Read Hadiyya 2 Saamu'eel Kitaaba 23 Bible Online

2 Saamu'eel Kitaaba 23 - Hadiyya bible

2 Saamu'eel Kitaaba 23

¹Daawiit lasaanchonne wocu sagar kane Waa'i lonsukkok, Yaaqoob Waa'i adillanina doo'llukkok, mishisoo mazmuulluwwa Isra'ee'l minaadabina gudisu Issayyi beet Daawiit kid yaa wocukko.

²Waa'ik Ayyaan eesennetti ihaa wocookko. Ixxi sagarim i suumiinsi firookko.

³Isra'ee'l Waa'i kaka wocaakko; Isra'ee'l egeraanchi iina «Hanqa oogatimminnee Waa'a baddimminnee gassoo adil,

⁴duub bee'i da'l caa'mmisaa xeen ga'nnaa lasage hixe mutisoo eelliinchisaa» yaakko.

⁵I min Waa'i illagenne amma'nnamaakkoohaneyyonnihe? hundisinnem wo'm ihaakkoo heer heerina hee'oo hidi'l sagara iinninne aagaakkoollayyonnihe? iina gatimmaa i mixxa'nnekaa hundam uwwookkokidu ixxotteyyonnihe?

⁶Ihukkaarem boqquwwi keen ayyim anginne amadeena xanoobee'i uunjamu uttisa. Ixxuwwam ayyim anginne amadeena iggooyyo.

⁷Utta amadoo manni hundim xaa'lleka te'im haqqika hookko'o amadookko; oo uttim yoo beyyonnem giirinne shokkookko.

⁸La'anto'oo Daawiit gaadaa'n summi kanniinsi woroon yoohane. Luxxek Taahik moouiinsetti ihu Yoosheeb Baasheebeeta yakkaman ihukkuuyyi ixxim sasem malaayyaammuwwiinsim lophphoo awwonsaanchi hee'ukko. Ixxim mat gaadonne ixxi bagadinne sadeenti xibbi mancho shukko.

⁹Ee sasem malaayyaammuwwiinsi la'mmek Ahooh moolliinsette ihu la'amaakkoo Doodo'i beet Ali'aazaretti hee'ukko. Mat ayyaamo ixxii Daawiitii gaadina fitto'oo Filisxee'm manninne uullixanto'o; Isra'ee'l mannim lasinne gibbo'o.

¹⁰Ihukkaarem ku manchi yoo beyyonne qoxxaa uullimminne ixxi angi hoogaa amadu bisa'anne amaxxameebe'i afeebe'e Filisxee'm manna qasukko. Waa'i ee ayyaamo kee'mmaalli kaachcha uwwukko. Ee lasage Isra'ee'l manni Ali'aazar hee'u beyyo daba'llita'a leto'i Filisxee'm manniinsi lobakat o'l mu'uta qeefaddo'o.

¹¹Ee sasem malaayyaammuwwiinsim saxxek odim Haraariinsetti ihu la'amaakkoo Age'i beet Shaama'atti hee'ukko; mat balla Filisxee'm manni mishir yoo abuulli uullanne Lehii yakkam beyyonne orina gudda'a wixxita'a hee'llo'o. Isra'ee'l mannim Filisxee'm manni illagiinsi gibbo'o.

¹²Ihukkaarem Saama'a uullu beyyo fatakukkoyyo. Ee beyyonnem Filisxee'm manna guullukko; ee ayyaamo Waa'i lophphaakkoo kaachcha uwwukko.

¹³Hurbaata wixxaa'akkam ammanenne sadem malaayyaammuwwiinsim sasoom Daawiit yoo Aduulaa'm daawwa'a dillito'o. Ee ammane Filisxee'm gaadaaniinsi hofqaxim Raafaayim cebbanne wiiddanaa hee'ukko.

¹⁴Ee ammane Daawiit girbamaakkoo duunanne hee'ukko. Filisxee'm gaadaaniinsi mat gaalchi Beetaliheema amadaa hee'ukko.

