniinsi lophphaakkoo hawwo neesenne afiseenatti ihu bikkina i gaadaano amaddaa laseese; eehid ihubeelas girbamu beero'uwwa amadaa niinniinsi xoreena xanookko» yukko.

⁷Ee bikkina Yoo'aab gaadaan, adi'l lombi waardiyyuwwii mulli gaadaanii Abiis awwonsatinne Yerusaaleemiinsi fitta'a Sheeba'a laseesso'o.

⁸Gaba'oonanne hee'oo lob kin yoo beyyo affo'i ammanenne Amaas ixxuwwinne edamukko. Ee ammane Yoo'aab ixxi bisa'a seejjanne aagisaa ee seejjam lade'u sabbatanne edaa karaa orina gudaa hee'ukko. Ixxim taakke'ukkuuyyi oo bisa'i ubukko.

⁹Yoo'aabim Amaasa «Iyyabbaayyo, xummannihe?» yaa suunqoohan ihaa haareedda makki anginne amadukko.

¹⁰Mulli anganne Yoo'aab bisa'a amadukkisa moo'ubee'i bikkina Amaas ixxi gaga ege'lloo'n hee'ukko; ee bikkina Yoo'aab ixxi godabo qasukko. Ixxekim godaphphi mu'ut uullanne fuqukko. Ixxim ee ammanem lehu bikkina Yoo'aab la'mmeka qasukkoyyo. Ee lasage Yoo'aabii ixxi abbaayyi Abiisii Sheeba'a hollansimma amaddo'o.

¹¹Yoo'aab gaadaaniinsi mat Amaas leeshi gadanonne uullaa «Yoo'aabaa Daawiitaa awwontakkam hundim Yoo'aaba awwonnehe!» yaa sagara iimaa'aa wocukko.

¹²Amaasikim leesh xiiginne kolbamaa gooqqi lambe'enne ubaa hee'ukko. Oo manchim Yoo'aab gaadaan hundim uullita'a moo'llu'uuyyi moo'aa ee leesha googiinsi haxonne hooraa eddechcha hanenne ambukko.

¹³Oo leesh gooqqi lambe'iinsi ki'aa lasage gogot hundim Shee'ba'a laseesseena Yoo'aaba awwonta'a matto'o.

¹⁴Sheebaa'im Isra'ee'l sulli yoo uulli hundam higaa maraa Aabeelbeetma'ika yakkam beero'o afukko. Biikir moolli manni hundim wixxita'a Sheeba'a awwonta'a ee beero'o aaggo'o.

¹⁵Yoo'aab gaadaan Sheeba'a ee beyyonne yoo'isa macceessa'a ee beero'o matta'a kibbito'o. Ee beero'i ooxxi girbi lud afeebe'em oota bakkiissa'a dichchira baxxo'o. Odim ee ootam ginditam hee'llo'o.

¹⁶Ee beero'onne hee'llam mat qoor meentichcho ee beero'i ooxxi hanenne ikka'a sagara iimaa'lla'a «Macceessehee! Macceessehee! Yoo'aab kid waaroo'isina kullehe; an ixxo atoorasseena hasoommo!» yito'o.

¹⁷Yoo'aabim ee beyyo maru ammanenne oo meentichcho «Yoo'aab atettennihe?» yita'a xa'mmito'o. Ixxim «Eeyya anette!» yukko. Isem «I moollanna, hino'o macceese» yito'o. Ixxim «Ihona, macceesoommo» yukko.

¹⁸Isem «Gaassi doollenne ‹Aabeel beero'o mattakka'a ki'nnuwwi xa'mmichchika dabachcha ee beyyiinsi siiddakkamo› yakkam hee'akko'o. Mannim eekka issam hee'ukko.

¹⁹Ihukkaarem at Isra'eelanne xummii amma'nnanchii wo'mmaakkoo keeniinsi mat anette; at Isra'eelina am ihaakkoo beero'o ginditeena sawwitoohonnihe? Ka Waa'ina gulummi ihaakkoo beero'o bi'isseenannihe?» yito'o.

²⁰Yoo'aabim «An ki'nnuwwi beero'o bi'isoommoyyo! Hore'em gindoommoyyo!

²¹Ni sawwit eehaneyyo. Ee duunaam Efiree'm uulli Sheeba'a yakkam Biikir beet adil Daawiitanne bangujjaato ki'saakko; ee bikkina xale'i ee mancho iina uwwehe bagaan an ka beero'o fatakaa maroommo» yaa dabarukko. Isem «Ixxeka horoore mullaa ooxxi hanenne daramboommo» yito'o.

²²Ee lasage oo meentichcho qooroom wo'mmaakkoo sogitano amadda'a ee beero'i minaadaphphi beyyo matto'o. Ixxuwwim Sheeba'i horoore mutta'a ki'n ooxxi haninne Yoo'aabina darabbo'o. Ixxim gaadaan beero'o fatakita'a fittona mare'i ihoo'isina xurumba fugukko; ixxuwwim mine elle'llo'o; Yoo'aabim adilinne edameena Yerusaaleema marukko.

²³Yoo'aab Isra'ee'l gaaxxi awwonsaanchi hee'ukko; Yoodaah beet Baanaay Daawiit lombi waardiyyi awwonsaanchi hee'ukko.

²⁴Adooniiraam adi'l baxaano ijaajaanchi hee'ukko; Ahiiluud beet Yoosaafix aganna kitaabaanchi hee'ukko.

²⁵Suusa'a adi'l mi'n kitaabaanchi hee'ukko; Saadooqii Abiyaataarii qeessuwwi hee'llo'o.

²⁶Ee'isam Yaa'iir beero'iinsetti ihu Iira'a Daawiit qeessuwwiinsi mat hee'ukko.