Read Hadiyya 2 Saamu'eel Kitaaba 24 Bible Online

2 Saamu'eel Kitaaba 24 - Hadiyya bible

2 Saamu'eel Kitaaba 24

¹Odim Waa'i Isra'eelanne quuqu bikkina Daawiit kollinne ixxuwwanne hawwi waaroo'isa issukko. Waa'im Daawiitina «Mattaa Isra'ee'llekaa Yihuxxi minaadabaa xige!» yukko.

²Ee bikkina Daawiit ixxi gaada'n ijaajaanchi ihu Yoo'aabaa ixxenne maqire yo'i gaaxxi awwonsaanoo «Daaniinsi Beersaabe'i afeebe'e yo'i Isra'ee'l sulluwwi beyyi hundam mallehe. Ixxuwwikim xig hinkaa'nda'e la'eena xanoommisina gaadeena xanoo qaxa xiggehe» yukko.

³Ihukkaarem Yoo'aab «Adila, ki Moollanni Waa'i Isra'ee'l minaadab kaba yoohaanniinsi lophphaa xibbi suume fikkaannoo'isa issona. I moollanni ikkitti adi'llekim illi eekka moo'oo'isina umur qeeraa'llona. I moollanna, kaka issiteena hassitok mahinatte?» yukko.

⁴Ihukkaarem adil qoxxisaa ijaaju bikkina Yoo'aabii gaaxxi awwonsaanii Isra'ee'l minaadaba xiggeena matto'o.

⁵Ixxuwwim Yoordaanoos eeqidonne fitta'a Gaad sulli uulli cebbanne yoo Aro'ee'l beero'i woroo'n qarinne wiiddant'o. Ee beyyiinsim hanaa'n qaranne yoo Yaa'izeera affo'o.

⁶Ee lasage Gala'aadannee Hiite'i uullannee yoo Qaadeesa affo'o. Ee beyyiinsim Daana, Daaniinsim eelliinchi aagoo kollonne yoo Siidoona matto'o.

⁷Ee beyyiinsim woroo'n qarinne girbamookkoo Xiiroos beero'o ee'isam Hiiwe'ikaa Kaani'aa'n beero'muwwaa hundam matto'o. Lasaanchonnem Yihuxxi uullanne yoo Bersaabe'e affo'o.

⁸Ee'isinne Isra'ee'l uullanne hundannem daba'llantu'uuyyi honsi aganaa lamiyyi ballaa ihaa lasage Yerusaaleema daba'llito'o.

⁹Yoo'aabim Isra'eelanne sadeenti xibbi kum Yihudanne onti xibbi kum gaadeena xanoo manni yoo'isa adilina la'isukko.

¹⁰Ihukkaarem Daawiit minaadaba xigaa lasage ixxi tiir acceeqasaa u'nnisu bikkina Waa'ina «An eekka issimminne lobakata keese hawwodaammo; iikkam qawwoo'm baxo haafihe» yaa uunxukko.

¹¹Waa'im hiraagaanchi Gaadina «Daawiitina ‹oono'o, an kiina sas doo'lla hincaa'aammo; at doo'llittokam keesenne issoommo› yoolla yitaa kure» yukko. La'm balli daram Daawiit diriiriinsi ki'aa lasage

¹³Gaad ixxi beyyo maraa Waa'i ixxena kure yukkoka kurukko. Ixxim «Ki uullanne sas hiinchi sibaariinsi, sas agana ki diina'i keese hollansimmiinsii ki uullanne sas balla booban ihimmiinsii hinka doo'llitootto? Ka woshsha danaamisa sawwitaa Waa'ina kuroommi ki doo'lla kure» yukko.

¹⁴Daawiitim Gaadina «Ku woshshi iina kee'mmaalla; ihukkaarem manni anganne ubimmiinsi Waa'ik haafit lobakat ihu bikkina ixxi anganne ubimmi niina e'llookko» yaa dabarukko.

¹⁵Ee bikkina Waa'i ee balli dariinsi ki'isaa ixxi yu balli afeebe'e Isra'eelanne boobana dilliisukko. Ee boobaninnem Daaniinsi Bersaabe'i afeebe'e yoo Isra'ee'llek lamarayyi kum manni beeddukko.

¹⁶Waa'ik asse'amaanchi Yerusaaleema bi'iseena gudaakkoohaannonne minaadaphphi hawwodanchanne Waa'i kichche'u bikkina asse'amaanchina «Ihookko! Uullise!» yukko. Ee ammane Waa'i asse'amaanchi Iyyaabuus uulli Ooriyo'i oodo'onne uullaa hee'ukko.

¹⁷Daawiit minaadaba guullam hee'u Waa'i asse'amaancho moo'aa Waa'ina «Hawwodummokii huushamummokkii anette; ku ma'lluwwam la'oobee'i minaadab keese maha hawwodaatte? Ku booban ixxuwwanne dillukkaanniinsi eesennee i abaroosannee ihona» yaa xa'mmukko.

¹⁸Ee ballam hiraagaanchi Gaad Daawiit beyyo maraa «Oorin oodo'o mattaa Waa'ina kitima hincaa'akkam beyyo baxe!» yukko.

¹⁹Daawiitim Waa'ina ijaajamaa Gaad kurukkisa issukko.

²⁰Oorinim Adil Daawiit ixxi gassaaninnem ixxi beyyo worooniim waarukkuuyyi moo'ukko. Ixxim Daawiit illagenne heeshaa otossukko.

²¹Ixxim «Adila, mah bikkina ka beyyo waattitto?» yaa xa'mmukko. Daawiitim «Waa'i boobana niinniinsi dabarona ki oodo'o bitaa'aa Waa'ina kitima hincaa'akkam beyyo baxeenatte» yukko.

²²Oorinim «Adila, ka oodo'onne at hassittisa issitaa Waa'ina kitima hincaa'e. Shokkiisakka'a hincaa'akkam kitiminam mirgo'uwwi keyye yookko; giirinattem ihuta'n ixxuwwi gaanjaqqii hurbaata ganakkam mu'utii hundim keyye yookko» yukko.

²³Oorinim ee hundam adilina uwwaa «Ki kitim Waa'a liiransoohan ihona» yukko.

²⁴Ihukkaarem adil Daawiit Oorinina «Eehideyyo; an bito miqimmi hasisookko; an bito miqumbee'i luwwa i Waa'ina kitim issaa hincaa'immi hasisooyyo» yukko. Ee lasage Daawiit oodo'oo mirgo'uwwaa ontayyi kin birina bitaa'ukko.

²⁵Ee oodo'onnem Daawiit kiti'm beyyo baxaa shokkiisakka'a hincaa'akkam kitimaa mateeyyoo'm kitimaa Waa'ina hincaa'ukko. Waa'im Daawiitika uunxato macceesukko; Isra'eelanne dillam hee'u boobanim uullukko.