¹⁵Daawiitim ee uulla heele'imminne «Betelihee'm ooxxi gadanonne yoo wo'i bariinsi agoommi wo'o eeboo mancho siidaammoota'n» yukko.

¹⁶Ee bikkina oo la'anto'oo sasem malaayyaammuwwi gaadaanim ee Filisxee'm manni wiiddana iggimminne iiqqa'a higimminne ee bariinsi wo'o inkiitta'a Daawiitina eebbo'o. Ihukkaarem Daawiit ageena iittukkoyyo. Agimmi bikkenne Waa'ina kitim issaa dunaa lasage

¹⁷«Waa'a! An ka wo'o hore'em agoommoyyo! An ka wo'o aagumlas ixxuwwi gaga higissa'a uwwita'a ka wo'o eebbo'i ee malaayyaam manni xiiga agimmisanne xigamookko. Ee wo'om agimma sabukko. Oo la'anto'oo sasem malaayyaam gaadaan baxxo'i geedoo'm bax kakeeno.

¹⁸Xaaruyyi beet Yoo'aab abbaayyi Abiis la'anto'oo sadem gaadaa'n awwonsaanchi hee'ukko. Ixxim sas xibbi manchinne oramaa hundam shukko. Ee bikkina ee sasem geedduwwisam la'amaakkoohan ihukko.

¹⁹Ee sadem gaadaaniinsim la'amaakkoohan ihu bikkina ixxuwwina awwonsaanchi ihukko. Ihukkaarem sasem geedduwwi qaxa ixxi summamukkoyyo.

²⁰La'amaakkoo mulli gaadaanchim Qabxi'ee'l Yoodaah beet Baanaayatti hee'ukko. Ixxim Moo'aaphpheka la'anto'oo lam gaadaano shimmiinsi higaa lobakat geedoo'm baxo baxaakko; mat ammane uullanne barad ubaakkoohaannonne mat barenne aagaa hobbichcho shukko.

²¹Ee'isam bagado amadaakkoo mat malaayyaam Gibxi uulli mancho shukko. Oohim Baanaay mugiinsi bagaan o'l mu'uta maham amadoo'n ee Gibxi manchi kolli hincaa ixxi bagado angiinsi gosaa ixxi bagadinnem ixxo shukko.

²²Lanto'oo sasem malaayyaammuwwisam Baanaay baxu geedooma'n bax eekeeno.

²³Ee sadiinsim lobakata la'amaakkoohan ihuta'nnim geedoommaninne sasem malaayyaammuwwiinsim hoffe'am hee'ukko; Daawiitim Baanaaya lombi waardiyyina ijaajaanchi issukko.

²⁴Ee la'anto'oo sadem kee'nnekim summi kakeeno. Yoo'aab abbaayyi Asa'eel, Beeteelihee'm Doodo'i beet Eelihanaan, Haarood Shaama'aa Eeliiqii, Feeleex Heeleex, Taqo'i Iiqeesh beet Iira'a, Anaatooxxi Abi'eezer, Huusha'i Mabunaay, Ahooh Xalmoon, Naxoof Maahiraay, Naxoof Ba'inaay beet Heelleeb, Biiniyaa'm uulli Giiba'i Riibaay beet Iitaay, Phiri'aatoo'n Baanaay, Gaa'aash cebbi gada'n Hiidaay, Araphphi Iibii'alboon, Baarihuu'm Azmaaweet, Shaa'aalboo'n Eeliyaahib, Yaasheen oos, Yoonaatiin, Hara'l Shaama'a, Hara'l Shaarar beet Ahi'aam, Maa'ika'i Ahaasabay beet Eelifeeleex, Giilo'i Akxoofeel beet Eeli'aam, Qarmeeloos Heexir, Araphphi Pha'aaraay, Xooba'i beetik Naataan beet Yiigaal, Gaaxxi Baani'i, Amoo'n Xeeleeq, Yoo'aab o'l mu'uta iyyaanchi hee'u Ba'eerooxxi Naahiraay, Yaatii'l Iira'aa Gaareebii Hiite'i Ooriyyii.<(...)