Read Hadiyya 2 Saamu'eel Kitaaba 22 Bible Online

2 Saamu'eel Kitaaba 22 - Hadiyya bible

2 Saamu'eel Kitaaba 22

¹Waa'i Daawiita Saa'ooliinsii mulli ixxi diina'i angiinsii agaagaa gatisu ammane ka mazmuura Waa'i lombina zammarukko.

²Waa'i eesenne jor afoobee'isa egeraancho; qoxxaalli girbaa gatisaanchoo.

³Waa'i eesenne jor afoobee'isa egeraancho; ixxi iina agiraa bagadoo; ixxi iina qoxxaalli girba; daphphoommi beyyoo gatisaanchoo; ixxi eese malaayyaammuwwi angiinsi gatisookko.

⁴An galat hasisoo Waa'a weeshoommo; ixxi eese i diina'iinsi gatisaakko.

⁵Leh u'n eese kibbukko; bichchi dirisim eese xuuxukko.

⁶Waammi us eesenne xaaxamukko; leh qaashim amadukko.

⁷Eesenne hawwi afu ammane Waa'a weeshummo; iina hara'mmonam i Moollanna uunxummo. Ixxim i sagara ixxi minenne ihaa macceesukko; i laachcham macceesukko.

⁸Waa'i quuqu bikkina uulli heekke'amukko; huxe'amukkom; uulli shooho'uwwim sheephsheephukko; heekke'amukkom.

⁹Ixxi saniinsim quuqimmik wiriir firukko. Ixxi suumiinsim itoo gii'l labanii shokkiisoo gii'l kasharii firukko.

¹⁰Iimane diqaa aad dillukko. Ixxi lokkiinsi woroonim tuunsaakkoo duub hee'ukko.

¹¹Kiruubeelanne afuuraa bararukko. Hafachchi ladannem afuuraa bararukkuuyyi iim firukko.

¹²Ixxi gaga hundoomam tuunsinne ifiisukko. Xeenaam tuunsi duubim ixxo kibbaakko.

¹³Ixxi illagenne yoo caakkiinsi banqi belelukko.

¹⁴Moollanni iimaninne banqisa gugukko. Hundam xanoo Waa'i sagarim macceesamukko.

¹⁵Ixxi xiyyuwwam tokkosukko. Diina'am binnaa'ukko. Banqi belellaatinnem hollukko.

¹⁶Waa'i ixxi diina'a axeeru ammanee quunqinnem sagara macceesisu ammanee dambalaqik lugum moo'amukko; uullikim shooho'i la'amukko.

¹⁷Waa'i iimaniinsi ixxi anga biddiqaa'aa eese amadukko; xilli wo'i woriinsim hixixaa'aa fissukko.

¹⁸Lobakata eesenne wodda'a hee'llo'i malaayyaammuwwi diina'iinsii eese sabbam kee'n angiinsii Waa'i gatisukko.

¹⁹An hawwummi ammane diina'oominne eesenne ki'llo'o. Ihukkaarem i Waa'i eese egerukko.

²⁰Eesem haraar beyyonne fissukko. Eesenne iittu bikkinam gatisukko.

²¹I muccuroo'mmisinne iina miqookko. I angi muccuroo'mmisinnem iina dabarookko.

²²An Waa'ika googo awwonaammo. Waa'anne afare dabaraa jor baxo baxummoyyo.

²³Waa'ika seera hundam egeraammo; ixxi ijaajiinsim laso daba'llummoyyo.

²⁴An ixxi illagenne miiqakkam luwbee'ane; I gagam baaxiiliinsi ege'llummo.

²⁵Waa'i i muccuroo'mmisinnee i angi muccuroo'mmisinnee iina miqookko.

²⁶Waa'a! Kiina amma'nnamu keenina atim amma'nnantaattoohane; xabbeen keenina atim xabbeena.

²⁷Muccur keenina atim muccura; ihukkaarem boqqi keenina atim boqqa.

²⁸At wor amadamu keeno gatissootto; ihukkaarem bolxitam keeno sholliissootto.

²⁹Waa'a! At iina caakka; i tuunsom caakkissootto.

³⁰I diina'a kaa'ona iina malaayye uwwitootto; ixxuwwi girba xophihonam hara'mmitootto.

³¹Waa'ik goog lobakata muccura; ixxek sagarim hore'em muccura; ixxonne magannaato aaggam keen hundinam ixxi agira.

³²Waa'iinsi bagaan mulli Waa'i bee'e Ixxeensi bagaan joriinsi daphphixxi beyyi bee'e.

³³Iina qoxximma uwwookkokii i googom xabbaa'ookkokii Waa'a.

³⁴Ixxim i lokko saarokkichchi lokkisa qoxxisookko. Duunnuwwannem baachchi bee'e uullisookko.

³⁵Ixxim i angina qaxxancha losisookko. I wodam naas xiyya daraboommisina qoxxisukko.

³⁶I Waa'a, eese gatisoo ki agira iina uwwitto; ki hara'mmatim eese lombaam issaakko.

³⁷I taakko haraassitaatto; i lokkim qolamukkoyyo.

³⁸I diina'a hollaa amadoommo. Ixxuwwam bi'isoo'n laso daba'lloommoyyo.

³⁹La'mmeka ki'llambee'isa aphphisoommo; ixxuwwam kaa'aa hance'oommo.

⁴⁰Oramoommisina malaayye uwwitootto; i diina'am i illagenne guruphphissootto.

⁴¹I diina'i iinniinsi laso daba'llita'a gibbamisa issitto; eese sabbam keenom bi'isummo.

⁴²Ixxuwwim agaago hassa'a laattamo; ihukkaarem ayyim ixxuwwa gatisooyyo. Waa'am weeshshamo. Ihukkaarem ixxi hore'em dabarooyyo.

⁴³Ixxuwwi silliqanta'a dir ikkeebe'e aphphisoommo; googonne hee'oo ha'llisam hance'amoommo.

⁴⁴I minaadaphphi angiinsi eese gatissitto; minaadab hundinam adil issitto. An la'oombee'i minaadabim iina ijaajamaakko.

⁴⁵Allaggi minaadab eese shoobbookko; i sado macceesukkisam iina ijaajamookko.

⁴⁶Ixxuwwim baachchinne u'nnantamo; huxe'antu'uuyyi girbiinsi fitta'a i beyyo waattamo.

⁴⁷Waa'i hee'oohane! eese joriinsi egeru Waa'ina galat ihona; eese gatisu malaayyaam Waa'im iimiimihona.

⁴⁸Ixxi i diina'iinsi baado miqisookko; minaadabim iina ijaajantamisa issookko.

⁴⁹Eese i diina'iinsi gatissaatto. I Waa'a! At i Diina'i illagenne imiimaa'llaatto. Damiggam kee'n angiinsim eese gatissaatto.

⁵⁰Ee bikkina minaadaphphi lambe'enne keese galaxxoommo; ki summi bikkinam mazmuura zammaroommo.

⁵¹Ixxi doo'llaa adil issu Daawiitinaa ixxi shumo'inaa Waa'i kaachchanne edaa kaachcha uwwookko; ixxi iittom heer heerinam moo'isookko.